រោងចក្រដំឡើងរថយន្តអគ្គិសនីដ៏ល្បីរបស់ចិនតម្លៃ $៣២លាន គ្រោងបើកដំណើរការនៅខេត្តព្រះសីហនុនៅចុងឆ្នាំនេះ

• 7 ខែ​កុម្ភៈ 2025
• Uncategorized
• 3 មើល

ក្រុមហ៊ុនផលិតរថយន្តអគ្គិសនីដ៏ល្បីបំផុតរបស់ប្រទេសចិន យីហោ BYD កំពុងវិនិយោគសាងសង់រោងចក្រដំឡើងរថយន្ត ក្រោមទុនវិនិយោគ ៣២លានដុល្លារ មានទីតាំងស្ថិតក្នុងតំបន់សេដ្ឋកិច្ចពិសេសក្នុងខេត្តព្រះសីហនុ។ បើតាមផែនការរោងចក្រនេះ នឹងបញ្ចប់ការសាងសង់នៅខែវិច្ឆិកាខាងមុខ ដើម្បីផ្គត់ផ្គង់ទីផ្សារក្នុងស្រុក និងនាំចេញទៅក្រៅប្រទេស។​

ក្រុមប្រឹក្សាអភិវឌ្ឍន៍កម្ពុជា បានចេញលិខិតអនុញ្ញាតចំពោះគម្រោងវិនិយោគផ្គុំដំឡើងរថយន្ត BYD ជាមួយនឹងទុនវិនិយោគសរុប ៣២លានដុល្លារ និងអាចបង្កើតការងារធ្វើប្រមាណ​ជាង ២០០កន្លែង។​

ឯកឧត្តម ស៊ុន ចាន់ថុល ឧបនាយករដ្ឋមន្រ្តី និងអនុប្រធានទី១នៃក្រុមប្រឹក្សាអភិវឌ្ឍន៍កម្ពុជា បានមានប្រសាសន៍នៅថ្ងៃទី៦ ខែកុម្ភៈនេះថា ក្រុមហ៊ុនផលិតរថយន្ត BYD នឹងដំឡើងររថយន្តពីរប្រភេទ គឺរថយន្តអគ្គីសនី និងរថយន្តប្រើប្រេងឥន្ទនៈ។

ថ្លែងប្រាប់អ្នកសារព័ត៌មានក្រោយកិច្ចប្រជុំមួយនៅព្រឹកថ្ងៃទី៦ ​ខែកុម្ភៈ ឯកឧត្តម ស៊ុន ចាន់ថុល បានបញ្ជាក់ថា៖ “ក្រុមហ៊ុន BYD កំពុងរៀបចំបង្កើតរោងចក្រផ្គុំដំឡើងរថយន្តនៅតំបន់សេដ្ឋកិច្ចពិសេសក្នុងខេត្តព្រះសីហនុ ហើយ​ប្រហែលជាខែ១១ឆ្នាំនេះ យើងនឹងឃើញរថយន្តEV ចេញពីរោងចក្រនៅកម្ពុជាយើងហើយ”។​

បើតាមឯកឧត្តម ស៊ុន ចាន់ថុល ក្នុងដំណាលកាលដំបូង ក្រុមហ៊ុនផលិតរថយន្ត BYD នឹងនាំចូលគ្រឿងបង្គុំពីក្រៅប្រទេស មកផ្គុំដំឡើងក្នុងស្រុក ហើយជំហានបន្ទាប់ ក្រុមហ៊ុន នឹងប្រើប្រាស់គ្រឿងបង្គុំរថយន្តមានក្នុងស្រុកដើម្បីផ្គុំដំឡើង។

ឯកឧត្តមឧបនាយករដ្ឋមន្រ្តី លើកឡើងថា វត្តមាននៃគម្រោងវិនិយោគផ្គុំដំឡើងរថយន្ត BYD ឆ្លុះបញ្ជាំងពីទំនុកចិត្តរបស់វិនិយោគិន និងស្ថិរភាពនិយោបាយ នៅកម្ពុជា។​

បន្ថែមពីលើរោងចក្រដំឡើងរថយន្ត BYD បានបង្កើតមជ្ឈមណ្ឌលសេវាកម្មចំនួនពីរ និងមានគោលបំណងដំឡើងស្ថានីយ៍សាករថយន្តអគ្គិសនីចំនួន ២០០ទីតាំងទៀត នៅទូទាំងតំបន់ផ្សេងៗក្នុងប្រទេសកម្ពុជា ក្នុងគោលបំណងដើម្បីពង្រឹងហេដ្ឋារចនាសម្ព័ន្ធសម្រាប់យានយន្តអគ្គិសនីបន្ថែមទៀត។

ជាមួយនឹងការវិនិយោគនេះ BYD ចូលរួមជាមួយក្រុមក្រុមហ៊ុនផលិតរថយន្តល្បីៗផ្សេងទៀតនៅក្នុងប្រទេសកម្ពុជា រួមទាំងក្រុមហ៊ុន Ford, Toyota និង Hyundai ដែលជាសញ្ញានៃអនាគតដ៏ជោគជ័យសម្រាប់វិស័យរថយន្តរបស់ប្រទេស។ ការមកដល់របស់ BYD នៅកម្ពុជា គឺជាជំហានដ៏សំខាន់មួយឆ្ពោះទៅរកការជំរុញឧស្សាហកម្មយានយន្តរបស់ប្រទេស និងការលើកកម្ពស់ដំណោះស្រាយដឹកជញ្ជូនប្រកបដោយនិរន្តរភាព។