ស្ពានអាកាសព្រះមុនីវង្ស សម្ពោធភ្ជាប់គ្នាជាផ្លូវការ ខណៈសង់បាន ៨០%ហើយ

• 29 ខែ​មករា 2024
• Uncategorized
• 3 មើល

ស្ពានអាកាស (ខ្សែមេ) រវាងមហាវិថី សម្តេច ហ៊ុន សែន និងមហាវិថីព្រះមុនីវង្ស ត្រូវបានតភ្ជាប់ជាផ្លូវការ ខណៈការសាងសង់ដំណាក់កាលទី១ សម្រេចបាន ៨០%ហើយ។ នេះបើតាមពិធីភ្ជាប់ស្ពានដែលប្រព្រឹត្តិឡើងក្រោមអធិបតីភាព ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ នៅថ្ងៃទី២៩ ខែមករា ឆ្នាំ២០២៤។

មួយវិញទៀត បើតាមទំព័រហ្វេកប៊ុកផ្លូវការ​ របស់ ឯកឧត្តម កើត ឆែ អភិបាលរងរាជធានីភ្នំពេញ បានឱ្យដឹងថា ការសាងសង់ស្ពានអាកាសព្រះមុនីវង្ស នៅចំនុចប្រសព្វរវាងមហាវិថីព្រះមុនីវង្ស មហាវិថីសម្តេចតេជោ ហ៊ុន សែន និង មហាវិថីយោធពលខេមរភូមិន្ទ (ផ្លូវ២៧១) ដំណាក់កាលទី១(ស្ពានអាកាសជាន់ទី២) សម្រេចសបានប្រមាណ៨០% ហើយ ដោយដំណាក់កាលទី១ គ្រោងនឹងបញ្ចប់នៅចុងខែមីនា ឆ្នាំ២០២៤ ខាងមុខនេះ។  ដោយឡែកដំណាក់កាលទី២ គ្រោងនឹងបញ្ចប់មុនចូលឆ្នាំប្រពៃណីជាតិខ្មែរ ឆ្នាំ២០២៥។

គួររំលឹកថា គម្រោងស្ពានអាកាសមហាវិថីព្រះមុនីវង្សនេះ ត្រូវបានបើកការដ្ឋានសាងសង់នៅថ្ងៃទី ៣១ ខែសីហា ឆ្នាំ ២០២២ និងសាងសង់ដោយក្រុមហ៊ុនវិនិយោគទុនអាណិកជនកម្ពុជា OCIC ប្រើប្រាស់រយៈពេលសាងសង់ ៣៦ខែ។ (អានបន្ថែម)