ជប៉ុនសិក្សាគម្រោងពង្រីកផែព្រះសីហនុ ជំហានទី២ និង៣ ចប់ហើយ អាចនឹងលេចរូបរាងឆ្នាំ២០៣០

• 9 ខែ​ធ្នូ 2021
• Uncategorized
• 5 មើល

រដ្ឋមន្ត្រីក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល បានគាំទ្រ និងបើកភ្លើងខៀវលើលទ្ធផលសិក្សាគម្រោងពង្រីកកំពង់ផែសីហនុជំហានទី២ និងទី៣ ដែលទើបតែបញ្ចប់ដោយទីភ្នាក់ងារ JICA របស់ប្រទេសជប៉ុន ខណៈគម្រោងអាចនឹងលេចជារូបរាង ជាផ្លែផ្កានៅឆ្នាំ ២០៣០ ខាងមុខនេះ។

នេះបើយោងតាមជំនួបសម្តែងការគួរសមរវាង ឯកឧត្តម ស៊ុន ចាន់ថុល និងឯកឧត្តម លូ គឹមឈន់ ប្រធានអគ្គនាយកកំពង់ផែស្វយ័តក្រុងព្រះសីហនុ កាលពីថ្ងៃទី៨ ខែធ្នូ នេះ។

យោងតាមលទ្ធផលនៃការសិក្សា ជំហានទី ២ និង ទី៣ នេះ គឺនឹងពង្រីកផែឱ្យមានជម្រៅ ១៦ម៉ែត្រ និង ១៧,៥០ម៉ែត្រ ខណៈការសាងសង់អាចនឹងបញ្ចប់នៅឆ្នាំ ២០២៨ និង ២០៣០ រៀងៗគ្នា។

ជុំវិញរឿងនេះ ឯកឧត្តម ស៊ុន ចាន់ថុល បានណែនាំថា ជំហានទាំង ២ គួរប្រើប្រាស់កញ្ចប់ថវិកា ទីប្រឹក្សាសិក្សាគូរប្លង់ និងត្រួតពិនិត្យគម្រោងតែមួយ ប៉ុន្តែក្រុមហ៊ុនសាងសង់អាចមាន ២ ក្រុមហ៊ុន ដើម្បីពន្លឿនការសាងសង់។

គួរបញ្ជាក់ថា បើតាមផែនការ គម្រោងពង្រីកកំពង់ផែទឹកជ្រៅខេត្តព្រះសីហនុមានសរុប ៥ជំហាន។ ជំហានទី១ ជប៉ុនផ្ដល់កម្ចីជាង ២០០លានដុល្លារ ដើម្បីពង្រីកកំពង់ផែទៅជម្រៅ ១៤,៥ម៉ែត្រ និងប្រវែង ៣៥០ម៉ែត្រ។

សម្រាប់ជំហានទី១ នេះ ក្រុមការងារបានបញ្ចប់ការគូរប្លង់ហើយ បច្ចុប្បន្នស្ថិតក្នុងដំណាក់កាលដាក់ដេញថ្លៃ ជ្រើសរើសអ្នកសាងសង់ ខណៈការដ្ឋានគ្រោងនឹងចាប់ផ្ដើមនៅឆ្នាំ ២០២២ ខាងមុខនេះ។ (អានបន្ថែម)

ដោយឡែក សម្រាប់រយៈពេលវែង គឺជំហានទី៤ និង ៥ គឺគ្រោងនឹងពង្រីកជម្រៅដល់ទៅ ១៨,៥ និង ១៩ ម៉ែត្រ។

• គម្រោងអភិវឌ្ឍន៍
• ផ្លូវ និងហេដ្ឋារចនាសម្ព័ន្ធ
• គម្រោងហេដ្ឋារចនាសម្ព័ន្ធ និងវិស្វកម្មធំៗ