English 
ខ្មែរ 
ត្រឹមឆមាសទី១ ឆ្នាំ២០២៥ នេះ ចំនួនរោងចក្រ-សហគ្រាសនៅកម្ពុជាកំពុងបន្តកើនឡើងជាលំដាប់!
ក្រសួងការងារ និងបណ្តុះបណ្តាលវិជ្ជាជីវៈ បានបង្ហាញរបាយការណ៍បច្ចុប្បន្នភាពក្នុងរយៈពេល ៦ខែដើមឆ្នាំ២០២៥ នៃការចុះបញ្ជីរោងចក្រសហគ្រាស និងគ្រឹះស្ថាន ដែលមានការកើនឡើងគួរឱ្យកត់សម្គាល់ នោះគឺកើនឡើងពីចំនួន ៤៤.៧៩៨ នៅឆ្នាំ២០២៤ ដល់ចំនួន ៤៥.៦៥៦ រោងចក្រសហគ្រាស កើនឡើងបាន ៨៥៨សហគ្រាស។
បើតាមរបាយការណ៍ដដែល រោងចក្រសហគ្រាសក្នុងវិស័យកាត់ដេរ កើនពី ១.៥៦៦ នៅដំណាច់ឆ្នាំ២០២៤ ដល់ចំនួន ១.៦៨២សហគ្រាស គិតត្រឹមដំណាច់ខែមិថុនា កើនឡើង ១១៦សហគ្រាស។
ចំណែក រោងចក្រសហគ្រាស ក្នុងវិស័យមិនមែនាកាត់ដេរ កើនឡើងពី ៤៣.២៣២ នៅដំណាច់ឆ្នាំ២០២៤ ដល់ចំនួន ៤៣.៩៧៤ រោងចក្រសហគ្រាស គិតត្រឹមឆមាសទី១ ឆ្នាំ២០២៥ ពោលគឺកើនឡើងចំនួន ៧៤២ រោងចក្រសហគ្រាស។
រីឯឧស្សាហកម្មកាត់ដេរស្បែកជើង និងផលិតផលធ្វើដំណើរ គឺជាប្រភពផលិតកម្មដ៏ធំបំផុតសម្រាប់ព្រះរាជាណាចក្រកម្ពុជា ខណៈវិស័យនេះបានបង្កើតការងារជូនដល់កម្មករជិត ១លាននាក់ ដែលភាគច្រើនជាស្ត្រី។
ទន្ទឹមនេះ របាយការណ៍របស់អគ្គនាយកដ្ឋានគយ និងរដ្ឋាករកម្ពុជា ក៏បានបង្ហាញដែរថា កម្ពុជាបាននាំចេញសម្លៀកបំពាក់ ស្បែកជើង និងផលិតផលធ្វើដំណើរ ប្រមាណជា ៧,៣៨ពាន់លានដុល្លារ ក្នុងឆមាសទី១ ឆ្នាំ ២០២៥ កើនឡើង ២២ភាគរយ កើនពីចំនួន ៦,០២ពាន់លានដុល្លារ ក្នុងរយៈពេលដូចគ្នាកាលពីឆ្នាំមុន។
យ៉ាងណាក៏ដោយ ចំពោះការនាំចូលវិញ កម្ពុជាបាននាំចូលវត្ថុធាតុដើមដែលប្រើប្រាស់ក្នុងវិស័យកាត់ដេរប្រមាណជា ៣,៤៨ពាន់លានដុល្លារ កើនឡើង ២១,៤៣ភាគរយ ធៀបនឹង ៣,១៤ ពាន់លានដុល្លារ ក្នុងរយៈពេលដូចគ្នាកាលពីឆ្នាំមុន។
កំណើនជាបន្តបន្ទាប់ទាំងផលិតកម្ម និងការនាំចេញឆ្លុះបញ្ចាំងពីជំហរពង្រឹងរបស់កម្ពុជានៅក្នុងទីផ្សារពិភពលោក ដោយសន្យាថានឹងមានទស្សនវិស័យវិជ្ជមានសម្រាប់សេដ្ឋកិច្ចរបស់ខ្លួនក្នុងប៉ុន្មានឆ្នាំខាងមុខ។