សាលាក្រុងគ្រោងសាងសង់ស្ពានឆ្លងតភ្ជាប់សង្កាត់ព្រែកប្រា និងសង្កាត់ចាក់អង្រែ

• 18 ខែ​ធ្នូ 2019
• Uncategorized @km
• 4 មើល

រដ្ឋាបាលរាជធានីភ្នំពេញ គ្រោងសាងសង់ស្ពានឆ្លងកាត់ទន្លេបាសាក់ ដើម្បីតភ្ជាប់សង្កាត់ចាក់អង្រែ ក្នុងខណ្ឌមានជ័យ និងសង្កាត់ព្រែកប្រា ក្នុងខណ្ឌច្បារអំពៅ។

នៅក្នុងសេចក្តីសម្រេច ចុះថ្ងៃទី១៣ លោក ឃួង ស្រេង អភិបាលរាជធានីភ្នំពេញ បានបង្កើតក្រុមការងារចុះសិក្សាគម្រោងសាងសង់ស្ពានកាត់ទន្លេបាសាក់។ ក្រុមការងារចុះសិក្សាគម្រោង ដឹកនាំដោយលោក ស៊ុយ សេរិទ្ធ អភិបាលរងរាជធានីភ្នំពេញ។

បើតាមសេចក្តីសម្រេច ក្រុមការងារត្រូវចុះសិក្សាកំណត់ទីតាំងសាងសង់ ដើម្បីលើកគម្រោងប្លង់សាងសង់ស្ពានឆ្លងកាត់ទន្លេបាសាក់ឲ្យបានត្រឹមត្រូវ ត្រង់ចំណុចភូមិសាស្រ្តសង្កាត់ព្រែកប្រា និងសង្កាត់ចាក់អង្រែ។

សេចក្តីសម្រេចបន្តថា ក្រុមការងារត្រូវចុះស្រង់ស្ថិតិប្រជាពលរដ្ឋដែលរងផលប៉ះពាល់ពីការសាងសង់ស្ពានទន្លេបាសាក់ និងស្នើឲ្យមន្រ្តីក្រោមឪវាទជួយដល់ការងារសិក្សាគម្រោងសាងសង់ស្ពានឆ្លងកាត់ទន្លេបាសាក់នេះ។

គួរជម្រាបជូនថា ទន្លេបាសាក់ បច្ចុប្បន្នចាប់ពីចំនុចមុខវាំងដល់ភូមិសាស្រ្តស្រុកស្អាង មានស្ពាន ព្រះមុន្នីវង្ស ឬស្ពានច្បារអំពៅ ចំនួនពីរខ្សែ ស្ពានព្រែកសំរោង និងស្ពានកោះធំ៕

រូបថតគំរូដើម្បីងាយយល់

• គម្រោងអភិវឌ្ឍន៍
• នគរូបនីយកម្ម និងស្ថាបត្យកម្ម