អាកាសយានដ្ឋានកម្ពុជាគ្រោងនឹងពង្រីកព្រលានយន្តខេត្តព្រះសីហនុដើម្បីទទួលការចុះចត�

• 29 ខែ​មិថុនា 2018
• Uncategorized
• 3 មើល

ថ្លែងក្នុងឱកាសបើកសម្ភោធអគារអ្នកដំណើរថ្មីក្នុងអាកាសយានដ្ឋានអន្តរជាតិខេត្តព្រះសីហនុកាលពីថ្ងៃទី ២៧ ខែមិថុនាឆ្នាំ ២០១៨ ក្រុមហ៊ុន Cambodia Airports បានប្រកាសពីគម្រោងនាពេលអនាគតមួយទៀតគឺការពង្រីកអាកាសយានដ្ឋានអន្តរជាតិខេត្តព្រះសីហនុដើម្បីទទួលការចុះចតយន្តហោះធំៗ នាពេលអនាគត។

គម្រោងនេះ គឺជាការពង្រីកផ្លូវរត់យន្តហោះបន្ថែមប្រវែង ៨០០ម៉ែត្រ ទៀត ទៅលើផ្លូវបច្ចុប្បន្ន។ ក្រោយពង្រីក ផ្លូវរត់យន្តហោះនៅអាកាសយានដ្ឋានអន្តរជាតិខេត្តព្រះសីហនុនឹងក្លាយជាផ្លូវរត់ ៣,៣ គីឡូម៉ែត្រ ដែលនឹងអាចទទួលការចុះចតរបស់យន្តហោះធំៗបាន។

បើយោងទៅតាមសេចក្តីប្រកាសព័ត៌មានរបស់ក្រុមហ៊ុន Cambodia Airports បានឲ្យដឹងថា ការពង្រីកនេះគឺដើម្បីឆ្លើយតបទៅនិងតម្រូវការកើនឡើងនៃចំនួនជើងយន្តហោះដែលចូលមកកាន់ខេត្តព្រះសីហនុនាពេលបច្ចុប្បន្ន និងនាពេលអនាគត។

ក្នុងរយះពេល ៥ ឆ្នាំចុងក្រោយនេះ ឃើញថា ចំនួនអ្នកដំណើរដែលប្រើប្រាស់អាកាសយានដ្ឋានអន្តរជាតិខេត្តព្រះសីហនុ បានកើនឡើងជាបន្តបន្ទាប់។ ក្នុងឆ្នាំ២០១៧ អាកាសយានដ្ឋានមួយនេះទទួលបានអ្នកដំណើរប្រមាណជាង ៣៣៨.០០០ នាក់ ដែលកើនរហូតដល់ទៅ ១១៥% បើធៀបទៅនឹងឆ្នាំ២០១៦។

ដោយឡែក ចំពោះការ កែលម្អអគារអ្នកដំណើរដែលទើបតែដាក់សម្ពោធថ្មីមួយនេះវិញ ក៏បានធ្វើឲ្យអគារនេះធំជាងមុនដល់ទៅ ៨០% ដោយអគារទាំងមូលមាន ៤៨០០ម៉ែត្រការ៉េ។ កែលម្អថ្មីនេះរួមមាន ការបន្ថែមច្រក check-in ច្រកឡើងយន្តហោះ និងកន្លែងយកអីវ៉ាន់។

ពិសេសជាងនេះទៅទៀតនោះ គឺមានការបើកនូវភោជនីយដ្ឋានលំដាប់អន្តរជាតិពេញនិយមជាច្រើន ដូចជា Blue Flight, Plaza Premium Lounge និង The Monkey Republic នៅក្នុងអគារអ្នកដំណើរថ្មីមួយនេះផងដែរ។

ជាក់ស្ដែងណាស់ ការបើកសម្ពោធស្ថានីយអ្នកដំណើរថ្មីមួយនេះគឺជាការឆ្លុះបញ្ចាំងពីការរីកចំរើននៃឧស្សាហកម្មអាកាសចរណ៍នៅកម្ពុជា។