CCA រៀបចំពិព័រណ៌លើកទី ៣ ដើម្បីបង្ហាញពីម៉ាកល្បី
រយៈពេលបីខែ រហូតដល់មានការតាំងពិព័រណ៌ឧស្សាហកម្មសំណង់កម្ពុជាលើកទី ៣ នៅខែ ធ្នូ ឆ្នាំ ២០១៦ ក្រុមហ៊ុនសំណង់អគារ និងអចលនទ្រព្យនាំមុខគេក្នុងស្រុក និងអន្តរជាតិ បានបញ្ជាក់ពីវត្តមានរបស់ខ្លួននៅក្នុងពិព័ណ៌នេះ។
ការតាំងពិព័រណ៌នេះគ្រោងធ្វើឡើងពីថ្ងៃទី ០១ ដល់ទី ០៣ ខែធ្នូ ឆ្នាំ២០១៦ នៅមជ្ឈមណ្ឌលសន្និបាត និងពិព័រណ៌អន្តរជាតិ កោះពេជ្រ ដែលត្រូវបានរៀបចំឡើងដោយសមាគមអ្នកសាងសង់កម្ពុជា (CCA) ដែលតំណាងឲ្យអ្នកសាងសង់នៅក្នុងប្រទេសកម្ពុជា។
ពិព័រណ៌នេះនឹងមានស្តង់ចំនួន ៣០០ ដោយបង្ហាញពីសមា្ភរ និងបច្ចេកវិទ្យាសំណង់ជាច្រើនប្រភេទ គម្រោងអភិវឌ្ឍន៍អចលនទ្រព្យ និងសេវាកម្មដែលទាក់ទងទៅនឹងវិស័យសំណង់ និងអចលនទ្រព្យ រួមទាំងអ្នកមកពីភ្នាក់ងារអចលនទ្រព្យ ធនាគារ និងក្រុមហ៊ុនធានារ៉ាប់រង។ ប្លង់ពិព័ណ៌នេះត្រូវបានបែងចែកជាបីផ្នែក ដូចជាផ្នែកក្រុមហ៊ុនអចលនទ្រព្យ ធនាគារ និងក្រុមហ៊ុនធានារ៉ាប់រង ក្រុមហ៊ុនជំនាញខាងសម្ភារសំណង់ និងការតុបតែង ព្រមទាំងក្រុមហ៊ុនជំនាញផ្នែកអគ្គិសនី បំពង់ទុយោទឹក ការផ្គត់ផ្គង់ទឹកគ្រឿងម៉ាស៊ីនមេកានិច រូមទាំងស៊ុមដែកថែប។ល។
នៅក្នុងវិស័យអចលនទ្រព្យ ក្រុមហ៊ុនវិនិយោគកម្ពុជាក្រៅប្រទេស ដែលជាក្រុមហ៊ុនអភិវឌ្ឍនាំមុខគេ (OCIC) នឹងបង្ហាញគម្រោងអភិវឌ្ឍន៍ខ្នាតធំជាច្រើនរបស់ខ្លួនរួមមាន ខុនដូ D.I. Riviera, និងអគារ Elysees និងទីក្រុងអូឡាំព្យាស៊ីធី ។ អគារខុនដូ Penthouse និងខុនដូ D’sea View ព្រមទាំងការអភិវឌ្ឍអចលទ្រព្យពាណិជ្ជកម្ម និងលំនៅដ្ឋានជាច្រើនទៀត ត្រូវបានគេរំពឹងថានឹងមានវត្តមាននៅក្នុងការតាំងពិព័ណ៌នេះផងដែរ។
ក្រុមហ៊ុនម៉ាកល្បី និងក្រុមហ៊ុនចែកចាយដែលឈានមុខគេ នឹងគ្របដណ្តប់លើផ្នែកសម្ភារសំណង់ និងការតុបតែងនៃការតាំងពិព័ណ៌នេះ ដោយបង្ហាញពីគុណភាព បច្ចេកវិទ្យា និងអត្ថប្រយោជន៍នៃផលិតផលរបស់ខ្លួនទៅឲ្យអ្នកចូលរួមទស្សនាពិព័ណ៌។ ក្នុងចំណោមក្រុមហ៊ុនដែលបានបញ្ជាក់ពីការចូលរួមមកដល់ពេលនេះនោះ មានក្រុមហ៊ុនដូចជា មជ្ឈមណ្ឌល HSC Décor Center ( Mitsubishi air-con) ក្រុមហ៊ុន Camcona Trading (Rinnai, Ligman, Imer និង Hilti) ក្រុមហ៊ុន Wiki Trade (Carrier air-con, Khmer Rock) និង ក្រុមហ៊ុន Shandong Xingang International Formwork Co., Ltd (ក្រុមហ៊ុនផ្គត់ផ្គង់ឈានមុខគេរបស់ចិន)។
លើសពីនេះទៅទៀត ក្រុមហ៊ុន Inovar (សមា្ភរឥដ្ឋការ៉ូល្អបំផុតរបស់ម៉ាឡេស៊ី), ក្រុមហ៊ុន Thai Conglomerate SCG (សម្ភារសំណង់ និងសារធាតុគីមី) ក្រុមហ៊ុន TEM Trading (បំពង់ Ebara និង Polegon និងម៉ាស៊ីនបូម Sri) និងក្រុមហ៊ុន Khi Huot (ផលិតផលអនាម័យម៉ាកល្បី) ក៏នឹងដាក់បង្ហាញផលិតផលរបស់ខ្លួនផងដែរ។
សាខារបស់ក្រុមហ៊ុន PTS Group, UMG, KNN និងក្រុមហ៊ុន គង់នួនគ្រុប និងកាន់កាប់ផ្នែកខាងក្រៅនៃកន្លែងតាំងពិព័ណ៌ ដោយមានដាក់តាំងផលិតផលនាំមុខគេរបស់ខ្លួន ដូចជា គ្រឿងចក្រជីកដី និងត្រាក់ទ័រ។
ក្រុមហ៊ុន Robert Bosch និង Melchers ដែលជាក្រុមហ៊ុននាំមុខខាងឧស្សាហកម្មជាអន្តរជាតិ នឹងណែនាំនូវបច្ចេកវិទ្យាឧបករណ៍ថាមពលថ្មីចុងក្រោយបំផុតរបស់ខ្លួន ទៅកាន់អ្នកប្រើប្រាស់នៅក្នុងប្រទេសកម្ពុជាផងដែរ។
ក្រៅពីស្តង់ពាណិជ្ជកម្ម សមាគមអ្នកសាងសង់កម្ពុជានឹងធ្វើជាម្ចាស់ផ្ទះកិច្ចប្រជុំកំពូលលើកទី ៥ របស់ខ្លួននៅលើថ្ងៃបើកការតាំងពិព័ណ៌នេះផងដែរ ដោយមានអ្នកតំណាងឧស្សាហកម្មសំណង់រាប់រយនាក់។ ក្រុមបណ្តាញធុរកិច្ចពិសេសមួយនឹងត្រូវបានរៀបចំនៅល្ងាចថ្ងៃទីពីរដើម្បីភ្ជាប់ទំនាក់ទំនងរវាងសមាជិក CCA និងអ្នកចូលរួមដាក់តាំងពិព័ណ៌ទាំងអស់។ សភាពាណិជ្ជកម្មអង់គ្លេសនៅកម្ពុជា (ហៅកាត់ថា BritCham) និងទីភ្នាក់ងារជំរុញពាណិជ្ជកម្មម៉ាឡេស៊ី (MATRADE) ក៏នឹងដឹកនាំសមាជិករបស់ខ្លួនដើម្បីចូលរួមទទួលប្រយោជន៍ពីការប្រមូលផ្តុំបណ្តាញទំនាក់ទំនងប្រកបដោយកិត្យានុភាពនេះផងដែរ។
មានការរំពឹងថា ចំនួនអ្នកចូលរួមក្នុងកម្មវិធីនេះនឹងមានចំនួនច្រើន ដោយសារតែទំនាក់ទំនងក្នុងតំបន់ និងអន្តរជាតិប្រកបដោយភាពឆ្លាតវៃរបស់សមាគម។ អ្នករៀបចំព្យាករណ៍ថា ពិព័រណ៌អគារកម្ពុជានៅឆ្នាំនេះនឹងទាក់ទាញអ្នកចូលរួមទស្សនា និងអ្នកចូលរួមដាក់តាំងពិព័រណ៌ក្នុងស្រុក និងអន្តរជាតិ រាប់រយនាក់ ដែលកំពុងស្វែងរកព័ត៌មានពាក់ព័ន្ធនឹងវិស័យនេះ ឬស្វែងរកឱកាសអាជីវកម្មថ្មី។ នៅចុងខែសីហា ជាង ៦០% នៃស្តង់តាំងពិព័រណ៌នេះត្រូវបានកក់រួចហើយ ហើយក្រុមហ៊ុនជាច្រើនដទៃទៀតបានចុះកិច្ចសន្យាក្នុងការតាំងពិព័រណ៌ហើយដែរ។
ការតាំងពិព័រណ៌នេះត្រូវបានគាំទ្រដោយក្រសួងរៀបចំដែនដី នគរូបនីយកម្ម និងសំណង់ ក្រសួងពាណិជ្ជកម្ម ក្រសួងការងារ និងបណ្តុះបណ្តាលវិជ្ជាជីវៈ គណៈស្ថាបត្យករកម្ពុជា គណៈវិស្វករកម្ពុជា ព្រមទាំងស្ថាប័នអន្តរជាតិជាច្រើនទៀត។
- Video Advertisement -
English 
ខ្មែរ 
