ទីលានគ្រប់គ្រងសំណល់រឹង តម្លៃជិត២លានដុល្លារ នៅពោធិ៍សាត់ សម្រេចបានជិត១០០%ហើយ

• 29 ខែ​ធ្នូ 2021
• Uncategorized
• 4 មើល

ទីលានគ្រប់គ្រងសំណល់រឹងស្ដង់ដាមួយ នៅក្រុងពោធិ៍សាត់ ត្រូវបានសាងសង់រួចបានប្រមាណជាង ៩៨% ហើយ ដោយគ្រោងនឹងប្រកាសដាក់ឱ្យដំណើរការក្នុងពេលឆាប់ៗខាងមុខនេះ។ នេះបើយោងតាមកិច្ចចុះពិនិត្យការដ្ឋាន កាលពីថ្ងៃទី២៨ ធ្នូ របស់អភិបាលខេត្តពោធិ៍សាត់ឯកឧត្តម ជាវ តាយ។

បើគិតពីការងារជាផ្នែកសំខាន់ៗ រណ្តៅទុកដាក់សំរាមទី១ និងទី២ សម្រេចបាន ១០០% អគាររដ្ឋបាល ១០០% ឃ្លាំងសម្រាប់ហាល ឬស្តុកកករខាប់(ភក់) ៧០% អាងចម្រោះទឹករងៃ ១០០% ការដាក់បង្គោលភ្លើង ១០០% ស្រះបំប្លែងក្លិនទឹក ៨១% ច្រកទ្វារចេញចូល ៥០% និងកន្លែងថ្លឹងរថយន្តដឹកសំរាម ៤៤,៥២%។

ទីលានគ្រប់គ្រងសំណល់រឹងនេះមានទីតាំងស្ថិតក្នុងភូមិទួលម្កាក់ សង្កាត់រលាប ក្រុងពោធិ៍សាត់ ដែលសាងសង់ឡើងក្រោមកម្ចីសម្បទានរបស់ធនាគារអភិវឌ្ឍន៍អាស៊ី (ADB) ប្រមាណ១,៦លានដុល្លារ។

គម្រោងនេះ សាងសង់ដោយក្រុមហ៊ុន អ៊ឹង ស៊ឹមស៊ា ខនស្ត្រាក់សិន លើផ្ទៃដីប្រមាណជាង ១៥ហិកតា ដែលចាប់អនុវត្តតាំងពីខែមេសា ឆ្នាំ២០២០កន្លងទៅ។

ឯកឧត្តម ជាវ តាយ ក៏បានបានពន្លឿនក្រុមហ៊ុនសាងសង់ ដើម្បីឱ្យដំណើរការនៃការកសាងគម្រោង ទីលានគ្រប់គ្រងសំណល់រឹងនេះ បានលឿន និងឆាប់រហ័ស ដើម្បីឆ្លើយតបទៅនឹងតម្រូវការចាំបាច់។

• គម្រោងអភិវឌ្ឍន៍