គម្រោងស្ដារស្ទឹងស្លាប់ ប្រវែង ៣០គីឡូម៉ែត្រ នៅខេត្តកំពង់ធំ សម្រេចបាន ៧៥%

• 11 ខែ​កក្កដា 2025
• Uncategorized
• 4 មើល

គម្រោងស្ដារស្ទឹងស្លាប់ ប្រវែង ៣០គីឡូម៉ែត្រ ដែលជាផ្នែកមួយនៃគម្រោងអភិវឌ្ឍន៍សំណង់ស្ទាក់ទឹកកំពង់គោ ស្ថិតក្នុងភូមិសាស្រ្តខេត្តកំពង់ធំ បច្ចុប្បន្នសម្រេចបាន ៧៥%ហើយ។ នេះបើយោងតាមដំណើរចុះពិនិត្យគម្រោងផ្ទាល់ ដឹកនាំដោយឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក នៅថ្ងៃទី៣ កក្កដា ឆ្នាំ២០២៥។

ឯកឧត្តម ថោ ជេដ្ឋា បានឱ្យដឹងថា ការងារស្ដារស្ទឹងស្លាប់ គឺជាផ្នែកមួយនៃគម្រោងអភិវឌ្ឍន៍សំណង់ស្ទាក់ទឹកកំពង់គោ ដែលមានសក្ដានុពលជួយរំដោះទឹក និងពង្វាងទឹកជំនន់ក្នុងបរិមាណ ៣០០ម៉ែត្រគូបក្នុងមួយវិនាទី ជាពិសេសជួយបញ្ចៀសហានិភ័យនៃការជន់លិចក្រុងស្ទឹងសែននិងតំបន់ជុំវិញ នៅរដូវវស្សាបានយ៉ាងមានប្រសិទ្ធភាព។

ឯកឧត្តមបន្តថា ស្ទឹងស្លាប់នេះ  បាន និងកំពុងដើរតួនាទីយ៉ាងសំខាន់បម្រើដល់ការប្រើប្រាស់របស់ប្រជាពលរដ្ឋរស់នៅប្រចាំថ្ងៃនៅក្នុងក្រុង-ស្រុកចំនួន ៥នៃខេត្តកំពង់ធំ ក្នុងនោះរួមមាន៖ក្រុងស្ទឹងសែន ស្រុកកំពង់ស្វាយ ស្រុកសន្ទុក ស្រុកប្រាសាទបល្ល័ង្គ និងស្រុកសណ្តាន់។

គួរបញ្ជាក់ថា ការងារស្តារស្ទឹងស្លាប់ គឺជាផ្នែកមួយនៃគម្រោងអភិវឌ្ឍន៍សំណង់ស្ទាក់ទឹកកំពង់គោ ស្ថិតនៅចម្ងាយប្រមាណ ១៥គីឡូម៉ែត្រ ពីទីរួមខេត្តកំពង់ធំ ផ្នែកខាងក្រោមតាមបណ្តោយស្ទឹងសែន។ ការស្តារស្ទឹងស្លាប់នេះ មានប្រវែង ៣០គីឡូម៉ែត្រ តភ្ជាប់ពីស្ទឹងសែននៅផ្នែកខាងលើនៃក្រុងស្ទឹងសែន ក្នុងសង្កាត់ស្រយ៉ូវ មានខ្នងទំនប់ទំហំ ៦ម៉ែត្រ មាត់លើទំហំ ៦០ម៉ែត្រ បាតក្រោមទំហំ ២០ម៉ែត្រ និងមានសំណង់សិល្បការ្យដូចជា សំណង់កាត់ស្ទឹង សំណង់ស្ទាក់ទឹក និងសំណង់បញ្ចេញបញ្ចូលទឹក សរុប១១៧កន្លែង៕ (អានបន្ថែម)