គម្រោងថ្មីចំនួន១៣ មានទុនជិត $១០០លាន​ សម្រេចមកវិនិយោគនៅកម្ពុជា ដោយបាន…

• 27 ខែ​សីហា 2025
• Uncategorized
• 4 មើល

ក្រុមប្រឹក្សាអភិវឌ្ឍន៍កម្ពុជា (CDC) ទទួលបានការស្នើសុំចុះបញ្ជីពីក្រុមហ៊ុនឯកជនលើគម្រោងវិនិយោគថ្មីចំនួន ១៣គម្រោង ក្រោមទុនវិនិយោគប្រមាណ ៩៩លានដុល្លារ ដោយគ្រោងនឹងបោះទីតាំនៅក្នុងរាជធានី/ខេត្តចំនួន៦។ នេះបើយោងតាម“កិច្ចប្រជុំរបស់CDC នាថ្ងៃទី២៥ ខែសីហា ឆ្នាំ២០២៥។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានឱ្យដឹងថា គម្រោងវិនិយោគទាំងនេះ មានទុនវិនិយោគសរុបប្រមាណ ៩៩លានដុល្លារ អាចបង្កើតការងារបានប្រមាណ ៥,៥ពាន់កន្លែង និងមានមុខសញ្ញាវិនិយោគក្នុងវិស័យឧស្សាហកម្មចំនួន ១១គម្រោង។

ឯកឧត្តមបន្តថា ចំពោះគម្រោងក្នុងវិស័យឧស្សាហកម្ម មាន៖ (ផ្គុំដំទ្បើងរថយន្ត, ផលិតសម្ភារៈបរិក្ខាសម្រាប់កន្ទុយសណ្តោងរថយន្តនិងគ្រឿងបន្ទាប់បន្សំ, ផលិតសម្ភារៈបំពាក់និងតុបតែងរថយន្ត, ផលិតបរិក្ខារអគ្គិសនីបំភ្លឺ បរិក្ខារអគ្គិសនីលម្អ និងគ្រឿងបន្ទាប់បន្សំអគ្គិសនីគ្រប់ប្រភេទ, ផលិតដើមណូអែល គ្រឿងលម្អ និងគ្រឿងបន្លាស់ដើមណូអែលគ្រប់ប្រភេទ, ផលិតគ្រឿងសង្ហារិមគ្រប់ប្រភេទ, ផលិតក្រដាសកាតុង, , ផលិតអេប៉ុង , ផលិតថង់ប្លាស្ទិក បង់ស្អិត និងក្រដាសម៉ាកឃឺ)។

ក្នុងចំណោមគម្រោងវិនិយោគថ្មីទាំង១៣ ខាងលើ មានគម្រោងចំនួន២ ផ្តោតលើវិស័យកសិ-ឧស្សាហកម្ម ជាពិសេសការបង្កើតរោងចក្រកែច្នៃកៅស៊ូ ដែលឆ្លុះបញ្ចាំងពីការប្តេជ្ញាចិត្តដើម្បីធ្វើពិពិធកម្ម និងពង្រឹងមូលដ្ឋានឧស្សាហកម្មរបស់កម្ពុជា។

ឯកឧត្តមបានបញ្ជាក់ថា គម្រោងវិនិយោគទាំងអស់នេះ គ្រោងនឹងបោះទីតាំងនៅរាជធានីភ្នំពេញ ខេត្តកណ្តាល តាកែវ កំពង់ស្ពឺ កំពង់ឆ្នាំង និងត្បូងឃ្មុំ។

គួររម្លឹកថា រយៈពេល ៧ខែ នៃឆ្នាំ២០២៥ មានគម្រោងវិនិយោគរហូតដល់ទៅ ៤៤០គម្រោងត្រូវបានអនុម័ត ក្នុងទំហំទុនវិនិយោគប្រមាណ ៦,៧ពាន់លានដុល្លារ។ ចំនួនគម្រោងដែលបានអនុម័តក្នុងរយៈពេល ៧ខែ នៃឆ្នាំ២០២៥នេះ ជាតួលេខដែលច្រើនជាងរយៈពេល ១២ខែពេញ នៃឆ្នាំ២០២៤ ហើយក៏ជាតួលេខខ្ពស់ជាងគេបំផុតក្នុងកំណត់ត្រាប្រវត្តិការងារជាង៣០ឆ្នាំ បន្ទាប់ពីបង្កើត CDC៕ (អានបន្ថែម)