ទីលានទុកសំរាមទំហំ ១១ហិកតា នៅក្រុងសិរីសោភ័ណ-ខេត្តបន្ទាយមានជ័យ បញ្ចប់ការសាងសង់ហើយ

• 25 ខែ​វិច្ឆិកា 2024
• Uncategorized
• 3 មើល

ទីលានទុកដាក់សំរាមទំហំ ១១ហិកតា នៅក្នុងក្រុងសិរីសោភ័ណ ខេត្តបន្ទាយមានជ័យ បានបញ្ចប់ការសាងសង់ទាំងស្រុងហើយ ខណៈភាគីពាក់ព័ន្ធ បានរៀបចំពិនិត្យប្រគល់-ទទួលរួចរាល់ហើយ នៅថ្ងៃទី២០ ខែវិច្ឆិកា ឆ្នាំ២០២៤។

ថ្លែងក្នុងឱកាសដឹកនាំគណៈប្រតិភូក្រសួងចុះពិនិត្យប្រគល់-ទទួលអនុគម្រោងសាងសង់ផ្ទាល់ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានឱ្យដឹងថា គម្រោងសាងសង់ទីលានទុកដាក់សំរាមនេះ ស្ថិតនៅភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យបានបានបញ្ចប់សាងសង់ជាស្ថាពរ ១០០ភាគរយហើយ ។

ឯកឧត្តមបន្តថា អនុគម្រោងទីលានទុកដាក់សំរាម ក្រុងសិរីសោភ័ណ ខេត្តបន្ទាយមានជ័យ នេះ គឺស្ថិតក្នុងគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហាន២ ក្រោមហិរញ្ញប្បទានសហប្រតិបត្តិការរបស់ធនាគារអភិវឌ្ឍន៍អាស៊ី (ADB)។

គួរបញ្ជាក់ថា ទីលានទុកដាក់សំរាមដែលមានទំហំរហូតដល់ ១១ហិកតានេះ បានចាប់ផ្តើមសាងសង់តំាងពីថ្ងៃទី១១ ខែធ្នូ ឆ្នាំ២០២៣ និងបញ្ចប់គការសាងសង់នៅថ្ងៃទី២៤ ខែតុលា ឆ្នាំ២០២៤ និងគ្រោងដាក់ឱ្យប្រើប្រាស់រហូតដល់ឆ្នាំ២០៤០។ លើសពីនេះ គម្រោងនេះមានវិសាលភាពសម្រាប់ប្រជាជនប្រមាណជាង ១២៨.២០៨នាក់ ដែលរស់នៅក្នុងសង្កាត់ម្កាក់ កំពង់ស្វាយ ព្រះពន្លា ទឹកថ្លា អូរអំបិល ភ្នៀត កោះពង្សសត្វ ក្រុងសិរីសោភ័ណផ្ទាល់។

គម្រោងនេះមិនត្រឹមតែបង្កើនសមត្ថភាពគ្រប់គ្រងកាកសំណល់ប៉ុណ្ណោះទេ ប៉ុន្តែថែមទាំងរួមចំណែកដល់និរន្តរភាពបរិស្ថានទាំងមូលនៃតំបន់ ធានាសហគមន៍ស្អាត និងមានសុខភាពល្អសម្រាប់ឆ្នាំខាងមុខ។