ក្រសួងសេដកិច្ចកម្ពុជាព្យាករថា៖ ក្នុងឆ្នាំ២០២៥នេះ កម្ពុជាមានកំណើនសេដ្ឋកិច្ចស្ថិតក្នុងរង្វង់ ៦.៣%

• 14 ខែ​កុម្ភៈ 2025
• Uncategorized
• 4 មើល

ក្រសួងសេដ្ឋកិច្ច និងហិរញ្ញវត្ថុ បានព្យាករកំណើនសេដ្ឋកិច្ចរបស់កម្ពុជាស្ថិតក្នុងរង្វង់ ៦.៣ភាគរយ ក្នុងឆ្នាំ២០២៥ គាំទ្រដោយកំណើនខ្ពស់នៃការនាំចេញផលិតផលសំលៀកបំពាក់ វាយនភណ្ឌ និងផលិតផលកសិកម្ម និងកំណើនវិស័យសេវាកម្ម។

ក្រសួងបានចេញផ្សាយរបាយការណ៍ស្តីពីថវិកាសង្ខេបឆ្នាំ២០២៥ នៅថ្ងៃទី១០ ខែកុម្ភៈ ក្នុងវេទិកាសាធារណៈ ស្តីពីការគ្រប់គ្រង់ម៉ាក្រូសេដ្ឋកិច្ច និងច្បាប់ថវិកាឆ្នាំ២០២៥។

“យោងតាមការវាយតម្លៃនៃក្របខ័ណ្ឌហិរញ្ញវត្ថុសាធារណៈរយៈពេលមធ្យម របស់រាជរដ្ឋាភិបាល ចំពោះសេដ្ឋកិច្ចកម្ពុជា នៅឆ្នាំ២០២៥ ត្រូវបានព្យាករថាស្ថិតក្នុងអត្រាកំណើន ៦.៣ភាគរយ”។

របាយការណ៍បន្ថែមថា វិស័យឧស្សាហកម្ម ត្រូវបានរំពឹងថានឹងមានកំណើន ៨,៦ភាគរយ កំណើនវិស័យសេវាកម្ម ៥,៦ភាគរយ និងកំណើនវិស័យកសិកម្ម ១,‌១ភាគរយ។​

តាមរយៈកំណើននេះ នឹងធ្វើឱ្យ ផ.ស.ស ថ្លៃបច្ចុប្បន្នស្ថិតក្នុងរង្វ​ង់ ២០៩១៦៣ ប៊ីលានរៀល សមមូលនឹងប្រមាណ ៥១៣៩៨លានដុល្លារអាមេរិក ខណៈដែល ផ.ស.ស សម្រាប់មនុស្សម្នាក់ ត្រូវបានរំពឹងថា នឹងកើនដល់ ២៩២៤ដុល្លារអាមេរិក។​

ចំណែកឯ អាត្រាប្តូរប្រាក់រៀល គឺនៅតែបន្តស្ថិតនៅក្នុងរង្វង់ ៤០៦៩រៀល ក្នុងមួយដុល្លារអាមេរិក ក្នុងឆ្នាំ២០២៥ និងអាត្រាអតិផរណាមធ្យមប្រចាំឆ្នាំ ត្រូវបានព្យាករថានឹងស្ថិតក្នុងរង្វ​ង់ ២,៥ភាគរយ ក្នុងឆ្នាំ២០២៥។

ទុនបម្រុងអន្តរជាតិសរុប ត្រូវបានរំពឹងថា​នឹងបន្តកើនឡើងដល់ ២៤៤២៣លានដុល្លារអាមេរិក និងធានាការនាំចេញបាន ៧,៥ខែ។​

បើតាមរបាយការណ៍របស់ធនាគារជាតិនៃកម្ពុជា ការអនុវត្តដោយប្រសិទ្ធភាពនូវយុទ្ធសាស្រ្តបញ្ចកោណ-ដំណាក់កាលទី១ បានជួយជំរុញសេដ្ឋកិច្ចឱ្យបន្តងើបឡើង ក្នុងអត្រា ៦% កាលឆ្នាំ២០២៤។

• សេដ្ឋកិច្ច និងហិរញ្ញវត្ថុ