រដ្ឋាភិបាលកំពុងពន្លឿនការសិក្សាស្ថាបនាផ្លូវលេខ១០ ពីសំឡូត មកកោះកុង

• 16 ខែ​មករា 2020
• Uncategorized @km
• 5 មើល

គម្រោងសាងសង់ផ្លូវជាតិលេខ១០ តភ្ជាប់ សំឡូត វាលវែង កោះកុង ត្រៀមបើកការដ្ឋានសាងសង់នៅឆ្នាំ២០២០នេះ ខណៈក្រុមការងារអន្តរក្រសួងបានពន្លឿនការសិក្សាហេតុប៉ះពាល់នៃគម្រោង មុនសម្រេចបើកការដា្ឋន។

យោងតាមរបាយការណ៍ក្រសួងសាធារណការ និងដឹកជញ្ជូន គម្រោងសាងសង់ផ្លូវជាតិលេខ១០ ស្ថិតនៅក្នុងគម្រោងត្រៀមសម្ផោធបើកការដ្ឋានក្នុងឆ្នាំ២០២០។

ក្រុមការងារអន្តរក្រសួង ដឹកនាំដោយ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូន និងឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន បានចុះត្រួតពិនិត្យ និងកំណត់ទីតាំងភូមិសាស្រ្ត ស្ថិតនៅក្នុងខេត្តពោធ៍សាត់ និងកោះកុង សម្រាប់គម្រោងផ្លូវជាតិលេខ១០នេះ។ ការចុះអង្កេតនេះ គឺធ្វើឡើងតាមរយៈការជិះលើឧត្តម្ភចក្រ ពិនិត្យមើលពីខាងលើ។

ឯកឧត្តម ប៉ាល់ ចន្ទតារា រដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូន បានអោយដឹងថា ការចុះត្រួតពិនិត្យកាលពីពេលថ្មីៗនេះ មិនទាន់បានសម្រេចជ្រើសរើស ឬកំណត់ទីតាំងសម្រាប់ស្ថាបនាផ្លូវជាតិលេខ១០ នៅឡើយទេ។

ឯកឧត្តម ប៉ាល់ ចន្ទតារា បញ្ជាក់ថា តាមរយៈចុះត្រួតពិនិត្យ ដល់ទីតាំងផ្ទាល់ ឃើញថាតម្រាយផ្លូវ ដែលបានដៅទុកកន្លងមក ប៉ះពាល់ដល់ព្រៃឈើច្រើនពេក។ ដូច្នេះហើយ អន្តរក្រសួងសម្រេចចិត្តមិនទាន់សម្រេច ហើយនឹងធ្វើការពិនិត្យផ្លូវវាងផ្សេងទៀត។

ឯកឧត្តម ប៉ាល់ ចន្ទតារា ថ្លែងថា៖ “គម្រោងសាងសង់ផ្លូវជាតិលេខ១០ អាចជ្រើសរើសផ្លូវផ្សេងទៀត ដោយសារប៉ះពាល់ព្រៃច្រើនពេក ហើយយើងស្តាយព្រៃឈើ”។

បើតាមក្រសួងសាធារណការ ផ្លូវជាតិលេខ១០នេះ ដែលមានប្រវែងសរុប ១៩៧ គម នឹងត្រូវសាងសង់ដោយប្រើប្រាស់ហិរញ្ញប្បទានសហប្រតិបត្តិការជាមួយប្រទេសចិន៕

• គម្រោងអភិវឌ្ឍន៍