ប៉ូលីសចិនកំពុងស៊ើប​អង្កេត​ក្រុមហ៊ុន​ហិរញ្ញវត្ថុ​ដ៏​ធំ​១ដែលក្ស័យធន ដោយឱបបំណុលទៅជាមួយរហូត $៦០ពាន់លាន

• 5 ខែ​ធ្នូ 2023
• Uncategorized @km
• 3 មើល

ប៉ូលីសក្រុងប៉េកាំងបានចាប់ផ្តើមបើកការស៊ើបអង្កេតជាផ្លូវការកាលពីថ្ងៃសៅរ៍​ទី ២៥​វិច្ឆិកានេះ ទៅលើក្រុមហ៊ុន Zhongzhi ដែលជាក្រុមហ៊ុនហិរញ្ញវត្ថុដ៏ធំសម្បើមមួយ បន្ទាប់ពីការធ្លាក់ចុះនៃបំណុលនាពេលថ្មីៗនេះ និងការក្ស័យធនជាបន្តបន្ទាប់ នេះបើយោងតាមការចុះផ្សាយរបស់សារៈព័ត៌មានហុងកុង The Standard ចេញផ្សាយថ្ងៃទី ២៦ ខែវិច្ឆិកា ឆ្នាំ ២០២៣។

ទោះបីជាមានសាវតារមិនសូវមានគេស្គាល់ច្រើនក៏ដោយ ប៉ុន្តែក្រុមហ៊ុន Zhongzhi បានដើរតួយ៉ាងសំខាន់នៅក្នុងទិដ្ឋភាពហិរញ្ញវត្ថុពិភពលោក ដោយទាក់ទាញការវិនិយោគយ៉ាងច្រើនពីសាជីវកម្មធំៗ និងបុគ្គលដែលមានទ្រព្យសម្បត្តិល្បីៗ។ ធនាគារ Nomura Commercial Bank ប៉ាន់ប្រមាណថា ការកាន់កាប់សាជីវកម្មរបស់ក្រុមហ៊ុន មានចំនួនលើសពី ១៤១ពាន់លានដុល្លារ ដែលធ្វើឱ្យស្ថាប័នហិរញ្ញវត្ថុជិតដួលរលំមួយនេះ ក្លាយជាតួអង្គសំខាន់ក្នុងការផ្តល់ហិរញ្ញប្បទានដល់គម្រោងផ្សេងៗសម្រាប់អចលនទ្រព្យ សំណង់ និងសហគ្រាសធំៗលើលោក។

វិបត្តិហិរញ្ញវត្ថុដែលបង្កឡើងដោយការធ្លាក់ចុះនៃទីផ្សារអចលនទ្រព្យ និងការធ្លាក់ចុះសេដ្ឋកិច្ចបានធ្វើឱ្យ Zhongzhi មិនអាចបំពេញកាតព្វកិច្ចហិរញ្ញវត្ថុរបស់ខ្លួន។ ក្រុមហ៊ុន ទើបតែបានប្រកាសក្ស័យធនជាផ្លូវការនៅថ្ងៃទី ២២ ខែវិច្ឆិកា ឆ្នាំ ២០២៣ ដោយបង្ហាញពីទំហំបំណុលដ៏គួរឱ្យភ្ញាក់ផ្អើលប្រមាណ $៦០ពាន់លានដុល្លារ។

ជាការឆ្លើយតបទៅនឹងវិបត្តិហិរញ្ញវត្ថុនេះ អាជ្ញាធរក្រុងប៉េកាំងបានចាត់វិធានការយ៉ាងម៉ឺងម៉ាត់ ដោយចាប់ផ្តើមការស៊ើបអង្កេតឧក្រិដ្ឋកម្មទៅលើសកម្មភាពរបស់ Zhongzhi ។ ខណៈពេលដែលព័ត៌មានលម្អិតអំពីលក្ខណៈនៃឧក្រិដ្ឋកម្មដែលត្រូវបានចោទប្រកាន់នៅតែមិនបង្ហាញនោះ អាជ្ញាធរបានចាប់ខ្លួនជនសង្ស័យជាច្រើននាក់រួចមកហើយ ពាក់ព័ន្ធនឹងករណីនេះ។

Zhongzhi ឈរជាក្រុមហ៊ុនហិរញ្ញវត្ថុឯកជនដ៏ធំបំផុតមួយរបស់ពិភពលោក ដែលជាក្រុមហ៊ុនសម្ព័ន្ធរួមធំមានក្រុមហ៊ុនបុត្រសម្ព័ន្ធជាបណ្តាញទូលំទូលាយជាច្រើន និងតួនាទីលេចធ្លោនៅក្នុងទីផ្សារហិរញ្ញវត្ថុពិភពលោក។ ដូច្នេះការចាត់វិធានការស៊ើបអង្កេតទៅលើក្រុមហ៊ុន អាចជាវិធានការដោះស្រាយបន្ទាន់បំផុតមួយរបស់រដ្ឋាភិបាលចិន ព្រោះថាការ​ដួល​រលំ​នៃក្រុមហ៊ុននេះ​​ អាច​ជា​ហានិភ័យ​ឆ្លង​រាល​ដាលដល់ប្រព័ន្ធ​ហិរញ្ញវត្ថុ​ចិន​ទាំង​មូល​ និងដល់បណ្តាប្រទេសផ្សេងទៀតផងដែរ។

ពេលវេលានៃការដួលរលំរបស់ Zhongzhi គឺត្រឹមតែពីរឆ្នាំបន្ទាប់ពីក្រុមហ៊ុន Evergrande ធ្វើឱ្យមានការព្រួយបារម្ភអំពីការឆ្លងរាលដាលផ្នែកហិរញ្ញវត្ថុដែលអាចកើតមាននៅក្នុងប្រព័ន្ធសេដ្ឋកិច្ចរបស់ប្រទេសចិន។ ផលវិបាកនៃវិបត្តិក្ស័យធនរបស់ Evergrande នៅតែបន្តអូសបន្លាយ ដែលធ្វើឱ្យមានស្រមោលអវិជ្ជមានលើវិស័យអចលនទ្រព្យ និងលើទិដ្ឋភាពសេដ្ឋកិច្ចទាំងមូលរបស់ប្រទេសចិន៕

• សេដ្ឋកិច្ច និងហិរញ្ញវត្ថុ