កម្ពុជា និងធនាគារពិភពលោក ប្តេជ្ញារួមគ្នាពង្រីកកិច្ចសហប្រតិបត្តិការ ដើម្បីបន្តភាពជាដៃគូយូរអង្វែង!

• 18 ខែ​កក្កដា 2025
• Uncategorized
• 5 មើល

កម្ពុជា និងធនាគារពិភពលោក(WB) បានប្តេជ្ញាថា នឹងរួមគ្នាពង្រឹង និងពង្រីកកិច្ចសហប្រតិបត្តិការលើវិស័យសក្តានុពលមួយចំនួន ដើម្បីបន្តភាពជាដៃគូសម្រាប់រយៈពេលវែងបន្ថែមទៀត។ នេះបើយោងតាមជំនួបរវាងសម្តេចនាយករដ្ឋមន្ត្រី ហ៊ុន ម៉ាណែត ជាមួយលោកស្រី Manuela V. Ferro អនុប្រធានធនាគារពិភពលោក សម្រាប់តំបន់អាស៊ីបូព៌ា និងប៉ាស៊ីហ្វិក នៅថ្ងៃទី៧ ខែកក្កដា ឆ្នាំ២០២៥។

នាឱកាសនោះ សម្ដេចនាយករដ្ឋមន្ត្រី និងលោកស្រី Manuela V. Ferro បានប្តេជ្ញារួមគ្នាពង្រឹង និងពង្រីកកិច្ចសហប្រតិបត្តិការ លើវិស័យសក្តានុពលមួយចំនួន រួមមាន៖ ការពង្រឹងភាពជាដៃគូរវាងរដ្ឋ និងឯកជន, វិស័យឌីជីថល, ថាមពលកកើតឡើងវិញ, អប់រំ, និងការអភិវឌ្ឍហេដ្ឋារចនាសម្ព័ន្ធ ជាដើម។

ក្នុងជំនួបនោះ លោកស្រី Manuela V. Ferro បានបង្ហាញនូវចំណាប់អារម្មណ៍ខ្ពស់ចំពោះភាពខ្លាំង និងសក្ដានុពលរបស់កម្ពុជា បើទោះបីជានៅក្នុងបរិបទដែលពិភពលោកមានភាពមិនប្រាកដប្រជាក៏ដោយ ក៏កម្ពុជានៅតែអាចរក្សាបាននូវសេដ្ឋកិច្ចប្រកបដោយភាពធន់ ដែលត្រូវបានកសាងឡើងជាមូលដ្ឋានគ្រឹះដ៏រឹងមាំ ក្នុងរយៈពេលជាង២០ឆ្នាំកន្លងមកនេះ។ លោកស្រី បានអះអាងថា ធនាគារពិភពលោកប្ដេជ្ញាបន្តភាពជាដៃគូរយៈពេលវែងជាមួយកម្ពុជា តាមរយៈការពង្រឹងកិច្ចសហប្រតិបត្តិការលើការគាំទ្រនានា និងការពង្រឹងកិច្ចសហប្រតិបត្តិការលើវិស័យគន្លឹះ ដូចជា៖ អប់រំ, សុខាភិបាល និងកសិកម្ម។

ជាការឆ្លើយតប សម្ដេចនាយករដ្ឋមន្ត្រី បានថ្លែងអំណរគុណចំពោះការរួមចំណែករបស់ធនាគារពិភពលោកនាពេលកន្លងមកដែលតែងតែជួយកម្ពុជាក្នុងការអភិវឌ្ឍសង្គម និងសេដ្ឋកិច្ច។ ជាមួយគ្នានេះដែរសម្ដេច ក៏បានជំរុញធនាគារពិភពលោកបន្តពង្រីកកិច្ចសហប្រតិបត្តិការឱ្យកាន់តែជិតស្និទ្ធបន្ថែមទៀតជាមួយក្រសួង-ស្ថាប័នពាក់ព័ន្ធ សំដៅពង្រឹង និងពង្រីក កិច្ចសហប្រតិបត្តិការ និងភាពជាដៃគូ ឱ្យកាន់តែរឹងមាំបន្ថែមទៀត។

គួរបញ្ជាក់ថា តាមរយៈជំនួបខាងលើនេះ ធនាគារពិភពលោក បានបញ្ជាក់ថា ដើម្បីជំរុញកំណើនសេដ្ឋកិច្ច កម្ពុជាគួរពង្រឹងភាពជាដៃគូរវាងវិស័យឯកជន និងរដ្ឋាភិបាល ក៏ដូចជាពង្រឹងសមត្ថភាពវិស័យសក្ដានុពល រួមមាន៖ ថាមពល, កសិកម្ម, កសិ-ឧស្សាហកម្ម, ការអភិវឌ្ឍហេដ្ឋារចនាសម្ព័ន្ធ និងពង្រឹងការតភ្ជាប់ទៅកាន់ទីផ្សារតំបន់ និងសកល តាមរយៈកិច្ចព្រមព្រៀងពាណិជ្ជកម្មទ្វេភាគី និងពហុភាគីដែលមានស្រាប់៕

• Investments