ត្រីមាសទី១-២០២៤ កំពង់ផែក្រុងព្រះសីហនុ មានកុងតឺន័រឆ្លងកាត់រហូត ២៤ម៉ឺនTEUs កើន ២៣%

• 2 ខែ​ឧសភា 2024
• Uncategorized
• 3 មើល

គិតត្រឹមរយៈពេល១៤សប្តាហ៍ ឬប្រមាណ៩៨ថ្ងៃដំបូង ក្នុងឆ្នំា២០២៤ កំពង់ផែស្វយ័តក្រុងព្រះសីហនុមានកុងតឺន័រឆ្លងកាត់ចំនួន ២៤ម៉ឺនTEUs កើនឡើងជាង ២៣ភាគរយ បើប្រៀបធៀបនឹងរយៈពេលដូចគ្នាកាលពីឆ្នំា២០២៣ កន្លងទៅ។

នេះបើតាមប្រសាសន៍របស់ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូន ថ្លែងក្នុងពិធីសំណេះ​សំណាលជាមួយមន្ត្រីរាជការ បុគ្គលិក កម្មករនិយោជិតកំពង់ផែស្វយ័តក្រុងព្រះសីហនុ ក្នុងឱកាសអបអរសាទរខួបអនុស្សាវរីយ៍លើកទី១៣៨ នៃទិវាពលកម្មអន្តរជាតិ ថ្ងៃទី១ ឧសភា ២០២៤។

នាឱកាសនោះ ឯកឧត្តបានឱ្យដឹងថា បច្ចុប្បន្នកំពង់ផែស្វយ័តក្រុងព្រះសីហនុ មានមន្ត្រីរាជការ បុគ្គលិក កម្មករ និយោជិត សរុបចំនួន ១.៣៥៥នាក់ (ក្នុងនោះមានស្ត្រី ១៣១នាក់) ហើយបើគិតក្នុងរយៈពេល ១៤សប្តាហ៍ដំបូងក្នុងឆ្នាំ២០២៤នេះ មានបរិមាណកុងតឺន័រឆ្លងកាត់ចំនួនប្រមាណ ២៤ម៉ឺនTEUS កើនឡើង ២៣,៤៨% ធៀបនឹងរយៈពេលដូចគ្នាឆ្នាំ២០២៣ ដែលតួលេខនេះបានបង្ហាញពីសន្ទុះប្រកប ដោយភាពរឹងមាំសម្រាប់ឆ្នាំ២០២៤។

គួរបញ្ជាក់ថា កាលពីឆ្នាំ២០២៣កន្លងទៅ កំពង់ផែខាងលើនេះ ទទួលបានបរិមាណកុងតឺន័រឆ្លងកាត់ សរុបចំនួនជិត ៨០ម៉ឺនTEUS កើនឡើង ៦,៣៥% បើប្រៀបធៀបទៅនឹងរយៈពេលដូចគ្នាឆ្នាំ២០២២ និងមានចំណូលអាជីវកម្មសរុបប្រមាណជាង ៩៥លានដុល្លារ កើនឡើង ៥,៤២%។ ជាមួយគ្នានេះដែរ កាលពីឆ្នាំ២០២៣ ក៏ទទួលបាននាវាឆ្លងកាត់កំពង់ផែចំនួន ១.៥០៦គ្រឿង កើនឡើង ៤,៤៤% និងចំណុះផ្ទុកនាវា មានរហូតដល់ប្រមាណជាង ១៩លានតោន ដែលមានកំណើនខ្ពស់រហូតដល់ ៣៥,៤២%។

ទន្ទឹមគ្នានេះ ឯកឧត្តមបានអះអាងទៀតថា កំពង់ផែនេះ គ្រោងនឹងពង្រីកសមត្ថភាពបន្ថែមទៀត តាមរយៈគម្រោងសាងសង់ចំណតផែកុងតឺន័រទឹកជ្រៅជំហានទី២ មានប្រវែង៤០០ម៉ែត្រ ជម្រៅទឹកជាង១៦ម៉ែត្រ និងចំណតផែកុងតឺន័រទឹកជ្រៅថ្មីជំហានទី៣ មានប្រវែង៤៣០ម៉ែត្រ ជម្រៅទឹកជាង១៧ម៉ែត្រ រួមជាមួយនឹងគម្រោងបំពាក់ឧបករណ៍បច្ចេកទេសទំនើបៗផ្សេងៗដើម្បីគំាទ្រដល់ប្រតិបត្តិការរបស់កំពង់ផែឱ្យកាន់តែមានប្រសិទ្ធភាពប្រកបដោយស្តង់ដារខ្ពស់។

គួររំលឹកថា បច្ចុប្បន្ននៅក្នុងកំពង់ផែខាងលើកំពុងដំណើរការសាងសង់ចំណតផែកុងតឺន័រទឹកជ្រៅជំហានទី១ តម្លៃជាង ២៤៣លានដុល្លារ ដោយគ្រោងនឹងបញ្ចប់​នៅឆ្នាំ២០២៦។  (អានបន្ថែម)

• សេដ្ឋកិច្ច និងហិរញ្ញវត្ថុ