English 
ខ្មែរ 
សម្ដេចហ៊ុន សែន គ្រោងចំណាយ ១០០ លានដុល្លារសង់ស្ពានតាម ទន្លេតូច និងស្ទឹងទូទាំងប្រទេស
សម្ដេចនាយករដ្ឋមន្ត្រី ហ៊ុន សែន បានប្រកាសថា កម្ពុជាចង់ចំណាយថវិកាជាតិផ្ទាល់យ៉ាងហោច ២,៣ ពាន់លានដុល្លារ ដើម្បីសាងសង់ហេដ្ឋារចនាសម្ព័ន្ធទូទាំងប្រទេស ក្នុងនោះយ៉ាងហោច ១០០ លានដុល្លារ សង់ស្ពានតាមទន្លេតូច និងស្ទឹងទូទាំងប្រទេស ខណៈនៅសល់នឹងសាងសង់ផ្លូវ និងស្ពានធំៗឆ្លងទន្លេមេគង្គ ទន្លេសាប និងទន្លេបាសាក់បន្ថែមទៀត។
សម្ដេចតេជោ ហ៊ុន សែន បានឱ្យដឹងដូច្នេះ ក្នុងពិធីសម្ពោធស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ និងបើកការដ្ឋានសាងសង់ផ្លូវជាតិលេខ៧១C នៅថ្ងៃទី២៣ ខែវិច្ឆិកា នេះ។ (អានបន្ថែម)
សម្ដេចតេជោ ហ៊ុន សែន មានប្រសាសន៍ថា ជាក់ស្ដែង មុនវិបត្តិកូវីដ-១៩ រដ្ឋាភិបាលបានសន្សំសាច់ប្រាក់បានមួយចំនួនធំ។ កន្លងមក ទឹកប្រាក់ជិត ១លានដុល្លារ របស់រដ្ឋផ្ទាល់ត្រូវបានប្រើលើគម្រោងរោងចក្រអគ្គិសនីនៅភ្នំពេញ គម្រោងផ្លូវ ៣៤ខ្សែនៅព្រះសីហនុ និងផ្លូវ៣៨ ខ្សែនៅសៀមរាប ។
សម្ដេចបន្ដថា ពេលនោះយើងនៅសល់ជិត ៣,៥ ពាន់លានទៀត ដែល ២/៣ គឺគ្រោងនឹងចំណាយលើការកសាងហេដ្ឋារចនាសម្ព័ន្ធនានា។ ក្នុងនោះសម្ដេចក៏ចង់ចំណាយយ៉ាងហោច ១០០ លានដុល្លារ សាងសង់ស្ពាន។
«ខ្ញុំចង់ឱ្យស្ទឹងព្រែកត្នោត ២ គីឡូម៉ែត្រ មានស្ពាន១។ ទន្លេតូចៗ ស្ទឹងពោធិ៍សាត់ ស្ទឹងមង្គលបូរី ស្ទឹងសង្កែ ស្ទឹងសែន ២-៣ គីឡូម៉ែត្រ ស្ពាន១។ ស្ពាន ១ ត្រឹម១លានដុល្លារ ប្រើតែ១០០លាន បាន ១០០ស្ពាន។ ហើយយើងដាក់ស្ពានឆ្លងទន្លេមេគង្គ ទន្លេសាប និងទន្លេបាសាក់បន្ថែមទៀត» សម្ដេចមានប្រសាសន៍.
«ប៉ុន្តែ ដោយសារវិបត្តិកូវីដ កម្ពុជាបានចំណាយអស់ ២,៣ ពាន់លានដុល្លារ។ ដូច្នេះ ដើម្បីធ្វើស្ពានថ្នល់បាន យើងត្រូវបន្ដសុំជំនួយពីចិន និងដៃគូនានា»។
សម្ដេច ក៏បានបញ្ជាក់ចុងក្រោយថា ប្រទេសចិនជាមិត្តស្អិតរមួតជាមួយកម្ពុជាណាស់ ដោយសារប្រទេសចិនតែងតែជូនតាមសំណើរបស់កម្ពុជា។