មន្ត្រីជាន់ខ្ពស់របស់កម្ពុជា៖ ចិននឹងពង្រីកការវិនិយោគបន្ថែមនៅកម្ពុជានៅឆ្នាំ ២០២៤នេះ

• 22 ខែ​មករា 2024
• Uncategorized
• 3 មើល

ទស្សនវិស័យដ៏មានសក្តានុពលសម្រាប់កិច្ចសហប្រតិបត្តិការសេដ្ឋកិច្ច និងពាណិជ្ជកម្មកម្ពុជា-ចិននៅឆ្នាំ ២០២៤ ត្រូវបានឯកឧត្តម សុខ ស៊ីផាន់ណា ទេសរដ្ឋមន្ត្រី និងជាប្រធានកិត្តិយសក្រុមប្រឹក្សាភិបាលនៃវិទ្យាស្ថានចក្ខុវិស័យអាស៊ីលើកឡើងថា នឹងកាន់តែកើនឡើងនិងស៊ីជម្រៅបន្ថែមទៀតក្នុងឆ្នាំនេះ ជាពិសេសក្នុងវិស័យទំហំពាណិជ្ជកម្មនិងការវិនិយោគ។

នៅក្នុងបទសម្ភាសន៍ផ្តាច់មុខជាមួយសារព័ត៌មានស៊ីនហួរបស់ចិនចុះផ្សាយកាលពីថ្ងៃទី ១៩ ខែ០១ឆ្នាំ២០២៤ ឯកឧត្តម សុខ ស៊ីផាន់ណា បានលើកឡើងពីការអនុវត្តកម្មវិធីសហគមន៍ចិន-កម្ពុជា ជាមួយនឹងអនាគតរួមគ្នាក្នុងយុគសម័យថ្មី និងពាក្យស្លោក “ចិន-កម្ពុជាការផ្លាស់ប្តូររវាងប្រជាជននឹងប្រជាជននៅឆ្នាំ ២០២៤” នឹងដើរតួជាកម្លាំងស្នូល ជំរុញកំណើនសេដ្ឋកិច្ច និងជំរុញការអភិវឌ្ឍសង្គមប្រកបដោយចីរភាព។ ឯកឧត្តម ក៏បានកត់សម្គាល់អំពីគន្លងវិជ្ជមានដែលរំពឹងទុកសម្រាប់ជំរុញកំណើនបន្ថែមទៀតផងដែរ។

“ការអភិវឌ្ឍច្រករបៀងសំខាន់ៗដូចជា ច្រករបៀងអភិវឌ្ឍន៍ឧស្សាហកម្ម និងច្រករបៀងត្រី និងស្រូវ នឹងជួយឱ្យប្រទេសទាំងពីរសម្រេចបានការអភិវឌ្ឍថ្មីបន្ថែមទៀត។” ប្រសាសន៍ឯកឧត្តម​ស៊ីផាន់ណា។ ​

ដោយលើកឡើងពីរបាយការណ៍ថ្មីៗនេះរបស់ធនាគារពិភពលោក ឯកឧត្តម ស៊ីផាណា រំពឹងថា កំណើនសេដ្ឋកិច្ចរបស់កម្ពុជានឹងកើនឡើងដល់ ៥,៨ ភាគរយនៅឆ្នាំ ២០២៤។ លោកបានទទួលស្គាល់លទ្ធផលគួរឱ្យសរសើរដែលសម្រេចបានក្នុងឆ្នាំ ២០២៣ ដែលកម្ពុជា និងចិនរួមគ្នាសម្រេចបាននូវការកើនឡើងនៃពាណិជ្ជកម្មទ្វេភាគី និងការកើនឡើងនៃការវិនិយោគរបស់ចិននៅកម្ពុជា ដែលមានចំនួន ៦៦ ភាគរយនៃប្រភពវិនិយោគបរទេសរបស់កម្ពុជា។

ប្រទេសចិនបានកាន់តំណែងជាដៃគូពាណិជ្ជកម្មដ៏ធំបំផុតសម្រាប់រយៈពេល ១២ ឆ្នាំជាប់ៗគ្នាមកនេះ ហើយនៅតែជាប្រភពចម្បងនៃការវិនិយោគផ្ទាល់ពីបរទេសរបស់កម្ពុជា។ ឯកឧត្តម ស៊ីផាន់ណា បានវាយតម្លៃខ្ពស់ចំពោះការចូលជាធរមានជាផ្លូវការនៃកិច្ចព្រមព្រៀងពាណិជ្ជកម្មសេរីចិន-កម្ពុជា និងកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) សម្រាប់ការបញ្ចូលភាពរឹងមាំទៅក្នុងពាណិជ្ជកម្មទ្វេភាគី។

ដោយលើកឡើងពីផលិតផលកសិកម្មចម្រុះដែលមានគុណភាពខ្ពស់ដែលត្រូវបានអនុម័តសម្រាប់នាំចេញទៅប្រទេសចិន រួមមានអង្ករ ដំឡូងមី ចេក ស្វាយ ម្ទេសវែង ធុរេន និងសំបុកត្រចៀកកាំ ឯកឧត្តម ស៊ីផាន់ណា បានសង្កត់ធ្ងន់លើតួនាទីសំខាន់របស់ប្រទេសចិនដែលជាទីផ្សារនាំចេញ​ចេក និង​ផ្លែ​មៀនខ្មែរដ៏ធំបំផុតសម្រាប់កម្ពុជាផងដែរ។

ក្រៅពីការប្តេជ្ញាចិត្តរបស់កម្ពុជាចំពោះទំនាក់ទំនងការទូតកម្រិតខ្ពស់ជាមួយប្រទេសចិន ការគាំទ្រយ៉ាងរឹងមាំចំពោះគំនិតផ្តួចផ្តើមខ្សែក្រវាត់ និងផ្លូវ (BRI) និងការបន្ស៊ី BRI ជាមួយនឹងយុទ្ធសាស្ត្របញ្ចកោណរបស់កម្ពុជា ឯកឧត្តមបានកោតសរសើរចំពោះគម្រោង BRI សំខាន់ៗនៅក្នុងប្រទេសកម្ពុជា ដូចជាអាកាសយានដ្ឋានអន្តរជាតិសៀមរាបអង្គរ និងផ្លូវល្បឿនលឿនភ្នំពេញ-ព្រះសីហនុ សម្រាប់ការលើកកម្ពស់ការអភិវឌ្ឍសេដ្ឋកិច្ច និងការតភ្ជាប់។

“ការវិនិយោគពីក្រុមហ៊ុនបច្ចេកវិទ្យាចិនក៏បានពង្រីកសេដ្ឋកិច្ចឌីជីថល និងសេដ្ឋកិច្ចបៃតងរបស់កម្ពុជាផងដែរ។ ប្រទេសចិន និងកម្ពុជាទទួលបានលទ្ធផលលេចធ្លោក្នុងការរួមគ្នាកសាងសហគមន៍ប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់ ជាមួយនឹងអនាគតរួមគ្នា”  ប្រសាសន៍ឯកឧត្តម ស៊ីផាន់ណា។

នៅឆ្នាំ ២០២២ ប្រទេសចិនគឺជាទីផ្សារនាំចេញដ៏ធំបំផុតរបស់កម្ពុជា ជាមួយនឹងការនាំចេញសរុបចំនួន ១,២៤ ពាន់លានដុល្លារអាមេរិក ដែលតំណាងឱ្យ ៥,៥% នៃការនាំចេញសរុបរបស់កម្ពុជា។ ក្នុង​អំឡុង​ពេល​ដូច​គ្នា​នេះ ការ​នាំ​ចូល​របស់​កម្ពុជា​ពី​ប្រទេស​ចិន​មាន​ចំនួន ១០,៤ ពាន់​លាន​ដុល្លារ ស្មើ​នឹង ៣៤,១% នៃ​ការ​នាំ​ចូល​សរុប​របស់​កម្ពុជា។ ពាណិជ្ជកម្មទ្វេភាគីរវាងកម្ពុជា និងចិនឈានដល់ ១១ពាន់លានដុល្លារក្នុងឆ្នាំ ២០២២ ហើយគេរំពឹងថានឹងកើនឡើងដល់ ១៥ពាន់លានដុល្លារនៅឆ្នាំ ២០២៥។ ប្រទេសចិនគឺជាដៃគូពាណិជ្ជកម្មដ៏ធំបំផុតរបស់កម្ពុជា ដោយទំហំពាណិជ្ជកម្មរំពឹងថានឹងកើនឡើងដល់ ១២ពាន់លានដុល្លារ ស្មើនឹង ៨,៦ ភាគរយនៃទំហំពាណិជ្ជកម្មសរុបរបស់កម្ពុជា៕