ហ្វីលីពីនឃើញពីសក្ដានុពលនៃវិស័យអប់រំផ្នែកសុខាភិបាលនៅកម្ពុជា ដោយចង់ជំរុញវិស័យនេះឱ្យឈានមុខគេនៅអាស៊ី

• 20 ខែ​កុម្ភៈ 2025
• Uncategorized
• 5 មើល

នៅក្នុងការផ្លាស់ប្តូរដ៏សំខាន់មួយឆ្ពោះទៅរកការលើកកម្ពស់ស្តង់ដារអប់រំផែ្នកសុខាភិបាលនៅកម្ពុជា ក្រុមហ៊ុន World Citi Group ដែលមានមូលដ្ឋាននៅប្រទេសហ្វីលីពីន បានបង្ហាញចំណាប់អារម្មណ៍យ៉ាងខ្លាំងក្នុងការវិនិយោគលើវិស័យអប់រំសុខភាពរបស់កម្ពុជា។ ក្រុមហ៊ុន​មាន​គោល​បំណង​ដាក់​ប្រទេស​កម្ពុជា​ជា​ប្រទេស​ឈាន​មុខ​គេ​ក្នុង​វិស័យ​អប់រំ​ផែ្នកសុខាភិបាលនៅ​ទូទាំង​អាស៊ី។

លោកវេជ្ជបណ្ឌិត Raymond Patrick V. Guico ប្រធានក្រុមហ៊ុន World Citi Group បានលើកឡើងយ៉ាងដូច្នេះក្នុងជំនួបជាមួយសម្តេចនាយករដ្ឋមន្ត្រី ហ៊ុន ម៉ាណែត កាលពីថ្ងៃទី១០ ខែកុម្ភៈ ឆ្នាំ២០២៥។ នាឱកាសនោះលោកបានបង្ហាញអំពីទស្សនៈវិស័យរបស់ក្រុមហ៊ុនក្នុងការជំរុញការអប់រំសុខភាពនៅកម្រិតឧត្តមសិក្សា ដោយសង្កត់ធ្ងន់លើសក្តានុពលសម្រាប់កម្ពុជាក្នុងការឈានទៅរកភាពជោគជ័យក្នុងវិស័យមួយនេះក្នុងតំបន់អាស៊ីនាពេលអនាគត។

គួរបញ្ជាក់ទៀតថា ក្រុមហ៊ុន World Citi Group បានចុះហត្ថលេខាលើអនុស្សរណៈនៃការយោគយល់គ្នាជាមួយសាកលវិទ្យាល័យអាស៊ី-អឺរ៉ុបកម្ពុជា។ កិច្ចព្រមព្រៀងនេះមានគោលបំណងស្វែងរកឱកាសវិនិយោគ និងពង្រីកវត្តមានរបស់ក្រុមហ៊ុននៅក្នុងវិស័យអប់រំ និងបណ្តុះបណ្តាលវិជ្ជាជីវៈ ជាពិសេសទាក់ទងនឹងការអប់រំក្នុងវិស័យសុខាភិបាល។

លោកនាយករដ្ឋមន្ត្រី ហ៊ុន ម៉ាណែត បានគាំទ្រចំពោះបំណងរបស់ក្រុមហ៊ុន ដោយបានកត់សម្គាល់ពីសារៈសំខាន់នៃការជំរុញការអប់រំប្រកបដោយគុណភាព និងស្តង់ដារឧស្សាហកម្ម។ សម្តេចបានលើកទឹកចិត្តឱ្យក្រុមហ៊ុន World Citi Group ចូលរួមយ៉ាងសកម្មជាមួយដៃគូក្នុងស្រុក និងស្ថាប័នពាក់ព័ន្ធរបស់រដ្ឋាភិបាល ជាពិសេសក្រសួងសុខាភិបាល ដែលដើរតួនាទីយ៉ាងសំខាន់ក្នុងការបង្កើតស្តង់ដារគុណភាពសម្រាប់ការអភិវឌ្ឍធនធានមនុស្សក្នុងវិស័យសុខាភិបាល។

ជាការឆ្លុះបញ្ចាំងបន្ថែមទៀតលើកិច្ចខិតខំប្រឹងប្រែងការទូតនាពេលថ្មីៗនេះ លោកបណ្ឌិត Guico ក៏បានរំលឹកពីលទ្ធផលជាវិជ្ជមាននៃវេទិកាធុរកិច្ចកម្ពុជា-ហ្វីលីពីន និងដំណើរទស្សនកិច្ចប្រកបដោយការគួរសមដោយក្រុមប្រឹក្សាធុរកិច្ចហ្វីលីពីនទៅកាន់ប្រទេសកម្ពុជាកាលពីខែមករា ហើយលោកក៏​បាន​ប្រកាស​ពី​ផែនការវិល​ត្រឡប់របស់ប្រតិភូ​ហ្វីលីពីន​ទៅ​កម្ពុជា​វិញ​យ៉ាង​ឆាប់​រហ័ស​ដើម្បី​បន្ត​ការ​ពិភាក្សា​លើ​កិច្ច​សហការ​ដ៏​មាន​សក្តានុពលខាងលើនេះផងដែរ។

សម្ដេចនាយករដ្ឋមន្ត្រីបានសម្តែងការពេញចិត្តចំពោះការវិនិយោគដែលបានស្នើឡើងរបស់ក្រុមហ៊ុន World Citi Group ជាពិសេសលើវិស័យអប់រំសុខភាព និងបណ្តុះបណ្តាលវិជ្ជាជីវៈ ដោយបានពង្រឹងជំនឿថាភាពជាដៃគូយុទ្ធសាស្ត្រនេះនឹងនាំទៅរកអនាគតដ៏រុងរឿងសម្រាប់វិស័យអប់រំផែ្នកសុខាភិបាលនៅកម្ពុជា។

ខណៈដែលប្រទេសជាតិស្វែងរកការពង្រឹងហេដ្ឋារចនាសម្ព័ន្ធអប់រំរបស់ខ្លួន កិច្ចសហការនាពេលខាងមុខត្រូវបានគេរំពឹងថានឹងកំណត់ស្តង់ដារថ្មីក្នុងវិស័យអប់រំសុខភាព ដែលរួមចំណែកបន្ថែមទៀតដល់ការរីកចម្រើន និងការអភិវឌ្ឍន៍របស់កម្ពុជា។