ការសិក្សាគម្រោងធ្វើទំនើបកម្មផ្លូវដែកមានស្រាប់ទៅជាល្បឿនលឿន នឹងបញ្ចប់ ៣ ខែខាងមុខ

• 22 ខែ​មេសា 2022
• Uncategorized
• 4 មើល

ក្រសួងសាធារណការ និងដឹកជញ្ជូន កំពុងសិក្សាលទ្ធភាពធ្វើទំនើបកម្មផ្លូវដែកដែលមានស្រាប់ ២ ខ្សែ គឺភ្នំពេញ-ប៉ោយប៉ែត និងភ្នំពេញ-ព្រះសីហនុ ទៅជាផ្លូវដែកល្បឿនលឿន ដោយដាក់ផែនការថានឹងបញ្ចប់ក្នុងរយៈពេល ៣ ខែខាងមុខ។

ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងដូច្នេះ ក្នុ្ងងកិច្ចប្រជុំជាមួយឯកឧត្តម Saksayam Chidchob រដ្ឋមន្រ្តីក្រសួងដឹកជញ្ជូនថៃ តាមប្រព័ន្ធវីដេអូពី ចម្ងាយនៅថ្ងៃទី២០ ខែមេសា។

ឯកឧត្តម ថាការសិក្សាគម្រោងផ្លូវដែកល្បឿនលឿននៅកម្ពុជា គឺស្របពេលដែលប្រទេសកម្ពុជា និងប្រទេសថៃ បាន និងកំពុងជំរុញការបើកច្រកព្រំដែនអន្តរជាតិស្ទឹងបត់-បានណងអៀន ដើម្បីសម្រួលការដឹកជញ្ជូនទំនិញឆ្លងកាត់ព្រំដែន។

«ការតភ្ជាប់ហេដ្ឋារចនាសម្ព័ន្ធរូបវន្តរវាងប្រទេសទាំង២ មិនគ្រាន់តែបង្កើនទំហំនៃការធ្វើពាណិជ្ជកម្ម ទេសចរណ៍ និងវិនិយោគប៉ុណ្ណោះទេ ប៉ុន្តែថែមទាំងជាកត្តាគន្លឹះជួយជំរុញដល់កំណើនការអភិវឌ្ឍសេដ្ឋកិច្ចរបស់ប្រទេសទាំង២ ផងដែរ»។

គួរបញ្ជាក់ថា ការសិក្សាធ្វើទំនើបកម្មផ្លូវដែកនេះ ធ្វើឡើងក្រោយសម្តេចនាយករដ្ឋមន្ត្រី ហ៊ុន សែន ប្រកាសជំរុញឱ្យក្រសួងពន្លឿនការងារ ធ្វើទំនើបកម្មរថភ្លើងទាំង ២ខ្សែ និងសង់ផ្លូវដែកបន្ថែមជាច្រើនខ្សែទៀត។ (អានបន្ថែម)