បច្ចុប្បន្ន កម្ពុជាមានរោងម៉ាស៊ីនកិនស្រូវខ្នាតធំចំនួន ១៩មូលដ្ឋាន មាន​ទុនជាង $៣៤០លាន

• 11 ខែ​កញ្ញា 2024
• Uncategorized
• 3 មើល

បច្ចុប្បន្ន កម្ពុជាមានរោងម៉ាស៊ីនកិនស្រូវ និងគ្រាប់ធញ្ញជាតិខ្នាតធំចំនួន ១៩មូលដ្ឋាន នៅទូទាំងប្រទេស ជាមួយដើមទុនវិនិយោគជាង ៣៤២លានដុល្លារ។ នេះបើយោងតាមការបញ្ជាក់របស់ ឯកឧត្តម ហែម វណ្ឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍

នៅក្នុងកម្មវិធីបើកវេទិកាស្រូវអង្ករកម្ពុជាលើកទី៧ នៅថ្ងៃទី​១០ ខែកញ្ញា ឆ្នាំ ២០២៤។

នាឱកាសនោះដែរ ឯកឧត្តម បានលើកឡើងទៀតថា ចំពោះរោងម៉ាស៊ីនកិនស្រូវខ្នាតតូច និងមធ្យម មានចំនួន ១៩.៥៧០ មូលដ្ឋាននៅ​ទូទាំង​ប្រទេស ដែលមានទុនសរុបជាង ១១១លានដុល្លារ។

ជាងនេះទៅទៀត បើតាមរបាយការណ៍ពីសហព័ន្ធស្រូវអង្ករកម្ពុជាបានបង្ហាញថា ក្នុងរយៈពេល៨ខែដើមឆ្នាំ ២០២៤  កម្ពុជា​បាន​នាំចេញ​អង្ករ​បានចំនួនសរុប ៤១២.០២៣តោន​ គិតជាទឹកប្រាក់ជាង ៣០៥​លានដុល្លារ​ ទៅកាន់​ទីផ្សារគោលដៅចំនួន​ ៦៥ប្រទេស ទាំងនៅក្នុងតំបន់ និងលើសកល​លោក។

តំបន់អឺរ៉ុបជាទីផ្សារធំជាងគេនៃទីផ្សារអង្កររបស់កម្ពុជា ដែលបាននាំចូលប្រមាណ ២០៨.០២៣តោន មានតម្លៃប្រមាណ ១៦១លានុល្លារ។ ការនាំចេញអង្ករទៅទីផ្សារប្រទេសចិន មានបរិមាណ ៧៧.៧៩២តោន មានតម្លៃ ៤៨លានដុល្លារ និងនាំចេញទៅកាន់ប្រទេសអាស៊ាន មានបរិមាណ ៨៣.០៨៥តោន មានតម្លៃ ៥៦លានដុល្លារ។​

ក្នុងរយៈពេលដូចគ្នានេះដែរ កម្ពុជាបាននាំចេញស្រូវប្រមាន ៣.៣លានតោន ទៅកាន់ប្រទេសជិតខាង មានទឹកប្រាក់សរុប ៩១៨លានដុល្លារ។​

គួររំលឹកថា ក្នុងឆមាសទី១ ឆ្នាំ២០២៤ កន្លងទៅនេះ កម្ពុជាបាននាំចេញកសិផលកសិកម្មទៅក្រៅប្រទេសបានជាង ៦លានតោន កើនឡើងជិត ៦០ភាគរយ ធៀបនឹងឆមាសទី១ ក្នុងឆ្នាំ២០២៣។ (អានបន្ថែម)