ផ្លូវជាតិលេខ៥ (ព្រែកក្តាម-បាត់ដំបង) សម្ពោធឱ្យប្រើប្រាស់ជាផ្លូវការហើយ

• 22 ខែ​វិច្ឆិកា 2023
• Uncategorized
• 4 មើល

កំណាត់ផ្លូវជាតិលេខ៥ ពីព្រែកក្តាម រហូតដល់ខេត្តបាត់ដំបង ត្រូវបានសម្ពោធបើកឱ្យប្រើប្រាស់ជាផ្លូវការហើយ ក្រោយប្រើរយៈពេល ៧ឆ្នាំក្នុងការសាងសង់។ ការដាក់ឱ្យប្រើប្រាស់នេះ ធ្វើឡើងក្រោមអធិបតីភាពសម្តេច ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា  នៅព្រឹកថ្ងៃទី២២ ខែវិច្ឆិកា ឆ្នាំ២០២៣។

គម្រោងធ្វើឱ្យប្រសើរឡើងវិញនៃកំណាត់ផ្លូវជាតិលេខ៥នេះ មានប្រវែងសរុប ៣៣០គីឡូម៉ែត្រ គិតចាប់ពីចំណុច ស្ពានព្រែកក្តាម ខេត្តកណ្តាល រហូតដល់ក្រុងសិរីសោភ័ណ ខេត្តបន្ទាយមានជ័យ បែងចែកជា ៣កំណាត់ រួមមាន៖ កំណាត់ផ្លូវភាគខាងត្បូង (ព្រែកក្តាម-ធ្លាម្អម), កំណាត់ផ្លូវភាគកណ្ដាល (ធ្លាម្អម-បាត់ដំបង) និងកំណាត់ផ្លូវភាគខាងជើង (បាត់ដំបង-សិរីសោភ័ណ និងចំណាយថវិកាសរុបប្រមាណ ៦៩១លានដុល្លារ ដែលជាឥណទានសម្ប ទានពីរដ្ឋាភិបាលប្រទេសជប៉ុន។

ក្នុងនោះ កំណាត់ផ្លូវភាគខាងជើង (បាត់ដំបង-សិរីសោភ័ណ) បានសម្ពោធបើកឱ្យប្រើប្រាស់ជាផ្លូវការ កាលពីថ្ងៃទី១០ ខែមករា ឆ្នាំ២០២២។ (អានបន្ថែម)

បន្ថែមពីនេះ កំណាត់ផ្លូវភាគខាងត្បូង (ព្រែកក្តាម-ធ្លាម្អម) មានប្រវែង ១៣៥គីឡូម៉ែត្រ មានចំណុចចាប់ផ្តើមពីស្ពានព្រែកក្តាម ឆ្លងកាត់ខេត្តកណ្តាល ខេត្តកំពង់ឆ្នាំង និងខេត្តពោធិ៍សាត់ ក្នុងនោះមានការសាងសង់ស្ពានថ្មី និងជួសជុលស្ពានចាស់ចំនួន ៣៣កន្លែង ប្រវែងសរុប ៧៤៩ម៉ែត្រ និងបានដាក់លូចំនួន ២៤៥កន្លែង។

ដោយឡែក កំណាត់ផ្លូវភាគកណ្ដាល (ធ្លាម្អម-បាត់ដំបង) មានប្រវែង ១១០,៩០គីឡូម៉ែត្រ មានចំណុចចាប់ផ្តើមពី ធ្លាម្អម ឆ្លងកាត់ខេត្តពោធិ៍សាត់ និងខេត្តបាត់ដំបង ក្នុងនោះមានការសាងសង់ស្ពានថ្មី និងជួសជុលស្ពានចាស់ចំនួន ៣១កន្លែង ប្រវែងសរុប ១.៤១៨ម៉ែត្រ និងបានដាក់លូចំនួន ១៣០កន្លែង។

ទន្ទឹមនឹងសម្ពោធដាក់ឱ្យប្រើប្រាស់កំណាត់ផ្លូវជាតិលេខ៥ (ព្រែកក្តាម-បាត់ដំបង) រាជរដ្ឋាភិបាល ក៏បានបើកការដ្ឋានសាងសង់កំណាត់ចុងក្រោយរបស់ផ្លូវជាតិលេខ៥ ពីសិរីសោភ័ណ ទៅកាន់ប៉ោយប៉ែតដែលមានប្រវែង ៣៥,១៤គ.ម ដោយគ្រោងចំណាយថវិកា ៥២,៥៦លានដុល្លារ (នេះជាថវិកាបដិភាគរបស់រដ្ឋាភិបាលកម្ពុជានិងជំនួយឥណទានរបស់រដ្ឋាភិបាលជប៉ុន)។ គម្រោងនេះដែរ ក៏គ្រោងនឹងបញ្ជប់ការសាងសង់នៅខែមីនា ឆ្នាំ២០២៥។ (អានបន្ថែម)

នាឱកាសនោះដែរ សម្តេច ហ៊ុន ម៉ាណែត បានបញ្ជាក់ថា ផ្លូវជាតិលេខ៥ ជាសរសៃឈាមដ៏សំខាន់សម្រាប់ប្រទេសកម្ពុជា ហើយក៏សំណូមពរដល់ប្រជាពលរដ្ឋទាំងអស់ ពិសេសគឺវិស័យដឹកជញ្ជូនរបស់ក្រុមហ៊ុនឯកជន ឱ្យចូលរួមថែរក្សា និងការពារ (កុំដឹកលើសទម្ងន់ដែលបានកំណត់ដោយច្បាប់) ។​