ចិន ប្រកាសជួយកម្ពុជា ពង្រឹងទំនាក់ទំនងក្នុងវិស័យទេសចរណ៍ វប្បធម៍ និងការវិនិយោគ

• 12 ខែ​សីហា 2025
• ព័ត៌មានក្នុងស្រុក
• 4 មើល

មន្ទីរពាណិជ្ជកម្មខេត្ត Shanxi នៃប្រទេសចិន បានបង្ហាញការប្តេជ្ញាចិត្តថា នឹងជួយជំរុញកិច្ចសហប្រតិបត្តិការជាមួយកម្ពុជា លើវិស័យទេសចរណ៍ វប្បធម៍ និងការវិនិយោគឱ្យកាន់តែប្រសើរឡើងថែមទៀត។ នេះបើតាមជំនួបពិភាក្សារវាងលោក ង៉ូវ សេងកាក់ អភិបាលរងខេត្តសៀមរាប ជាមួយនឹងគណៈប្រតិភូខេត្តShanxi នៃសាធារណរដ្ឋប្រជាមានិតចិនដឹកនាំដោយ លោក Wang Hongjin ប្រធានមន្ទីរពាណិជ្ជកម្មខេត្ត Shanxi នៅថ្ងៃទី០៦ ខែសីហា ឆ្នាំ២០២៤។

នាឱកាសនោះ លោក Wang Hongjin បានបង្ហាញពីគោលបំណង នៃដំណើរទស្សនកិច្ចនៅខេត្តសៀមរាប ដើម្បីពិភាក្សាអំពីការប្តេជ្ញាក្នុងការជំរុញកិច្ចសហប្រតិបត្តិការ វិស័យទេសចរណ៍ វប្បធម៍ និងការវិនិយោគ ក៏ដូចជាការផ្ដល់អាហារូបករណ៍ជូនដល់សិស្ស និស្សិតខេត្តសៀមរាបឱ្យមានឱកាសទៅសិក្សានៅខេត្ត Shanxi ប្រទេសចិន។

ជាការឆ្លើយតប លោក ង៉ូវ សេងកាក់ បានស្វាគមន៍ និងគាំទ្រនូវកិច្ចការសហការដើម្បីការអភិវឌ្ឍន៍ ខណៈលោក​សង្ឃឹមយ៉ាងមុតមាំថា ទំនាក់ទំនងកិច្ចសហប្រតិបត្តិការ និងការផ្លាស់ប្ដូរទៅវិញទៅមករវាងប្រទេសទាំងពីរ នឹងធ្វើឱ្យមានការអភិវឌ្ឍរួមគ្នាកាន់តែប្រសើរ។

ពាក់ព័ន្ធនឹងប្រទេសចិននេះដែរ ក្នុងជំនួបជាមួយក្រសួងទេសចរណ៍ កាលថ្ងៃទី២៩ កក្កដា ឆ្នាំ២០២៥ប្រតិភូទីក្រុង Beihai នៃតំបន់ស្វយ័តក្វាងស៊ីនៃសាធារណរដ្ឋប្រជាមានិតចិន ក៏បានមកស្វែងរកកិច្ចសហការជាមួយក្រសួងទេសចរណ៍ ដើម្បីជំរុញការប្រើប្រាស់បញ្ញាសិប្បនិម្មិត (AI) សម្រាប់ការអភិវឌ្ឍទេសចរណ៍កម្ពុជាឱ្យកាន់តែខ្លាំងឡើងផងដែរ។ (អានបន្ថែម)

គួរបញ្ជាក់ថា ក្នុងចំណោមប្រភពទុនវិនិយោគដែលឈរលើលំដាប់ខ្ពស់បំផុតនៅកម្ពុជា ក្នុងឆមាសទី១ ឆ្នាំ២០២៥នេះ គឺ ចិន ដែលមានទុនវិនិយោគរជាង ៥២%។ នេះបើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) ដែលផ្សាយនៅថ្ងៃទី០៧​ ខែកក្កដា ឆ្នាំ២០២៥៕ (អានបន្ថែម)