CCA រៀបចំដំណើរទស្សនកិច្ចធុរកិច្ចនៅបរទេស
ដោយមានការគាំទ្រយ៉ាងខ្លាំងពីក្រសួងរៀបចំដែនដី នគរូបនីយកម្ម និងសំណង់ (MLMUPC) សមាគមអ្នកសាងសង់កម្ពុជា (CCA) បានប្រកាសពីផែនការក្នុងការរៀបចំដំណើរទស្សនកិច្ចធុរកិច្ចនៅបរទេសសម្រាប់តំណាងក្រុមហ៊ុនដែលជាសមាជិក ដើម្បីបង្កើនចំណេះដឹងផ្នែកជំនាញវិជ្ជាជីវៈរបស់ខ្លួន និងទទួលបាននូវចំណុចថ្មីៗពីបច្ចេកវិទ្យាសាងសង់លក្ខណៈអន្តរជាតិថ្មីបំផុត។
បន្ទាប់ពីកិច្ចប្រជុំនៅថ្ងៃទី ២៣ ខែមិថុនា ដែលឯកឧត្ដម ជា សុផារ៉ា ទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានគាំទ្រ និងលើកទឹកចិត្តឲ្យមានសកម្មភាពរបស់សមាគមនេះបន្ថែមទៀតនោះ សមាគម CCA បានប្រកាសពីការធ្វើដំណើរទស្សនកិច្ចធុរកិច្ចនៅបរទេសជាលើកដំបូង ដើម្បីសិក្សាបច្ចេកវិទ្យាគំរូព័ត៌មានសាងសង់ (BIM) ថ្មីចុងក្រោយបំផុតនៅអាជ្ញាធរសំណង់អគាររបស់ប្រទេសសិង្ហបុរី (BCA) ពីថ្ងៃទី ៦ ដល់ថ្ងៃទី ៩ខែកញ្ញា ឆ្នាំ២០១៦។
សមាគមនេះនឹងដឹកនាំគណៈប្រតិភូមួយក្រុមពីក្រុមហ៊ុនជាសមាជិករបស់ខ្លួន ដើម្បីចូលរួមក្នុងកម្មវិធីដែលមានរយៈពេល ៣ ថ្ងៃ នៅសណ្ឋាគារ Marina Bay Sands ដ៏ល្បីល្បាញរបស់សិង្ហបុរី ដែលអ្នកចូលរួមនឹងទទួលបាននូវការយល់ដឹងកាន់តែស៊ីជម្រៅលើរបៀបធ្វើការ និងអត្ថប្រយោជន៍របស់ BIM សម្រាប់គម្រោងសាងសង់។ អ្នកចូលរួមក៏នឹងរីករាយជាមួយឱកាសភ្ជាប់ទំនាក់ទំនងជាមួយក្រុមហ៊ុនសាងសង់សិង្ហបុរីផងដែរ។
ក្រោយពីមានការណែនាំដោយសង្ខេបអំពី BIM ដោយលោក ទូច សំណាង នាយករងនៃក្រុមហ៊ុនដែលជាសមាជិក CCA អូ.ស៊ី.អាយ.ស៊ី ឯកឧត្ដម ជា សុផារ៉ា បានសម្តែងការគាំទ្រចំពោះការដាក់ឲ្យអនុវត្តនូវ BIM ក្នុងគម្រោងសាងសង់ទាំងអស់នៅក្នុងប្រទេសកម្ពុជា។
បន្ថែមពីលើដំណើរទស្សនកិច្ចនាពេលខាងមុខនេះ CCA ក៏បានប្រកាសពីចេតនារបស់ខ្លួនក្នុងការដឹកនាំគណៈប្រតិភូគម្រោង និងអ្នកគ្រប់គ្រងការដ្ឋានសំណង់នៃក្រុមហ៊ុនជាសមាជិករបស់ខ្លួនពីប្រទេសកម្ពុជា ទៅទស្សនាការដ្ឋានគម្រោងនៅក្នុងប្រទេសជិតខាង ដូចជា ថៃ និងវៀតណាម ដើម្បីសិក្សាបន្ថែមទៀតអំពីការគ្រប់គ្រងការដ្ឋាន សុវត្ថិភាពក្នុងការដ្ឋាន និងដំណើរការសាងសង់។ CCA នឹងកំណត់ចុងក្រោយពីកាលវិភាគទស្សនកិច្ច និងស្ថាប័នក្នុងប្រទេសថៃ ឬវៀតណាម ដោយផ្អែកលើកម្រិតនៃចំណាប់អារម្មណ៍របស់ក្រុមហ៊ុនជាសមាជិក។
CCA ដោយមានកិច្ចសហការជាមួយក្រសួងរៀបចំដែនដី នគរូបនីយកម្ម និងសំណង់ ក៏មានបំណងធ្វើសិក្ខាសាលាស្តីពីសំណង់ជាដំណាក់កាលតាមពេលកំណត់ ដើម្បីបន្ថយគម្លាតចំណេះដឹង និងការទំនាក់ទំនង រវាងវិស័យឯកជន និងវិស័យសាធារណៈក្នុងឧស្សាហកម្មសំណង់ផងដែរ។
បន្ទាប់ពីត្រូវបានបង្កើតឡើងនៅក្នុងឆ្នាំ ២០១១ សមាគមអ្នកសាងសង់កម្ពុជាបានចុះហត្ថលេខាលើអនុស្សរណៈយោគយល់គ្នាជាមួយក្រសួងរៀបចំដែនដី នគរូបនីយកម្ម និងសំណង់ ក្នុងឆ្នាំ ២០១៣ ដើម្បីលើកកម្ពស់ការចែករំលែកព័ត៌មាន និងកិច្ចសហប្រតិបត្តិការនៅក្នុងឧស្សាហកម្មសំណង់អគារ។ សព្វថ្ងៃនេះ សមាគមន៍មានក្រុមហ៊ុនជាសមាជិកដែលបានចុះបញ្ជីជាង ១១០ ក្រុមហ៊ុន។
- Video Advertisement -
English 
ខ្មែរ 
