ផ្លូវល្បឿនលឿន ភ្នំពេញ-ខេត្តព្រះសីហនុ នឹងបើកការដ្ឋាននៅចុងខែមីនានេះ

• 5 ខែ​មីនា 2019
• Uncategorized
• 4 មើល

ផ្លូវល្បឿនលឿន ដែលមានតម្លៃជិត ២ពាន់លាន ដុល្លារអាមេរិក នឹងត្រូវបើកការដ្ឋាន នៅថ្ងៃទី ២២ ខែមីនា ឆ្នាំ២០១៩។ នេះបើយោងតាមការផ្សាយព័ត៌មានផ្លូវការរបស់ ក្រសួងសាធារណការ និងដឹកជញ្ជូនកម្ពុជា។

គម្រោងខាងលើនេះ គឺមានប្រវែងប្រវែងផ្លូវសរុប ១៩០.៣៦៥គ.ម ដែលអាចកាត់បន្ថយចំងាយផ្លូវធ្វើដំណើររហូតដល់ ៥០គ.ម ដែលផ្លូវបច្ចុប្បន្នមានចំងាយ ២៤០គ.ម។ ផ្លូវនេះនឹងសាងសង់ជា ៤គន្លង ២គន្លងទៅ ២គន្លងមក ជាប្រភេទផ្លូវក្រាលបេតុងកៅស៊ូ (AC) កំរាស់ ១០ស.ម និងថ្មលាយកៅស៊ូ (ATB) ១ ស.ម ហើយទទឹងផ្លូវនឹងពង្រីករហូតដល់ ២៤.៥ ម៉ែត្រ។

បើយោងតាមប្រភពដដែល ផ្លូវនេះនឹងចេញពីភ្នំពេញនៅចំណុចផ្លូវខ្សែក្រវ៉ាត់ក្រុងទី៣ មានផ្លូវបំបែកប្តូរទិស (Inter-Change) ភ្ជាប់មកផ្លូវជាតិលេខ៤ ចំនួន ៧កន្លែង មានស្ពានវែង-មធ្យម ៥៦កន្លែង ប្រវែង ៤.៤១៧ម៉ែត្រ ស្ពានខ្លី ៣៣កន្លែង ប្រវែង ៧៥០ម៉ែត្រ ស្ពានរំលង ៣២១កន្លែង កន្លែងឈប់សម្រាក ៣កន្លែង និងហេដ្ឋារចនាសម្ព័ន្ធសំណង់សេវាគាំទ្រជាច្រើនទៀត។

លើសពីនេះ ផ្លូវល្បឿនលឿននេះ នឹងត្រូវធ្វើការខណ្ឌគ្នាដោយសួនច្បារនៅកណ្ដាលទ្រូងផ្លូវ និងមានរបាំងអមសងខាងផ្លូវសម្រាប់ការពារសត្វ ឬមនុស្សឆ្លងកាត់។

គួរបញ្ជាក់ផងដែរថា ការវិនិយោគលើ គម្រោងផ្លូវល្បឿនលឿននេះ ត្រូវអនុវត្តតាមទម្រង់សាងសង់-ប្រតិបត្តិ-ផ្ទេរ (BOT) ដោយប្រើប្រាស់រយៈពេល សាងសង់ចំនួន ៤៨ ខែ។