ក្រសួងរ៉ែ បើកការស្នើសុំអាជ្ញាបណ្ណស្វែងរករ៉ែលើទីតាំងចំនួន៨តំបន់

• 15 ខែ​មករា 2020
• Uncategorized
• 3 មើល

ក្រសួងរ៉ែ និងថាមពល បានប្រកាសបើកទទួលពាក្យប្រកួតប្រជែងជាសាធារណៈសម្រាប់ទទួលបានអាជ្ញាបណ្ណស្វែងរុករក ចំពោះតំបន់សម្បទានស្វែងរុករ៉ែចំនួន ៨ តំបន់។

យោងតាមសេចក្តីជូនដំណឹងរបស់ក្រសួងរ៉ែ និងថាមពល ចុះថ្ងៃទី១០ ខែមករា តំបន់ចំនួនប្រាំបី មានផ្ទៃដីស្វែងរុករករ៉ែ សរុបចំនួន ១ ៣៩០ គីឡូម៉ែត្រការ៉េ ស្ថិតនៅក្នុងខេត្ត ស្ទឹងត្រែង ព្រះវិហារ កំពង់ធំ សៀមរាប និងមណ្ឌលគីរី។

ក្រសួងបញ្ជាក់ថា បណ្តាក្រុមហ៊ុនជាតិ និងអន្តរជាតិ អាចដាក់ពាក្យស្នើសុំអាជ្ញាបណ្ណស្វែងរុករករ៉ែ ចាប់ពីពេលជូនដំណឹង រហូតដល់ ថ្ងៃទី១៥ ខែកុម្ភៈ ឆ្នាំ២០២០ ហើយលទ្ធផលនៃក្រុមហ៊ុនដែលនឹងទទួលបានអាជ្ញាបណ្ណ នឹងត្រូវប្រកាសជាសាធារណៈ បន្ទាប់ពីបានអនុវត្តតាមនីតិវិធីចប់សព្វគ្រប់។

ឯកឧត្តម យស មុនីរ៉ាត់ អគ្គនាយកធនធានរ៉ែនៃក្រសួងរ៉ែ និងថាមពល បានឪ្យដឹងថា ការប្រកួតប្រជែងជាសាធារណៈ ស្នើសុំអាជ្ញាបណ្ណស្វែងរុករករ៉ែនេះគឺត្រូវបានធ្វើឡើងជាបន្តបន្ទាប់។

បច្ចុបន្បន្ននេះ ក្រុមហ៊ុនចំនួនជាង ៣០ក្រុមហ៊ុនបានទទួលអាជ្ញាបណ្ណស្វែងរុករករ៉ែ រួចហើយ ដែលភាគច្រើននៃក្រុមហ៊ុនទទួលអាជ្ញាបណ្ណនេះ គឺជាក្រុមហ៊ុនអន្តរជាតិ។

ឯកឧត្តម យស មុនីរ៉ាត់ បញ្ជាក់ថា ក្នុងចំណោមក្រុមហ៊ុនទទួលអាជ្ញាបណ្ណកន្លងមក មានក្រុមហ៊ុនមួយចំនួន បានសិក្សាឃើញសក្កានុពលអាចវិនិយោគបាន។

ឯកឧត្តម យស មុនីរ៉ាត់ ថ្លែងថា៖ “ការបើកអោយប្រកួតប្រជែងស្នើសុំអាជ្ញាបណ្ណស្វែងរុករករ៉ែ គឺផ្តោតទៅលើការស្វែងរុករករ៉ែ ប្រភេទលោហធាតុ ហើយកន្លងមកមានក្រុមហ៊ុនដែលទទួលបានអាជ្ញាបណ្ណស្វែងរុករករ៉ែកន្លងមក បានបង្ហាញពីសក្កានុពលលើការស្វែងរុករករ៉ែ”។

គួរបញ្ជា្កក់ថា បច្ចុប្បន្នក្រុមហ៊ុន Renaissance Minerals (Cambodia) ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Emerald Resources NL បានទទួលអាជ្ញាបណ្ណធ្វើអាជីវកម្មរ៉ែ នៅឆ្នាំ២០១៨ ហើយក្រុមហ៊ុនគ្រោងចាប់ផ្តើមដំណើរការរុករករ៉ែមាសនៅស្រុកកែវសីមា ខេត្តមណ្ឌលគីរី៕