គម្រោងសង់ស្ពានឆ្លងកាត់ទន្លេបាសាក់(ចាក់អង្រែក្រោម-ព្រែកប្រា)សម្រេចបាន ៤១%

• 20 ខែ​សីហា 2025
• Uncategorized
• 4 មើល

គិតមកទល់ពេលនេះ គម្រោងសាងសង់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) សម្រេចបាន ៤១% ហើយអាចនឹងបញ្ចប់មុនផែនការដែលបានគ្រោងទុក។ នេះបើយោងតាមអ្នកនាំពាក្យក្រសួងសាធារណការ និងដឹកជញ្ជូន លោក ផន រឹម នៅថ្ងៃទី១៩ ខែមេសា ឆ្នាំ២០២៥។

លោក ផន រឹម បន្តថា ពេលនេះការដ្ឋានសាងសង់ស្ពាន កំពុងតែមមាញឹកខ្លាំង ដោយគោរពតាមបទដ្ឋានបច្ចេកទេស និងកិច្ចសន្យាបច្ចេកទេស ប្រកបដោយគុណភាព និងសោភណ័្ឌភាព។ ជាក់ស្តែង លោកថា គិតត្រឹមដើមខែសីហា ឆ្នាំ២០២៥នេះ ការងារសាងសង់មានរយៈពេល ១៧ខែហើយ សម្រេចលទ្ធផលបាន ៤១% នៃផែនការសរុបដែលមានរយៈពេលសាងសង់ ៤២ខែ ដោយមិនមានការយឺតយ៉ាវជាងផែនការដែលបានគ្រោងទុកនោះទេ។ គម្រោងនេះ ត្រៀមបញ្ចប់នៅដើមឆ្នាំ២០២៨ ខាងមុខ។

លោកបន្តថា បច្ចុប្បន្នការងារសង់ស្ពានផ្នែកខាងកើតសម្រេចបាន ដូចជា៖ ១)ផ្នែកគ្រឹះស្ពាន សម្រេចបានប្រមាណ ៦១,៥០% ក្នុងនោះសសរគ្រឹះចំនួន ១៥៦ដើម សម្រេចបាន ១៣៧ដើម ២០ជើងតាង សម្រេចបានចំនួន៩ និងធ្នឹមភ្ជាប់ក្រោមចំនួន១២ សម្រេចបាន៨ធ្នឹម។ ២) រចនាសម្ព័ន្ធក្រោមស្ពានសម្រេចបាន២៦,១២% រួមមាន៖ តួសរសរស្ពានចំនួន១២ សម្រេចបាន ៦សរសរ, សរសរស្ពាន ៥២ សម្រេចបាន២៤, ធ្នឹមភ្ជាប់ក្បាលសរសរទទឹងស្ពានចំនួន៣៤ សម្រេចបាន១០ធ្នឹម និងការងារសំខាន់ៗមួយចំនួនទៀត។

គួរបញ្ជាក់ថា ស្ពាននេះ ត្រូវបានបើកការដ្ឋានសាងសង់ជាផ្លូវការកាលពីថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់សម្តេចនាយករដ្ឋមន្ត្រី ហ៊ុន ម៉ាណែត និងឯកឧត្តម វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។ ពេលសាងសង់រួចស្ពាននេះនឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្សឆ្លងកាត់ទន្លេបាសាក់ ភ្ជាប់ផ្លូវជាតិលេខ១ ខណ្ឌច្បារអំពៅ ព្រមទាំងជួយពង្រឹងដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិតេជោក្រុងតាខ្មៅថែមទៀត៕ (អានបន្ថែម)