គម្រោងអភិវឌ្ឍន៍ប្រព័ន្ធធារាសាស្រ្តសម្រាប់កាត់បន្ថយនិងការពារទឹកជំនន់ នៅបន្ទាយមានជ័យ សម្រេចបាន ៨១%

• 7 ខែ​កក្កដា 2025
• Uncategorized
• 4 មើល

គិតមកទល់ពេលនេះ គម្រោងអភិវឌ្ឍន៍ប្រព័ន្ធធារាសាស្ត្រ ដើម្បីកាត់បន្ថយនិងការពារទឹកជំនន់ (IDFMP) នៅខេត្តបន្ទាយមានជ័យ សម្រេចបានប្រមាណ ៨១,៦០% ហើយ។ នេះបើតាមឯកឧត្តម ប៉ុញ សច្ចៈ រដ្ឋលេខាធិការ ក្រសួងធនធានទឹក និងឧតុនិយម ដែលបានដឹកនាំកិច្ចប្រជុំពិនិត្យវឌ្ឍនភាព និងពិភាក្សាដោះស្រាយបញ្ហារាំងស្ទះរបស់គម្រោង កាលពីថ្ងៃទី០៣ ខែកក្កដា ឆ្នាំ២០២៥។

ឯកឧត្តមរដ្ឋលេខាធិការ បានបញ្ជាក់ឱ្យដឹងថា គិតរហូតមកដល់ពេលនេះ វឌ្ឍនភាពគម្រោងសម្រេចបានប្រមាណ ៨១,៦០% លើផែនការ ៧៦,៨១% ហើយបញ្ហាដែលបណ្តាលឱ្យរាំងស្ទះដល់ដំណើរការសាងសង់នៃគម្រោងគឺរដូវវស្សាចូលដល់មានភ្លៀងធ្លាក់ស្ទើររាល់ថ្ងៃ។

ជាមួយគ្នានេះ ឯកឧត្តមរដ្ឋលេខាធិការបានបញ្ជាក់ថា អង្គប្រជុំកំណត់យកប្រព័ន្ធពន្លឺព្រះអាទិត្យ (សូឡា) ជំនួសប្រព័ន្ធបណ្តាញអគ្គិសនី និងម៉ាស៊ីនភ្លើងសម្រាប់ប្រតិបត្តិការបិទបើកទ្វារទឹក។

ទន្ទឹមនឹងនេះ ឯកឧត្តមរដ្ឋលេខាធិការ បានស្នើឱ្យក្រុមហ៊ុនពន្លឿនការសាងសង់ឱ្យបានរហ័សមុនពេលមានទឹកជំនន់ឆ្លងដែនធ្លាក់មកដល់តាមចំណុចសំណង់ធំៗ។

គួរបញ្ជាក់ថា គម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់(IDFMP) ខេត្តបន្ទាយមានជ័យ ដែលទទួលប្រភពទឹកមកពីតាមបណ្តាអូរ ស្ទឹងនៅតាមបណ្តោយព្រំដែនកម្ពុជា-ថៃ មានការកសាងហេដ្ឋារចនាសម្ព័ន្ធសំខាន់ៗដូចជា ប្រឡាយស្រោចស្រព និងដោះទឹកខ្នាតធំចំនួន ៥ខ្សែ មានប្រវែងសរុប ៨៧,៦គីឡូម៉ែត្រ សំណង់សិល្បការ្យសរុបចំនួន ២១៦កន្លែង ស្តារអាងទឹកចំនួន ៣កន្លែង(អាងពង្រ អាងវាំងហែង និងអាងកន្សែង) និងជួសជុលអាងទឹកអូរខៃដន។

គម្រោងនេះមានលទ្ធភាពស្រោចស្រពផ្ទៃដីបង្កបង្កើនផលក្នុងរដូវវស្សាប្រមាណ ២៨.៣៥៤ហិកតា និងរដូវប្រាំងប្រមាណ ១៣.៨២៧ហិកតា ប្រជាកសិករទទួលផលមានចំនួន ៤២.២១៣គ្រួសារ ស្ថិតក្នុងឃុំ-សង្កាត់ចំនួន១២ នៃក្រុងប៉ោយប៉ែត ស្រុកម៉ាឡៃ ស្រុកអូរជ្រៅ និងក្រុងសិរីសោភ័ណ៕

• infrastructure development