អាជ្ញាធរខេត្តត្បូងឃ្មុំ ប្រកាសបញ្ចប់ការវាស់វែងដីដោយជោគជ័យ ១០០%

• 25 ខែ​មិថុនា 2025
• Uncategorized @km
• 5 មើល

អាជ្ញាធរខេត្តត្បូងឃ្មុំ បានប្រកាសពីភាពជោគជ័យ ១០០% លើការងារចុះបញ្ជីដីធ្លីលក្ខណៈជាប្រព័ន្ធនៅទូទាំងខេត្ត ខណៈការងារនេះត្រូវបានបញ្ចប់មុនផែនការកំណត់ ដោយបានចេញបណ្ណកម្មសិទ្ធដីធ្លីបានចំនួន ៥៦.២៥៨ ក្បាលដីជូនដល់ប្រជាពលរដ្ឋ។

នេះបើតាមលោក ប៉ូច សុធារិទ្ធ ប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដី ខេត្តត្បូងឃ្មុំ ថ្លែងប្រាប់វិទ្យុជាតិកម្ពុជា កាលពីពេលថ្មីៗនេះ។

លោកប្រធានមន្ទីរបានឱ្យដឹងថា  ខេត្តត្បូងឃ្មុំមានផ្ទៃដីសរុបជាង ៥.២៥០គីឡូម៉ែត្រក្រឡា និងបានចែកចេញជា ០៦ស្រុក ០១ក្រុង មាន ០២សង្កាត់ ៦២ឃុំ និងមាន ៨៧៥ភូមិ។

លោកបានបន្តថា រហូតមកដល់ពេលនេះ ក្រុមមន្រ្តីជំនាញរបស់មន្ទីររៀបចំដែនដី បានបញ្ចប់ធ្វើការវាស់វែងដីធ្លី នៅទូទាំងខេត្ត លើក្បាលដីសរុបប្រមាណជាង ៩៥០.១១៧។

លោកប្រធានបានបន្ថែមថា  មកទល់ពេលនេះ មន្ទីរបានចេញបណ្ណកម្មសិទ្ធដីធ្លីបានចំនួន ៥៦១.២៥៨ ក្បាលដី និងបានចែកបណ្ណដល់ដៃប្រជាពលរដ្ឋ បានចំនួន ៥៥២.៦៤៩បណ្ណ។ ទន្ទឹមនឹងនោះ ការអនុវត្តការចុះបញ្ជីដីរដ្ឋ ត្រូវបានបែងចែកជា ២ គឺដីសាធារណៈរបស់រដ្ឋ និងដីឯកជនរបស់រដ្ឋសរុបចំនួន ៤.១១៧ក្បាលដី។

លោកបានបញ្ជាក់ថា ការចុះបញ្ជីដីធ្លីនេះ គឺបានជួយសម្រួលដល់ជីវភាពប្រជាពលរដ្ឋបានជាច្រើន ដូចជា៖ មានកន្លែ​​ង​រស់នៅមួយ ដែលពិតប្រាកដ អាចប្រកបមុខរបរចិញ្ចឹមជីវិត ងាយស្រួល អាស្រ័យផលលើផ្ទៃដីដែលជាកម្មសិ​ទ្ធិ​រប​ស់​ខ្លួនផ្ទាល់ ពិសេសកាត់បន្ថយនូវទំនាស់ដីធ្លីដែលកើតឡើងដោយសារការរស់នៅលើដីដែលមិនច្បាស់​លា​ស់ និងគ្មា​នបណ្ណកម្មសិទ្ធិជាដើម។

• land registration