វិនិយោគគិនចិនប្រកាសបោះទុន $៥០០លាន បង្កើតរោងចក្រផលិតថាមពលពីពន្លឺព្រះអាទិត្យ នៅកំពង់ស្ពឺ

9 ខែកក្កដា 2025
Uncategorized
4 មើល

Dongbaishan Holding Group Co., Ltd. គឺជាក្រុមហ៊ុនដ៏លេចធ្លោមួយមកពីប្រទេសចិន បានប្រកាសពីផែនការដ៏មានមហិច្ឆតាក្នុងការវិនិយោគប្រមាណ ៥០០លានដុល្លារ ដើម្បីបង្កើតរោងចក្រផលិតថាមពលពីពន្លឺព្រះអាទិត្យនៅក្នុងខេត្តកំពង់ស្ពឺ។

ការប្រកាសនេះធ្វើឡើងក្នុងជំនួបរវាងឯកឧត្តមបណ្ឌិត ជាម ច័ន្ទសោភ័ណ្ឌ អភិបាលខេត្តកំពង់ស្ពឺ និងលោក Si Juchen ប្រធានក្រុមហ៊ុន Dongbaishan Holding Group Co., Ltd. នៅថ្ងៃទី៧ ខែកក្កដា ឆ្នាំ២០២៥។

នាឱកាសនោះ លោក Si បានលើកឡើងពីបទពិសោធដ៏រឹងមាំរបស់ក្រុមហ៊ុនក្នុងរយៈពេល ២០ឆ្នាំកន្លងមកនៅក្នុងប្រទេសចិន និងបានបង្ហាញពីទំនុកចិត្តលើទិដ្ឋភាពនៃការវិនិយោគនៅក្នុងប្រទេសកម្ពុជា ជម្រាបជូនដល់ឯកឧត្តមអភិបាលខេត្ត។ លើសពីនេះ លោក Si ក៏បានបង្ហាញពីផែនការដ៏ធំរបស់ក្រុមហ៊ុនដែលកំពុងចាប់ដៃគូជាមួយសមាគមអភិវឌ្ឍន៍សហគមន៍កម្ពុជា-ចិន និងក្រុមហ៊ុន SL Sunlight Green Energy Sorlapower Co. Ltd. ដើម្បីវិនិយោគបង្កើតរោងចក្រផលិតថាមពលពីពន្លឺព្រះអាទិត្យដែលនឹងលាតសន្ធឹងលើផ្ទៃដីជិត ៦០០ហិកតានៅក្នុងខេត្តកំពង់ស្ពឺ។ បើតាមផែនការ រោងចក្រនេះនឹងត្រូវចាប់ផ្តើមដំណើរការសាងសង់នៅពាក់កណ្តាលខែកក្កដាឆ្នាំ២០២៥នេះ ហើយត្រូវបានគេរំពឹងថានឹងអាចបង្កើតឱកាសការងារ សម្រាប់ប្រជាពលរដ្ឋក្នុងស្រុក ប្រមាណពី ១.៥០០ ទៅ ៣.០០០កន្លែង។

ជាការឆ្លើយតប ឯកឧត្តមអភិបាលខេត្ត បានបង្ហាញពីការគ្រាំទ្រយ៉ាងពេញទំហឹងចំពោះគម្រោងវិនិយោគខាងលើ ដោយឯកឧត្តមបានសន្យាថា នឹងផ្តល់ការគាំទ្រ និងជួយសម្របសម្រួលក្នុងការដំណើរការផ្នែកច្បាប់ និងនីតិវិធីចាំបាច់នានា ដើម្បីធានាឱ្យដំណើរការនៃការបង្កើតរោងចក្រនេះប្រព្រឹត្តិទៅបានដោយរលូន។

មកទល់ពេលនេះ ខេត្តកំពង់ស្ពឺមានរោងចក្រ-សហគ្រាសប្រមាណ ២.៤៤២កន្លែង ដោយក្នុងនោះជាង ៩០% នៃអ្នកវិនិយោគ គឺមកពីប្រទេសចិន ដែលនេះជាការឆ្លុះបញ្ចាំងពីទំនាក់ទំនងទ្វេភាគីដ៏រឹងមាំ និងការរីកលូតលាស់នៃការវិនិយោគនៅក្នុងវិស័យថាមពលកកើតឡើងវិញរបស់កម្ពុជា។

គំនិតផ្តួចផ្តើមនេះ គឺជាជំហានដ៏សំខាន់មួយឆ្ពោះទៅរកការអភិវឌ្ឍន៍ប្រកបដោយនិរន្តរភាព និងកំណើនសេដ្ឋកិច្ចក្នុងតំបន់ ស្របតាមចក្ខុវិស័យរបស់កម្ពុជាសម្រាប់អនាគតបៃតង។ ការវិនិយោគមិនត្រឹមតែឆ្លុះបញ្ចាំងពីទំនុកចិត្តលើសក្តានុពលរបស់ប្រទេសប៉ុណ្ណោះទេ ប៉ុន្តែវាក៏តំណាងឱ្យការផ្លាស់ប្តូរដ៏សំខាន់ឆ្ពោះទៅរកតម្រូវការថាមពលរបស់ខ្លួនប្រកបដោយនិរន្តរភាពផងដែរ។