វៀតណាមប្រកាសសង់ស្ដូបមិត្ដភាពកម្ពុជា-វៀតណាមនៅប្រទេសរបស់ខ្លួន ដើម្បីបង្ហាញពីមិត្តភាពដ៏រឹងមាំ និងស្អិតល្មួត

• 15 ខែ​មិថុនា 2025
• Uncategorized
• 4 មើល

វៀតណាម បានបង្ហាញនូវគម្រោងសាងសង់ស្ដូបមិត្ដភាពកម្ពុជា-វៀតណាមនៅក្នុងប្រទេសរបស់ខ្លួន ដើម្បីបង្ហាញពីការដឹងគុណទៅវិញទៅមក និងដើម្បីបង្ហាញដល់សាធារណៈមតិជាតិ និងអន្ដរជាតិឱ្យដឹងកាន់តែច្បាស់អំពីទំនាក់ទំនងដ៏រឹងមាំ និងស្អិតល្មួតរវាងកម្ពុជា-វៀតណាមនៅគ្រប់កាលៈទេសៈ។

ការបង្ហាញពីគម្រោងសាងសង់ស្ដូបមិត្ដភាពកម្ពុជា-វៀតណាមនេះ បានធ្វើឡើងក្នុងឱកាសដែលសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា អនុញ្ញាតឱ្យ នាយឧត្ដមសេនីយ៍ ហ្វៀន តិន គឿង (Nguyen Tan Cuong) អនុរដ្ឋមន្ត្រីក្រសួងការពារប្រទេសវៀតណាមអគ្គសេនាធិការកងទ័ពប្រជាជនវៀតណាម ចូលជួបសម្ដែងការគួរសម នៅវិមាន៧មករា នៅថ្ងៃទី៤ ខែមិថុនា ឆ្នាំ២០២៥នេះ។

ថ្លែងប្រាប់អ្នកសារព័ត៌មានក្រោយបញ្ចប់ជំនួបខាងលើ ឯកឧត្ដម ជា ធារិទ្ធ អ្នកនាំពាក្យព្រឹទ្ធសភាបានបញ្ជាក់ថា អនុរដ្ឋមន្ត្រីក្រសួងការពារប្រទេសវៀតណាម បានរំលេចអំពីគម្រោងសាងសង់ស្ដូបមិត្ដភាពកម្ពុជា-វៀតណាមនៅក្នុងសារមន្ទីរមួយនៅប្រទេសវៀតណាម ដើម្បីចង់បង្ហាញទៅដល់សាធារណៈមតិជាតិ និងអន្ដរជាតិឱ្យកាន់តែយល់ច្បាស់ និងស៊ីជម្រៅអំពីទំនាក់ទំនងដ៏ស្អិតរមួតរវាងកម្ពុជា-វៀតណាមនៅគ្រប់កាលៈទេសៈ។ ជាពិសេស ក្នុងវិស័យកងទ័ពរវាងប្រទេសទាំងពីរ ដែលបានងើបរួមគ្នាតវ៉ា និងរើសបម្រាស់ខ្លួនចេញពីអាណានិគមន៍នាពេលកន្លងមក។

ឯកឧត្ដម បានបន្តថា សម្តេចតេជោបានឆ្លើយតបដោយសម្ដែងនូវការពេញចិត្ដចំពោះគម្រោងសាងសង់ស្ដូបមិត្ដភាពកម្ពុជា-វៀតណាមនៅប្រទសវៀតណាមនេះ បន្ទាប់ពីកម្ពុជាបានកសាងស្ដូបមិត្ដភាពកម្ពុជា-វៀតណាមនៅក្នុងប្រទេសរបស់ខ្លួនរួចហើយ។

ឯកឧត្ដម បានលើកឡើងនូវប្រសាសន៍សម្តេចតេជោថា ការសាងសង់ស្ដូបមិត្ដភាពកម្ពុជា-វៀតណាម គឺជាគំនិតផ្ដួចផ្ដើមរបស់សម្ដេច ដែលបានស្នើចាប់តាំងពីឆ្នាំ២០២០មកម្លេះ ដើម្បីធ្វើយ៉ាងណាឱ្យមានស្ដូបមិត្ដភាពកម្ពុជា-វៀតណាមនៅក្នុងប្រទេសវៀតណាមផងដែរ។

បើតាមការបញ្ជាក់របស់សម្ដេចតេជោ ការជំរុញសាងសង់ស្ដូបមិត្ដភាពកម្ពុជា-វៀតណាមនេះ ដើម្បីឆ្លុះបញ្ចាំង និងបង្ហាញ​ពីការដឹងគុណគ្នាក្នុងការជួយគ្នាទៅវិញទៅមក ។

ការសាងសង់ស្តូបមិត្តភាពកម្ពុជា-វៀតណាម មិនត្រឹមតែបង្ហាញពីការអបអរសាទរប្រវត្តិសាស្ត្ររួមគ្នាប៉ុណ្ណោះទេ ប៉ុន្តែថែមទាំងជាសក្ខីភាពនៃកិច្ចសហប្រតិបត្តិការដែលកំពុងបន្តរវាងប្រជាជាតិទាំងពីរ ជាពិសេសលើវិស័យការពារជាតិ និងស្ថិរភាពក្នុងតំបន់។ គំនិតផ្តួចផ្តើមនេះត្រូវបានរៀបចំឡើងដើម្បីបង្កើនភាពមើលឃើញនៃទំនាក់ទំនងមិត្តភាព ជំរុញអនាគតដ៏ត្រចះត្រចង់សម្រាប់ប្រទេសទាំងពីរ។