English 
ខ្មែរ 
ក្រុមហ៊ុនសិង្ហបូរីគ្រោងបង្កើតគម្រោងអភិវឌ្ឍចម្រុះតម្លៃ ៥០លានដុល្លារនៅខេត្តព្រះសីហនុ
ក្រុមហ៊ុន HLH Development (HLHD) និង Smart Winner កាលពីថ្មីៗនេះ បានព្រមព្រៀងវិនិយោគរួមគ្នាបង្កើតគម្រោងអភិវឌ្ឍចម្រុះថ្មីមួយកន្លែង តម្លៃប្រមាណ ៥០លានដុល្លារ លើផ្ទៃដី ១១,៥ ហិកតា ក្នុងក្រុងព្រះសីហនុ។ នេះបើយោងតាមការចេញផ្សាយររបស់ក្រុមហ៊ុនកាលពី ១ វិច្ឆិកា កន្លងមកនេះ។
គម្រោងនេះមានទីតាំងនៅជិតកំពង់ផែស្វយ័តក្រុងព្រះសីហនុ មានផ្ទៃដី ៣ ទៅ ៥ ហិកតា នៃផ្ទៃដីទាំងមូល នឹងត្រូវអភិវឌ្ឍទៅជាមជ្ឈមណ្ឌលផ្សារទំនើបលក់ដុំ ស្រដៀងគ្នានឹងផ្សារ Makro ទីផ្សារ seafoods និងកន្លែងចម្អិនអាហាសមុទ្រ ស្រដៀងនឹងប្រទេសកូរ៉េដូច្នោះដែរ។
ដោយឡែក ដីដែលនៅសល់ នឹងត្រូវបានបែងចែកទៅជាដីឡូតិ៍តូចៗសម្រាប់ការអភិវឌ្ឍន៍ចម្រុះ ដោយក្រុមហ៊ុននឹងបើកឱ្យដៃគូរសហការផ្សេងទៀតជួល ឬក៏ទិញដាច់ពីក្រុមហ៊ុនក៏បាន។
ក្រោមលក្ខខណ្ឌនៃការបណ្តាក់ទុនរួមគ្នានេះ ក្រុមហ៊ុន Smart Winner ដែលជាម្ចាស់ដី នឹងរួមចំណែក ២៥,២ លានដុល្លារអាមេរិក ដែលជាតម្លៃដីផ្ទាល់ ឬស្មើនឹង ៥០,៤% នៃភាគហ៊ុន។ ទន្ទឹមនឹងនេះ HLHD នឹងវិនិយោគ ១០លានដុល្លារអាមេរិក ឬស្មើនឹង ៤៩,៦% នៃភាគហ៊ុន ហើយក៏នឹងបន្ថែម ៥លានដុល្លារអាមេរិកទៀត ជាប្រាក់ដើមប្រតិបត្តិការផងដែរ។
លោក គួច លេងឃាង ប្រធានទំនាក់ទំនងសាធារណៈ នៃក្រុមហ៊ុន HLH Cambodia បានប្រាប់ទស្សនាវដ្តីសំណង់ និងអចលនទ្រព្យ កាលពីព្រឹកថ្ងៃអង្គារនេះថា ទឹកប្រាក់បន្ថែមចន្លោះ ៨ ទៅ ១០ លានដុល្លារទៀត នឹងត្រូវប្រើប្រាស់សម្រាប់ការសាងសង់។ ដូច្នេះ គម្រោងទាំងមូលនឹងត្រូវចំណាយអស់ប្រមាណ ៥០លានដុល្លារអាមេរិក។
លោកបានបន្ថែមថា គម្រោងនេះគ្រោងនឹងបើកការដ្ឋាននៅត្រីមាសទី ២ នៃឆ្នាំ ២០២២ ខណៈកាលបរិច្ឆេទបញ្ចប់គម្រោងត្រូវបានគ្រោងទុកនៅចុងឆ្នាំ ២០២៣ ។
គម្រោងនេះជាគម្រោងអភិវឌ្ឍន៍ចម្រុះទី ៤ ហើយរបស់ HLH ក្នុងប្រទេសកម្ពុជា ឬជាគម្រោងទី ២ នៅខេត្តព្រះសីហនុ បន្ទាប់ពីគម្រោង D’Seaview។
គួរបញ្ជាក់ថា ក្រុមហ៊ុន HLH Group កន្លងមកបានវិនិយោគបង្កើតគម្រោងធំ ៗ ជាច្រើននៅក្នុងប្រទេសកម្ពុជា ពិសេសវិស័យក្នុងអចលនទ្រព្យនិងកសិកម្ម។ គម្រោងទាំងនេះរួមមាន មណ្ឌលកសិកម្មតម្លៃរាប់ពាន់លានដុល្លារនៅកំពង់ស្ពឺ គម្រោងទីក្រុងអូរ៉ាល់ស៊ីធី គម្រោងអភិវឌ្ឍចម្រុះ D’Seaview នៅក្រុងព្រះសីហនុ គម្រោង Royal Platinum នៅភ្នំពេញ និងគម្រោងផ្សេងៗទៀត។