មកទល់ពេលនេះមានក្រុមហ៊ុនចិនចំនួន៣ ប្រកាសពីបំណងចង់វិនិយោគចម្រាញ់ប្រេងឆៅនៅកម្ពុជា

14 ខែឧសភា 2025
Uncategorized
3 មើល

ក្នុងការជំរុញយ៉ាងខ្លាំងដល់វិស័យថាមពលរបស់កម្ពុជា ក្រុមហ៊ុនចិនចំនួនបីបានប្រកាសជាបន្តបន្ទាប់ពីផែនការវិនិយោគក្នុងឧស្សាហកម្មចម្រាញ់ប្រេងឆៅនៅក្នុងប្រទេសមួយនេះ។ ការអភិវឌ្ឍន៍នេះបានបង្ហាញពីជំហានគួរឱ្យកត់សម្គាល់មួយឆ្ពោះទៅរកការលើកកម្ពស់ឯករាជ្យភាពថាមពល និងកំណើនសេដ្ឋកិច្ចរបស់កម្ពុជា។

គួរបញ្ជាក់ថា ក្រោយពី ក្រុមហ៊ុន Beijing Scitech Holdings Co., Ltd និង ក្រុមហ៊ុន Guanzun Energy Investment Co., Ltd, ទើបប្រកាសថាចង់វិនិយោគចម្រាញ់ប្រេងឆៅនៅកម្ពុជា, ស្រាប់តែថ្មីៗនេះ ក្រុមហ៊ុន Beijing Sainte Holding Co., Ltd. ដែលមានមូលដ្ឋាននៅប្រទេសចិន បានប្រកាសពីផែនាការរបស់ខ្លួនដែលចង់បណ្តាក់ទុនវិនិយោគក្នុងវិស័យចម្រាញ់ប្រេងឆៅនៅកម្ពុជាផងដែរ។

នេះបើតាមជំនួបរវាងឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា និងលោក ឆិន យីងលាវ (Chen Yingliu) អគ្គនាយកក្រុមហ៊ុន នៅថ្ងៃទី១២ ខែឧសភា ឆ្នាំ២០២៥។

ក្នុងជំនួបនេះ ឯកឧត្តម ជា វុទ្ធី បានផ្តល់ការស្វាគមន៍ចំពោះគណៈប្រតិភូមកពីក្រុមហ៊ុន Beijing Sainte Holding Co., Ltd ដែលមានបំណងមកបណ្តាក់ទុនវិនិយោគក្នុងវិស័យចម្រាញ់ប្រេងនៅកម្ពុជា។ បន្ទាប់មក ឯកឧត្តមក៏បានបានគូសបញ្ជាក់ពីភាពជោគជ័យនៃការបណ្តាក់ទុនស្រដៀងគ្នានេះនៅក្នុងតំបន់អាស៊ីអាគ្នេយ៍ ជាពិសេសនៅប្រទេសសិង្ហបុរី និងកូរ៉េខាងត្បូង។ ជាងនេះទៅទៀត ឯកឧត្តម បានសង្កត់ធ្ងន់លើសារៈសំខាន់នៃការជ្រើសរើសទីតាំងដែលមិនប៉ះពាល់ដល់បរិស្ថានសម្រាប់រោងចក្រចម្រាញ់ប្រេងថ្មីនេះ ដោយឯកឧត្តមស្នើឱ្យក្រុមហ៊ុនពិចារណាក្នុងការបង្កើតតំបន់សេដ្ឋកិច្ចពិសេសដែលផ្តោតលើការចម្រាញ់ប្រេងផងដែរ។

ជាការឆ្លើយតប ក្រុមហ៊ុន Beijing Sainte Holding បានសន្យា និងបេ្តជ្ញាចិត្តថា នឹងនាំយកចំណេះជំនាញ និងបច្ចេកវិទ្យាទំនើប ដែលឈានមុខគេពីប្រទេសចិន មកអនុវត្តគម្រោងនេះឱ្យបានជោគជ័យ ដោយសង្ឃឹមថានឹងអាចរួមចំណែកជួយគាំទ្រដល់ការអភិវឌ្ឍសេដ្ឋកិច្ច-សង្គមកម្ពុជាផងដែរ។

គួររម្លឹកថា កាលពីកន្លងទៅថ្មីៗនេះ មានក្រុមហ៊ុនមកពីប្រទេសចិនចំនួន២ គឺក្រុមហ៊ុន Beijing Scitech Holdings Co., Ltd. និង Guanzun Energy Investment Co., Ltd ទើបតែប្រកាសពីគោលបំណងចង់វិនិយោគនៅក្នុងឧស្សាហកម្មចម្រាញ់ប្រេងឆៅនៅកម្ពុជាផងដែរ។ (អានបន្ថែម និងបន្ថែម)

ការវិនិយោគទាំងនេះបង្ហាញពីអនាគតដ៏ជោគជ័យសម្រាប់ឧស្សាហកម្មចម្រាញ់ប្រេងឆៅរបស់កម្ពុជា ដោយត្រួសត្រាយផ្លូវសម្រាប់ការកើនឡើងសកម្មភាពសេដ្ឋកិច្ច និងថាមពលគ្រប់គ្រាន់ក្នុងតំបន់។