រដ្ឋប្រកាសបញ្ឈប់ផ្តល់អាជ្ញាប័ណ្ណឱ្យក្រុមហ៊ុនរុករករ៉ែនៅតំបន់ព្រៃឡង់

• 25 ខែ​ធ្នូ 2023
• Uncategorized
• 3 មើល

រាជរដ្ឋាភិបាលកម្ពុជា​ បានសម្រេចឈប់ផ្តល់អាជ្ញាបណ្ណឱ្យក្រុមហ៊ុនរុករករ៉ែនៅតំបន់ព្រៃឡង់ទៀតហើយ ហើយក្រុមហ៊ុនដែលមានស្រាប់ ក៏មិនអនុញ្ញាតឲ្យពង្រីកបន្ថែមទៀតដែរ។

នេះបើតាមការលើកឡើងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ថ្លែងក្នុងពិធីបិទ​សន្និ​បាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងបរិស្ថាន នារសៀលថ្ងៃទី២១ ខែធ្នូ ឆ្នាំ២០២៣នេះ។

សម្ដេចមានប្រសាសន៍ថា កាលពីដើមខែវិច្ឆិកា ឆ្នាំ២០២៣កន្លងទៅនេះ សម្ដេចបានឲ្យគោល​ការណ៍ឯកភាពទៅតាមសំណើរបស់ក្រសួងរ៉ែ និងថាមពល គឺឈប់ចេញអាជ្ញាប័ណ្ណរុករករ៉ែបន្ថែមទៀតនៅតំបន់ព្រៃឡង់។

បន្ថែមពីនេះ សម្ដេចធិបតីបានបន្ថែមថា អាជ្ញាប័ណ្ណថ្មីរករ៉ែនៅទីនោះ គឺមិនចេញឲ្យទៀតទេ អាជ្ញាប័ណ្ណដែលមានស្រាប់គឺបន្តធ្វើ ហើយខិតខំសិក្សានៅក្នុងកាត់បន្ថយផ្ទៃដីដែលសិក្សា ហើយក្រុមហ៊ុនរុករករ៉ែដែលមានស្រាប់ ក៏មិនអនុញ្ញាតឲ្យពង្រីកថែមទៀតដែរនៅតំបន់ព្រៃឡង់ នេះហើយជាគោលការណ៍របស់រាជរដ្ឋាភិបាល៕

កន្លងមកថ្មីៗនេះ រដ្ឋមន្រី្តក្រសួងរ៉ែ និងថាមពល ក៏ទើបតែបាន​អះអាងពីការឈប់ចេញអាជ្ញាបណ្ណធ្វើអាជីវកម្មលើថ្មភ្នំ ដល់ក្រុមហ៊ុនណាមួយទៀតហើយ លុះត្រាតែមានការពិនិត្យឡើងវិញ ដោយឈរលើគោលការណ៍អភិរក្ស។ (អានបន្ថែម)