English 
ខ្មែរ 
តួនាទីរបស់អ្នកគ្រប់គ្រងគម្រោងសំណង់ត្រូវបានបកស្រាយពន្យល់
ដំណើរការនៃការអភិវឌ្ឍន៍គម្រោងចាប់តាំងពីចំណុចដំបូងរហូតដល់បញ្ចប់ ត្រូវមានការចូលរួមពីកម្លាំងពលកម្មរាប់រយនាក់។ ក្នុងចំណោមកម្លាំងពលកម្មទាំងនោះ អ្នកគ្រប់គ្រងគម្រោង គឺជាមនុស្សម្នាក់ក្នុងចំណោមមនុស្សសំខាន់ៗដែលជាអ្នកធ្វើឲ្យគម្រោងនេះលេចចេញជារូបរាងពិតប្រាកដ។ ដើម្បីស្វែងយល់បន្ថែមអំពីតួនាទី និងការទទួលខុសត្រូវរបស់អ្នកគ្រប់គ្រងគម្រោង ទស្សនាវដ្តីសំណង់ និងអចលនទ្រព្យ បានធ្វើបទសម្ភាសន៍ជាមួយលោក ជិន ហុក ប្រធាននាយកប្រតិបត្តិទីក្រុងកោះពេជ្រដែលគ្រប់គ្រងការអភិវឌ្ឍអចលនទ្រព្យច្រើនជាង១០គម្រោង នៅលើទឹកដីកោះពេជ្រនេះ។
លោក ហុក មានសញ្ញាប័ត្រអនុបណ្ឌិតផ្នែកវិស្វកម្មសំណង់ស៊ីវិលមកពីប្រទេសជប៉ុន ហើយបានធ្វើការនៅក្នុងឧស្សាហកម្មសំណង់នេះចាប់តាំងពីឆ្នាំ ២០០៦ និងត្រូវបានតែងតាំងជាអ្នកគ្រប់គ្រងគម្រោងសម្រាប់គម្រោងនានានៅលើកោះពេជ្រចាប់តាំងពីឆ្នាំ ២០១០។
អគារខុនដូ The Riviera សណ្ឋាគារ Toyoko Inn ស្ពានមេអំបៅ និងស្ពានភ្លោះ គឺសុទ្ធតែជាសមិទ្ធិផលដែលលេចធ្លោខ្លះៗរបស់លោកនៅលើកោះពេជ្រនោះ ដែលនាំមុខខាងផ្នែកអចលនទ្រព្យនៅទីក្រុងភ្នំពេញ។
តើមានជំហានអ្វីខ្លះដែលពាក់ព័ន្ធនឹងការអភិវឌ្ឍន័គម្រោងមួយចាប់ពីចំណុចចាប់ផ្តើមរហូតដល់បញ្ចប់? ហើយតើអ្នកគ្រប់គ្រងគម្រោងមានតួនាទីនៅត្រង់ជំហានណាខ្លះ?
ដើម្បីធ្វើឲ្យគម្រោងមួយលេចចេញជារូបរាងពិតប្រាកដ ត្រូវការមានជំហាននានាជាច្រើន ចាប់ផ្តើមពីការចុះសិក្សាការដ្ឋាន ការរចនាប្លង់បឋម ការធ្វើផែនការគម្រោងដែលកំណត់ពីជំហាននៃការសាងសង់ ថវិកា និងរយៈពេល គំនូសប្លង់មេនៅក្នុងប្រព័ន្ធកុំព្យូទ័រ ដំណាក់កាលសាងសង់ដែលបែងចែកជាការងារគ្រឹះ ការវិភាគដី រចនាសម្ព័ន្ធការងារ ការងារស្ថាបត្យកម្ម និងការបញ្ចប់ការសាងសង់ ហើយដំណាក់កាលចុងក្រោយ គឺការប្រគល់គម្រោងទៅឲ្យអតិថិជន។ តួនាទីរបស់អ្នកគ្រប់គ្រងគម្រោង ជាធម្មតាចាប់ផ្តើមពីដំណាក់កាលធ្វើផែនការគម្រោង បន្តរហូតដល់គម្រោងនេះត្រូវបានបញ្ចប់ និងប្រគល់សមិទ្ធិផលទៅឲ្យអតិថិជន។
តួនាទីរបស់អ្នកគ្រប់គ្រងគម្រោងខុសគ្នាទៅតាមលក្ខណៈនៃក្រុមហ៊ុន។ ចំពោះក្រុមហ៊ុន OCIC ដែលជាក្រុមហ៊ុនអភិវឌ្ឍន៍ និងក្រុមហ៊ុនសាងសង់គម្រោងនៅកោះពេជ្រ អ្នកគ្រប់គ្រងគម្រោងមានការពាក់ព័ន្ធទាំងនៅក្នុងដំណាក់កាលចុះសិក្សាការដ្ឋានពីលទ្ធភាពសាងសង់ ដោយមានផ្នែកសិក្សារចនាប្លងត្រូវទទួលបន្ទុកក្នុងកិច្ចការនេះ។ នៅទីនេះ អ្នកគ្រប់គ្រងគម្រោងជាអ្នកធ្វើឲ្យគម្រោងចាប់ផ្តើមដំណើរការពីដំណាក់កាលធ្វើផែនការគម្រោង ដែលរួមបញ្ចូលទាំងការរៀបចំថវិកា រយៈពេលការគ្រប់គ្រងគម្រោង និងតារាងអង្គការចាត់តាំងការងារ ជាដើម។ បន្ទាប់ពីផែនការគម្រោងត្រូវបានអនុម័ត អ្នកគ្រប់គ្រងគម្រោងអាចចាប់ផ្តើមរៀបចំការដ្ឋាន និងបន្ទាប់មកចាប់ផ្តើមការសាងសង់។ ប៉ុន្តែខ្ញុំគិតថាអ្នកគ្រប់គ្រងគម្រោង គួរតែចូលរួមក្នុងគ្រប់កិច្ចការដែលទាក់ទងទៅនឹងគម្រោងនេះ ដោយសារគេនឹងទទួលខុសត្រូវកិច្ចការនេះចាប់តាំងពីដំណាក់កាលគ្រោងជាគំនិត និងមានបទពិសោធន៍ច្រើននៅក្នុងវិស័យសំណង់ ដើម្បីអាចផ្តល់នូវអនុសាសន៍ល្អៗនៅដំណាក់កាលរចនាប្លង់គម្រោង។
អ្នកគ្រប់គ្រងគម្រោង ក៏មិនត្រូវមើលរំលងបញ្ហាការលក់ និងទីផ្សាររបស់គម្រោងនោះដែរ។ ទោះយ៉ាងណា អ្នកគ្រប់គ្រងគម្រោងក៏ត្រូវការការសម្របសម្រួលជាមួយក្រុមផ្នែកលក់ និងទីផ្សារ នៅពេលដែលមានការកក់ទិញពីអតិថិជនលើផ្នែកណាមួយនៃគម្រោង និងត្រូវបង្កើនល្បឿនសាងសង់ដើម្បីអាចប្រគល់ទៅឲ្យអតិថិជន។
ចំពោះគម្រោងផ្សេងទៀតដែលក្នុងនោះក្រុមហ៊ុនអភិវឌ្ឍន៍ និងក្រុមហ៊ុនម៉ៅការសាងសង់មិនមែនជាក្រុមហ៊ុនតែមួយ ដែលតម្រូវឲ្យមានការដេញថ្លៃដើម្បីជ្រើសរើសអ្នកម៉ៅការសាងសង់ អ្នកគ្រប់គ្រងគម្រោងរបស់ក្រុមហ៊ុនសាងសង់ គឺជាអ្នករៀបចំកញ្ចប់ឯកសារដេញថ្លៃ ដែលមានលក្ខណៈស្រដៀងគ្នាទៅនឹងការធ្វើផែនការគម្រោងផងដែរ។
បន្ទាប់ពីលោកត្រូវបានចាត់ឲ្យធ្វើជាអ្នកគ្រប់គ្រងគម្រោងអភិវឌ្ឍន៍ តើអ្វីខ្លះជាមូលដ្ឋានដែលលោកត្រូវគិតដល់ និងធ្វើសកម្មភាព?
ក្នុងនាមជាអ្នកគ្រប់គ្រងគម្រោង យើងត្រូវគិតដល់អ្វីគ្រប់យ៉ាងដែលទាក់ទងទៅនឹងគម្រោងនេះ ប៉ុន្តែអ្វីដែលជាមូលដ្ឋានត្រូវគិតនោះគឺ ការសិក្សាពីទីតាំងនៃគម្រោង សិក្សាពីគោលគំនិត និងការរចនាប្លង់បឋមនៃគម្រោង ដើម្បីពិនិត្យមើលថាគម្រោងនេះអាចសាងសង់បានដែរឬទេ ដែលរួមបញ្ចូលការចុះសិក្សាការដ្ឋានដើម្បីមើលថាតើយើងអាចបញ្ចប់គម្រោងនេះនៅក្នុងទំហំថវិកាដែលមាន និងរយៈពេលដែលបានកំណត់ដែរឬទេ ព្រមទាំងមើលថាសំណង់មានគុណភាពខ្ពស់ឬ អត់។
តើអ្វីទៅជាតួនាទីប្រចាំថ្ងៃរបស់អ្នកគ្រប់គ្រងគម្រោងចំពោះគម្រោងសាងសង់មួយ?
ចំពោះតួនាទីប្រចាំថ្ងៃ អ្នកគ្រប់គ្រងគម្រោងត្រូវធានាថាការងារទាំងអស់ប្រព្រឹត្តទៅយ៉ាងរលូន និងត្រូវធានាថាអ្នកដែលពាក់ព័ន្ធនឹងគម្រោងទាំងអស់ដឹងពីអ្វីដែលត្រូវធ្វើ និងមានភាពសកម្មយ៉ាងពេញលេញក្នុងការងារប្រចាំថ្ងៃដើម្បីបំពេញតាមគោលដៅរបស់គម្រោង។ អ្នកគ្រប់គ្រងគម្រោងត្រូវពិនិត្យតាមដាន និងអនុម័តលើកិច្ចការទាំងអស់នៅក្នុងគម្រោង មិនថាអ្នកណាជាអ្នករៀបចំ ឬគ្រប់គ្រងនោះទេ។ អ្នកគ្រប់គ្រងគម្រោងត្រូវធានាឲ្យបាននូវចំណុចសំខាន់បីរបស់គម្រោងនោះគឺ ថវិកា ពេលវេលា និងគុណភាព។
តើលោករាយការណ៍អំពីការងាររបស់លោកទៅតែចំពោះក្រុមហ៊ុនទទួលម៉ៅការសាងសង់ ឬក្រុមហ៊ុនអភិវឌ្ឍគម្រោងដែរ ?
ការរាយការណ៍អំពីការងារគម្រោងសាងសង់មួយ មានកម្រិតខុសៗគ្នា។ ប្រធានក្រុមកម្មករ និងវិស្វករសំរាប់អង្គភាពនីមួយៗ ត្រូវបានរាយការណ៍ជាប្រចាំថ្ងៃទៅកាន់អ្នកគ្រប់គ្រងគម្រោង ប៉ុន្តែអ្នកគ្រប់គ្រងការដ្ឋាន ត្រូវដាក់ជូនរបាយការណ៍វឌ្ឍភាពការងារប្រចាំសប្តាហ៍ ដែលធ្វើការសង្ខេបពីវឌ្ឍនភាពការងារ និងផែនការរបស់ខ្លួនទៅកាន់អ្នកគ្រប់គ្រងគម្រោង។ អ្នកគ្រប់គ្រងគម្រោងត្រូវដាក់ជូនរបាយការណ៍វឌ្ឍនភាពការងារតាមកាលកំណត់ ដែលជាធម្មតាម្តងក្នុងមួយខែ ទៅក្រុមហ៊ុនម៉ៅការសាងសង់ និងក្រុមហ៊ុនអភិវឌ្ឍគម្រោង។
ដោយសារថាអ្នកគ្រប់គ្រងគម្រោងស្ថិតនៅក្រោមការណែនាំដោយផ្ទាល់របស់ក្រុមហ៊ុនម៉ៅការសាងសង់ ដូចនេះមិនមានការបញ្ជាដោយផ្ទាល់ពីក្រុមហ៊ុនអភិវឌ្ឍគម្រោងនោះទេ។ នៅក្នុងករណីដែលក្រុមហ៊ុនអភិវឌ្ឍគម្រោង និងក្រុមហ៊ុនម៉ៅការសាងសង់ ជាក្រុមហ៊ុនពីរផ្សេងគ្នា ពេលខ្លះក្រុមហ៊ុនអភិវឌ្ឍគម្រោងស្នើសុំព័ត៌មានពីអ្នកគ្រប់គ្រងគម្រោងទាក់ទងនឹងរយៈពេល វឌ្ឍនភាពការងារ និងថវិកា។
តើលោកអាចពន្យល់ខ្លះៗពីបញ្ហាប្រឈម និងការលំបាកដែលជាអ្នកគ្រប់គ្រងគម្រោងជាធម្មតាតែងជួបប្រទះ?
នៅក្នុងករណីក្រុមហ៊ុន OCIC បញ្ហាប្រឈមសំខាន់ៗសម្រាប់អ្នកគ្រប់គ្រងគម្រោង គឺភាពយឺតយ៉ាវក្នុងការទិញសម្ភារសំណង់ និងឧបករណ៍ដែលបម្រើឲ្យការងារសាងសង់ ហើយធ្វើឲ្យគម្រោងមិនអាចបញ្ចប់ទាន់ពេលវេលា ដោយសារតែដំណើរការយឺតយ៉ាវក្នុងការបញ្ជាទិញ និងដឹកជញ្ជូនសមា្ភរទៅកាន់ការដ្ឋានសំណង់។ ការកែតម្រូវការរចនាប្លង់គម្រោងនៅពាក់កណ្តាលដំណើរការសាងសង់ក៏បង្កជាការលំបាកមួយទៀតផងដែរ ដោយអ្នកគ្រប់គ្រងគម្រោងនឹងប្រឈមមុខនឹងសម្ពាធខាងពេលវេលា ហើយតម្រូវការខាងរៀបចំឯកសារជាច្រើន ក៏ជារឿងឈឺក្បាលមួយទៀតសម្រាប់អ្នកគ្រប់គ្រងគម្រោងផងដែរ។
ក្នុងនាមជាអ្នកគ្រប់គ្រងគម្រោង តើលោកគ្រាន់តែអនុវត្តតាមផែនការមេរបស់គម្រោង ដែលរចនាប្លង់ឡើងដោយក្រុមស្ថាបត្យករ និងវិស្វករ ឬលោកអាចពិនិត្យមើលការរចនាប្លង់ និងលើកឡើងពីការកែតម្រូវក្នុងអំឡុងពេលដំណើរការសាងសង់ដែរ?
ការពិនិត្យមើលនូវផែនការមេដែលរចនាប្លង់ឡើងដោយស្ថាបត្យករ និងវិស្វករ ដើម្បីមើលថាតើវាមានភាពត្រឹមត្រូវ ឬអត់នោះ គឺជាផ្នែកមួយនៃតួនាទីសំខាន់ៗរបស់អ្នកគ្រប់គ្រងគម្រោង។ ប្រសិនបើយើងរកឃើញថាមានបញ្ហា យើងអាចស្នើសុំការកែតម្រូវ។ ក្នុងនាមជាអ្នកគ្រប់គ្រងគម្រោងខុនដូ Riviera ខ្ញុំធ្លាប់បានស្នើសុំឲ្យផ្លាស់ប្តូរការរចនាដំបូល Riviera Plaza ដើម្បីសន្សំសំចៃថវិកា ព្រមទាំងភាពស្រស់ស្អាតរបស់ផ្សារទំនើប ហើយក្រុមស្ថាបត្យករ និងវិស្វករក៏បានព្រមព្រៀងគ្នាជាមួយខ្ញុំផងដែរ។
តើមានជំនាញវិជ្ជាជីវៈ និងសមត្ថភាពអ្វីខ្លះដែលអ្នកគ្រប់គ្រងគម្រោងគួរមាន? ហើយតើតួនាទីនេះត្រូវការវិញ្ញាបនបត្រជាក់លាក់បញ្ជាក់ពីរដ្ឋាភិបាល ឬទីភ្នាក់ងារណាមួយ ឬតម្រូវការជាក់លាក់ណាមួយ ឬទេ?
ដើម្បីក្លាយជាអ្នកគ្រប់គ្រងគម្រោងប្រកបដោយសមត្ថភាព អ្នកគ្រប់គ្រងគម្រោងត្រូវតែមានការសិក្សាល្អនៅក្នុងវិស័យសាងសង់ដែលអាចជាការរចនាស្ថាបត្យកម្ម និងវិស្វកម្ម។ បន្ទាប់មក អ្នកគ្រប់គ្រងគម្រោង ត្រូវតែមានបទពិសោធន៍យ៉ាងទូលំទូលាយនៅក្នុងមុខដំណែងជាច្រើនពាក់ព័ន្ធនឹងគម្រោងសាងសង់ ដើម្បីឲ្យពួកគេអាចពិនិត្យមើលការងារ និងសម្រេចចិត្តបានឆាប់រហ័ស ដោយមិនចាំបាច់ពឹងផ្អែកខ្លាំងលើអ្នកជំនាញ។ សម្រាប់ភាពជាអ្នកដឹកនាំ វាគ្រាន់តែជាជំនាញរបស់បុគ្គលម្នាក់ៗ ប៉ុន្តែការដែលអ្នកគ្រប់គ្រងគម្រោងមានជំនាញនេះគឺល្អ ដើម្បីឲ្យពួកគេអាចធានាបាននូវប្រសិទ្ធិភាពធ្វើការងារជាក្រុមដោយគ្មានបញ្ហាគ្រប់គ្រង។
នៅប្រទេសកម្ពុជា មិនមានលក្ខណៈ ឬលក្ខខណ្ឌតម្រូវតាមច្បាប់ ដើម្បីក្លាយជាអ្នកគ្រប់គ្រងគម្រោងនោះទេ។ ដំណែងនេះជាការតែងតាំងពីអ្នកម៉ៅការសាងសង់ ឬក្រុមហ៊ុន បន្ទាប់ពីមានការទទួលស្គាល់នូវការធ្វើការងាររបស់បុគ្គលនោះ។ ទោះជាយ៉ាងណាមានតែគណៈស្ថាបត្យករកម្ពុជា និងគណៈវិស្វករកម្ពុជា ដែលស្ថាបត្យករ និងវិស្វករ អាចចុះឈ្មោះវិជ្ជាជីវៈជាវិស្វករ និងស្ថាបត្យកររបស់ខ្លួន ដោយមានការទទួលស្គាល់ពីរដ្ឋាភិបាល។
តើអ្នកគ្រប់គ្រងគម្រោងត្រូវតែមានសាវតាមកពីផ្នែកស្ថាបត្យកម្ម ឬផ្នែកវិស្វកម្ម ឬយ៉ាងណា? ហើយហេតុអ្វី? តើលោកគិតថា សាកលវិទ្យាល័យកម្ពុជាអាចផលិតអ្នកគ្រប់គ្រងគម្រោងមានលក្ខណៈសម្បត្តិគ្រប់គ្រាន់ដែរ ឬទេ?
ទាំងស្ថាបត្យករ និងវិស្វករអាចត្រូវបានតែងតាំងជាអ្នកគ្រប់គ្រងគម្រោង។ អាជីពទាំងពីរនេះខុសគ្នាតិចតួចប៉ុណ្ណោះនៅក្នុងការសិក្សា និងជំនាញ ប៉ុន្តែទាំងស្ថាបត្យករ និងវិស្វករត្រូវធ្វើការនៅការដ្ឋានរបស់គម្រោងជាច្រើនឆ្នាំ។ ពួកគេនឹងត្រូវរៀនជំនាញពីគ្នាទៅវិញទៅមក ដូច្នេះនៅពេលដែលពួកគេណាម្នាក់ក្លាយជាអ្នកគ្រប់គ្រងគម្រោង នោះពួកគេនឹងទទួលបានទាំងបទពិសោធន៍ស្ថាបត្យកម្ម និងវិស្វកម្ម។
នៅក្នុងប្រទេសកម្ពុជា មិនមានសាលារៀនដែលធ្វើការបណ្តុះបណ្តាលសិស្ស-និស្សិតធ្វើជាអ្នកគ្រប់គ្រងគម្រោងនោះទេ។ ក្នុងបណ្តាប្រទេសផ្សេងទៀត មានសាលាដែលផ្តល់ការបង្រៀននូវជំនាញគ្រប់គ្រងសំណង់ ប៉ុន្តែខ្ញុំមិនគិតថានឹងមានជំនាញប្រភេទនេះនៅតាមសាលាវិស្វកម្មនៅក្នុងប្រទេសកម្ពុជានៅឡើយទេ។ តាមការសង្កេតមើលរបស់ខ្ញុំ ក្នុងចំណោមនិស្សិតបញ្ចប់ការសិក្សាជាច្រើនដែលមកពីសាកលវិទ្យាល័យផ្នែកវិស្វកម្មនៅកម្ពុជា មានតែពីរបីនាក់ក្នុងចំណោមពួកគេប៉ុណ្ណោះ ដែលអាចធ្វើការជាស្ថាបត្យករ និងវិស្វករយ៉ាងពេញសមត្ថភាព។ ឥឡូវនេះមានស្ថាបត្យករ និងវិស្វករដែលខ្វះគុណភាព និងបទពិសោធន៍ជាច្រើន។
តើលោកសង្កេតឃើញអ្វីខ្លះអំពីការអនុវត្តន៍ខុសឆ្គងជាញឹកញាប់របស់អ្នកគ្រប់គ្រងគម្រោងមួយចំនួននៅក្នុងប្រទេសកម្ពុជា?
ជាទូទៅ ខ្ញុំកត់សម្គាល់ឃើញថា អ្នកគ្រប់គ្រងគម្រោងមួយចំនួននៅប្រទេសកម្ពុជាខ្វះខាតជំនាញធ្វើផែនការគម្រោង។ ខ្ញុំមើលឃើញថា អ្នកគ្រប់គ្រងគម្រោងបរទេស ឬក្រុមហ៊ុនម៉ៅការបរទេសចូលមកធ្វើការងារគម្រោងនៅក្នុងប្រទេសកម្ពុជា ជាធម្មតាចំណាយថវិកា និងពេលវេលាធ្វើការសិក្សាយ៉ាងហ្មត់ចត់លើគម្រោង ដើម្បីវិភាគរកផលប៉ះពាល់ និងដោះស្រាយបញ្ហាទាំងនោះមុនពេលការសាងសង់ចាប់ផ្តើម ប៉ុន្តែសម្រាប់អ្នកគ្រប់គ្រងគម្រោង ឬក្រុមហ៊ុនសាងសង់កម្ពុជាវិញ ពួកគេចាប់ផ្តើមសាងសង់ជាមុន ហើយដោះស្រាយបញ្ហានៅពេលកំពុងដំណើរការធ្វើការងារ។
តើលោកមានអនុសាសន៍អ្វីខ្លះដល់សិស្ស-និស្សិត ឬអ្នកដែលមានបំណងចង់ក្លាយជាអ្នកគ្រប់គ្រងគម្រោង?
សម្រាប់អនុសាសន៍របស់ខ្ញុំ ពួកគេគួរតែរក្សាការខិតខំប្រឹងប្រែងធ្វើការ ផ្តោតលើសេចក្ដីលម្អិតនៃការងារ និងរៀនសូត្រពីបទពិសោធការងារ និងកំហុសឆ្គង ព្រមទាំងបន្តការរៀននូវអ្វីដែលថ្មីៗ និងជំនាញថ្មីៗ។ ប្រសិនបើពួកគេអាចបង្កើនជំនាញទាំងអស់នេះ ពួកគេនឹងធ្វើឲ្យប្រសើរឡើងនូវសមត្ថភាពរបស់ពួកគេផងដែរ។