English 
ខ្មែរ 
ទីលានចាក់សំរាមទំហំជាង១០ហិកតានៅកំពង់ឆ្នាំង គ្រោងបញ្ចប់សាងសង់នាចុងឆ្នាំនេះ
ទីលានចាក់សំរាមទំហំជាង ១០ហិកតា នៅក្រុងកំពង់ឆ្នាំង នៅតែដំណើរការសាងសង់រលូនទៅមុខ ដោយគ្រោងនឹងបញ្ចប់នៅដំណាច់ឆ្នាំ២០២១នេះ តាមផែនការ។ នេះបើយោងតាមឯកឧត្ដមអភិបាលខេត្តកំពង់ឆ្នាំង ស៊ុន សុវណ្ណារិទ្ធិ ក្នុងកិច្ចចុះពិនិត្យការដ្ឋានកាលពីថ្ងៃទី ៣ ខែសីហា កន្លងទៅ។
គម្រោងទាំងមូលរួមមាន ការសាងសង់កន្លែងចាក់សំរាម ស្រះសម្អាតទឹកកខ្វក់ ស្រះត្រង់សំរាម អគាររដ្ឋបាល អណ្ដូងត្រួតពិនិត្យគុណភាពទឹក ផ្លូវចូល បន្ទប់ម៉ាស៊ីនភ្លើង ប្រព័ន្ធលូបង្ហូរទឹក របង និងហេដ្ឋារចនាសម្ព័ន្ធផ្សេងៗទៀត។
ឯកឧត្ដម ស៊ុន សុវណ្ណារិទ្ធិ មានប្រសាសន៍ថា ទីលានចាក់សំរាមនេះ មានសារៈសំខាន់ណាស់ដល់ខេត្តកំពង់ឆ្នាំង ពោលគឺដើម្បីលើកកម្ពស់សោភ័ណភាព អនាម័យ បរិស្ថានទីក្រុង ធានាសុខុមាលភាពល្អជូនប្រជាពលរដ្ឋ និងឆ្លើយតបទៅនឹងតម្រូវការចាំបាច់ប្រចាំថ្ងៃ។
សូមជម្រាបដែរថា ទីលានចាក់សំរាមនេះ កំពុងសង់លើដីជាង ១០ហិកតា ដែលស្ថិតនៅក្នុងភូមិត្រពាំងស្បូវ ឃុំស្រែថ្មី ស្រុករលាប្អៀរ។
គម្រោងនេះសាងសង់ឡើង ក្រោមគម្រោងកម្ចីរបស់ធនាគារអភិវឌ្ឍន៍អាស៊ី (ADB) ដោយការដ្ឋានបានចាប់ផ្ដើមតាំងពីខែមេសា ឆ្នាំ២០២០ ដោយគ្រោងនឹងបញ្ចប់នៅចុងឆ្នាំ២០២១ នេះ៕