សួនឧស្សាហកម្មវាយនភណ្ឌបៃតងដ៏ធំ លើផ្ទៃដី ៥០០ហិកតា នៅកំពង់ស្ពឺ បើកការដ្ឋានសាងសង់ហើយ

• 12 ខែ​វិច្ឆិកា 2024
• Uncategorized
• 5 មើល

គម្រោងអភិវឌ្ឍសួនឧស្សាហកម្មវាយនភណ្ឌបៃតងដ៏ធំមួយនៅកម្ពុជា ចាប់ផ្តើមបើកការដ្ឋានសាងសង់នៅលើផ្ទៃដី ៥០០ហិកតា ក្នុងភូមិឈើនាង ឃុំតាំងស្យា ស្រុកភ្នំស្រួច ខេត្តកំពង់ស្ពឺ។ នេះបើតាមពិធីបញ្ចុះបឋមសិលាបើកការដ្ឋានសាងសង់ ក្រោមអធិបតីភាព ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី៨ ខែវិច្ឆិកា ឆ្នាំ២០២៤ ដោយមានវត្តមានចូលរួមពី ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ និងលោក John Yu ប្រធានក្រុមហ៊ុន Golden Intergrity International Investment Group។

ឯកឧត្តម ហេង សួរ បានបញ្ជាក់ថា សួនឧស្សាហកម្មដ៏ធំនេះ មានផ្ទៃដីជាង ៥០០ហិកតា ស្ថិតក្នុងខេត្តកំពង់ស្ពឺ ដែលតំណាងឱ្យគម្រោងវិនិយោគសេដ្ឋកិច្ចយុទ្ធសាស្រ្ត ដែលនឹងប្រែក្លាយប្រទេសកម្ពុជាទៅជាមជ្ឈមណ្ឌលផលិតកម្ម និងទីតាំងផ្គត់ផ្គង់ដ៏សំខាន់លើវិស័យឧស្សាហកម្ម បោះពុម្ព ជ្រលក់ពណ៌ និងអេឡិចកូប្លាតីង ស្បែកក្នុងតំបន់អាស៊ាន។

លើសពីនេះ គម្រោងដ៏ធំខាងលើត្រូវបានគេរំពឹងថានឹងបង្កើតការងារថ្មីចន្លោះពី៥ម៉ឺន ទៅ ៦ម៉ឺនកន្លែង សម្រាប់ប្រជាជនពលរដ្ឋកម្ពុជាក្នុងស្រុក ដែលស្របទៅតាមការប្តេជ្ញាចិត្តរបស់រាជរដ្ឋាភិបាលក្នុងការផ្តល់សិទ្ធិអំណាចដល់ប្រជាពលរដ្ឋតាមរយៈការអភិវឌ្ឍជំនាញ និងឱកាសការងារសមរម្យ។ កិច្ចខិតខំប្រឹងប្រែងនេះមានសារៈសំខាន់ណាស់សម្រាប់ការលើកកម្ពស់ជីវភាពគ្រួសារក្នុងតំបន់។

នាឱកាសនោះដែរ ឯកឧត្តម ហេង សួរ ក៏បានអញ្ជើញជាអធិបតី ក្នុងពិធីចុះហត្ថលេខាលើអនុស្សរណៈនៃការយោគយល់គ្នារវាងវិទ្យាស្ថានពហុបច្ចេកទេសកម្ពុជាខេត្តកំពង់ស្ពឺ ជាមួយ អង្គការ Yu Jianqing Charity Organization for Education ផងដែរ។ អនុស្សរណៈនៃការយោគយល់គ្នានេះ មានគោលបំណងបង្កើតនូវកិច្ចសហប្រតិបត្តិការដើម្បីពង្រឹងគុណភាពនៃការអប់រំ និងបង្កើនសមត្ថភាពរបស់បុគ្គលិកនៃវិទ្យាស្ថាន និងជួយគាំទ្រដល់សិស្សនិស្សិត ក្នុងខេត្តកំពង់ស្ពឺ តាមរយៈការផ្តល់ការបណ្តុះបណ្តាល និងផ្តល់ធនធានពាក់ព័ន្ធនានាជូនដល់គ្រូបង្គោល និងសិក្ខាកាមរបស់វិទ្យាស្ថាន៕

គំនិតផ្តួចផ្តើមប្រកបដោយមហិច្ឆតានេះសន្យាថានឹងផ្តល់ផលប្រយោជន៍យូរអង្វែងលើសេដ្ឋកិច្ចក្នុងតំបន់ និងផ្តល់អំណាចដល់សហគមន៍។ សូមរង់ចាំព័ត៌មានថ្មីៗបន្ថែមទៀតអំពីវឌ្ឍនភាពគម្រោងនេះ។