ថវិកា ១០០ លានដុល្លារត្រូវបានអនុម័តសម្រាប់ហេដ្ឋារចនាសម្ព័ន្ធនៅខេត្តព្រះសីហនុ

• 6 ខែ​កញ្ញា 2019
• Uncategorized
• 4 មើល

រដ្ឋាភិបាលកាលនៅថ្ងៃទី ០៤ ខែកញ្ញា បានអនុម័តថវិកាចំនួន ១០០ លានដុល្លារអាមេរិកសម្រាប់សាងសង់ និងស្តារ ហេដ្ឋារចនាសម្ព័ន្ធក្នុងខេត្តព្រះសីហនុ។

កញ្ចប់ថវិកានេះ បញ្ចេញបន្ទាប់ពីផ្នែកខ្លះនៃហេដ្ឋារចនាសម្ព័ន្ធរូបវន្ត ដូចជាផ្លូវថ្នល់ និងអូរធម្មជាតិត្រូវបានខូចខាតខ្លាំង ស្របពេលដែលខេត្តព្រះសីហនុមានការកើនឡើងនៃសំណង់ ប្រជាជន សំរាម និងបរិមាណទឹកភ្លៀងក្នុងរដូវវស្សា។

ក្រសួងសេដ្ឋកិច្ច និងហិរញ្ញវត្ថុបានបញ្ជាក់ក្នុងសេចក្តីប្រកាសព័ត៌មានកម្រាស់២ទំព័រថា គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជាអនុម័ត ថវិកាចំនួន ១០០ ដុល្លារសហរដ្ឋអាមេរិកសម្រាប់ការសាងសង់ផ្លូវក្នុងក្រុង ផ្លូវវាងក្រុង ប្រព័ន្ធរំដោះទឹកភ្លៀង និងប្រព័ន្ធទឺកកង្វក់ ក្នុងខេត្តព្រះសីហនុដែលបានពិភាក្សាកន្លងមក។ (អានបន្ថែម)

ដើម្បីបើកមុខទឹកហូរ និងដោះស្រាយជំនន់ ទឹកភ្លៀង គម្រោងនេះនឹងមានការស្តារអូរធម្មជាតិចំនួន ៥ និងលូដែលមានស្រាប់ ដែលសព្វថ្ងៃកំពុងទទួលរងការរំលោភយកចំណីអូរ និងប្រឡាយ។

លើសពីនេះទៀត គម្រោងនេះក៏មានការជួសជុលផ្លូវចំនួន ២២ ខ្សែ នៅទូទាំងទីក្រុងស្របតាមស្តង់ដារបច្ចេកទេស។ ការស្ថាបនាផ្លូវនេះ នឹងផ្តោតលើវិធានការបច្ចេកទេស ដូចជា គុណភាពសំណង់ ទំហំផ្លូវ ការបំពាក់ខ្សែកាប បណ្តាញទូរគមនាគមន៍ បំពង់ទឹកស្អាត និងប្រព័ន្ធទឹកកង្វក់និងទឹកភ្លៀង។

យោងតាមលទ្ធផលនៃការសិក្សាលទ្ធភាពដែលបានពិភាក្សាថ្មីៗនេះ គម្រោងខាងលើគ្រោងនឹងអនុវត្តជាបីដំណាក់កាល ដែលដំណាក់កាលទី ១ ចាប់ពីឆ្នាំ ២០១៩-២០២១ ដំណាក់កាលទី ២ ចាប់ពី ២០២១-២០២៣ និងដំណាក់កាលទី ៣ ចាប់ពី ២០២៣-២០៣០ ។ (អានបន្ថែម)

រូបភាពគោលដោយ ទំព័រហ្វ៊េសប៊ុក ក្រសួងសាធារណការ និងដឹកជញ្ជូន