ធនាគារពិភពលោក៖ សេដ្ឋកិច្ចកម្ពុជានឹងកើនឡើង ៥.៥% ក្នុងឆ្នាំ២០២៥-២០២៦

• 23 ខែ​ធ្នូ 2024
• Uncategorized
• 3 មើល

ធនាគារពិភពលោកបានព្យាករណ៍ថា កំណើនសេដ្ឋកិច្ចរបស់កម្ពុជានឹងឈានដល់ ៥,៥% ក្នុងឆ្នាំ២០២៥ និង ២០២៦ បន្ទាប់ពីការព្យាករណ៍កំណើន ៥,៣% សម្រាប់ឆ្នាំ ២០២៤ និង ៥% សម្រាប់ឆ្នាំ២០២៣។ នេះបើយោងតាមការចុះផ្សាយរបស់ fibre2fashion នៅថ្ងៃទី២១ ខែធ្នូ ឆ្នំា២០២៤។

កំណើននេះត្រូវបានជំរុញយ៉ាងខ្លាំងដោយការកើនឡើងនៃការនាំចេញផ្នែកផលិតកម្ម ជាពិសេសសម្លៀកបំពាក់ ទំនិញធ្វើដំណើរ និងស្បែកជើង ដែលទាំងអស់នេះត្រូវបានជំរុញឡើងដោយការស្ទុះងើបឡើងវិញនៃវិស័យទេសចរណ៍។

ទោះបីជាមានភាពមិនប្រាកដប្រជាជាសកលក៏ដោយ ការស្ទុះងើបឡើងវិញនេះបានគូសបញ្ជាក់អំពីសមត្ថភាពរបស់កម្ពុជាក្នុងការបង្កើននូវវិស័យសេដ្ឋកិច្ចសំខាន់ៗដូចជា ផលិតកម្មកសិកម្ម និងការវិនិយោគហេដ្ឋារចនាសម្ព័ន្ធសំខាន់ៗ រួមមានផ្លូវល្បឿនលឿនភ្នំពេញ-ព្រះសីហនុ និងគម្រោងអភិវឌ្ឍហេដ្ឋារចនាសម្ព័ន្ធថ្មីៗមួយចំនួនទៀត ដែលគេរំពឹងថានឹងផ្តល់នូវមូលដ្ឋានគ្រឹះដ៏រឹងមាំសម្រាប់ភាពធន់នៃសេដ្ឋកិច្ចជាតិ។

ជាមួយគ្នានេះដែរ ធនាគារពិភពលោកក៏បានសង្កត់ធ្ងន់លើហានិភ័យខាងក្រៅ ជាពិសេសផលប៉ះពាល់នៃតម្រូវការសកលដែលកាន់តែខ្សោយ និងការធ្លាក់ចុះនៅក្នុងប្រទេសចិន ដែលជាដៃគូពាណិជ្ជកម្មដ៏សំខាន់របស់កម្ពុជា។ ដើម្បីរក្សាសន្ទុះកំណើននេះ ធនាគារពិភពលោកគូសបញ្ជាក់អំពីសារៈសំខាន់នៃវិធានការរបស់រដ្ឋាភិបាលក្នុងការដោះស្រាយភាពងាយរងគ្រោះ និងរក្សាស្ថិរភាពសេដ្ឋកិច្ច។

• សេដ្ឋកិច្ច និងហិរញ្ញវត្ថុ