ផ្លូវជាតិលេខ៥ ប្រវែង ៣៣១គ.ម នឹងបញ្ចប់ក្នុងឆ្នាំ២០២៣ ខណៈ៣៥គ.មចុងក្រោយនឹងបញ្ជប់នៅឆ្នាំ២០២៥

• 21 ខែ​មីនា 2023
• ព័ត៌មានក្នុងស្រុក
• 3 មើល

ផ្លូវជាតិលេខ៥ មានប្រវែងសរុប ៣៦៦គីឡូម៉ែត ហើយត្រូវបានបែកចែកជា ៣ភាគ ដើម្បីធ្វើការសាងសង់ ក្នុងនោះរួមមាន ភាគខាងត្បូង ភាគកណ្តាល និងភាគខាងជើង មានប្រវែងសរុប ៣៣១គ.ម ដែលត្រូវបញ្ជប់ការសាងសង់ទាំងស្រុង និងសម្ពោធបើកឱ្យដំណើរការនៅពាក់កណ្តាល ឆ្នាំ២០២៣នេះ ដោយឡែកនៅមានកំណាត់ចុងក្រោយ ៣៥គ.ម អាចនឹងបញ្ចប់នៅចុងឆ្នាំ២០២៤ ឬដើមឆ្នាំ២០២៥។

នេះបើយោងតាមប្រសាសន៍ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន នៅថ្ងៃទី២០ ខែមីនា ឆ្នាំ២០២៣នេះ​​។

ឯកឧត្តមបញ្ជាក់ថា  ផ្លូវជាតិលេខ៥ ត្រូវបានបែកចែកជា ៣ភាគ ក្នុងការសាងសង់ ទី១-ភាគខាងត្បូង ពីព្រែកក្តាម-ធ្លាម្អម មានប្រវែង ១៣៥,២៥ គ.ម សម្រេច៩៨% _ ទី២-ភាគកណ្តាលពីធ្លាម្អម-បាត់ដំបង និងសិរីសោភ័ណ-ប៉ោយប៉ែត មានប្រវែង ១៤៦,០៤ គ.ម សម្រេច៦៩% _ទី៣-ភាគខាងជើង ពីបាត់ដំបង-សិរីសោភ័ណ មានប្រវែង ៨៤,៧៤ គ.ម សម្រេច១០០%  ខណៈពីក្រុងសិរីសោភ័ណ ទៅក្រុងប៉ោយប៉ែត មានប្រវែង ៣៥គ.ម ចុងក្រោយ អាចនឹងបញ្ចប់នៅចុងឆ្នាំ២០២៤ ឬដើមឆ្នាំ២០២៥។

ឯកឧត្តមបន្ថែមថា  ក្រសួងបានស្នើឱ្យក្រុមហ៊ុនសាងសង់ពន្លឿនបញ្ចប់ការងារ ដើម្បីឈានទៅបើកសម្ពោធដាក់ឱ្យប្រើប្រាស់ជាផ្លូវការនៅក្នុងខែមិថុនា ឆ្នាំ២០២៣ខាងមុខនេះ។

ឯកឧត្តមបន្តថា «យើងខ្ញុំកំពុងជំរុញក្រុមហ៊ុនសាងសង់ឲ្យធ្វើឲ្យបានចប់ ដើម្បីធ្វើលិខិតស្នើសុំទៅកាន់សម្ដេចតេជោ ហ៊ុន សែន អញ្ជើញមកដាក់សម្ពោធឲ្យប្រើប្រាស់ជាផ្លូវការ ចាប់ពីព្រែកក្តាម មកកាន់ប៉ោយប៉ែត និងមកបាត់ដំបង។ គ្រោងនឹងសម្ពោធនៅពាក់កណ្ដាលខែ ឬអាទិត្យទី៣ នៃខែមិថុនាខាងមុខនេះហើយ»។

គួររម្លឹកថា កំណត់ផ្លូវជាតិលេខ៥ តភ្ជាប់ពីបាត់ដំបង-សិរីសោភ័ណ្ឌ ប្រវែង ៨៤,៧៤ គីឡូម៉ែត្រ​ត្រូវបានបើកសម្ពោធឲ្យប្រើប្រាស់ជាផ្លូវការរួចរាល់ហើយ ក្រោមអធិបតីភាពសម្ដេចតេជោ ហ៊ុន សែន កាលពីខែមករា ឆ្នាំ២០២២ កន្លងមក។ (អានបន្ថែម)

យ៉ាងណាក្តី ផ្លូវជាតិលេខ៥ កំណាត់ចុងក្រោយពីសិរីសោភ័ណ-ប៉ោយប៉ែត ដែលមានប្រវែង ៣៥គ.ម នឹងបញ្ចប់ការសាងសង់នៅក្នុងឆ្នាំ២០២៥ ខាងមុខ ខណៈសព្វថ្ងៃនេះការដ្ឋានសាងសង់និងពង្រីកកំណាត់ផ្លូវនេះកំពុងដំណើរការទៅជាធម្មតា។ ឯកឧត្តមទេសរដ្ឋមន្រ្តីបញ្ជាក់ថា កំណត់ផ្លូវចុងក្រោយនេះសាងសង់យឺតជាងកំណត់ផ្លូវផ្សេងទៀត ដោយសារទើបតែត្រូវបានដាក់ដេញថ្លៃ ហើយចាប់ផ្ដើមសាងសង់ក្រោយគេ។