រដ្ឋាភិបាលប្រកាសសាងសង់ផ្លូវតភ្ជាប់ពីបាត់ដំបងទៅកោះកុងនៅឆ្នាំក្រោយ

• Me Wathana
• 16 November 2017
• Construction Focus
• 2629 Views

ដើម្បីសម្រួលដល់ការធ្វើដំណើរ និងការដឹកជញ្ជូន ជាពិសេសការដឹកជញ្ជូនកសិផល​ឆ្លងកាត់ពីខេត្តបាត់ដំបង ទៅកោះកុង រដ្ឋាភិបាលកម្ពុជាបានប្រកាសសាងសង់ផ្លូវតភ្ជាប់ពីខេត្តបាត់ដំបងទៅកោះកុង (ផ្លូវជាតិលេខ៤៨) នៅឆ្នាំ ២០១៨ ខាង​មុខនេះ។

ថ្លែងក្នុងពិធីប្រគល់ និងទទួលជាផ្លូវការស្ពានកោះកុង ដើម្បីដាក់ឲ្យប្រជាពលរដ្ឋប្រើប្រាស់ដោយឥតគិតថ្លៃ កាលពីថ្ងៃទី១០ វិច្ឆិកា ឯកឧត្តម​ ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បានមានប្រសាសន៍ថា នៅឆ្នាំ ២០១៨ រាជរដ្ឋាភិបាល នឹងមានគម្រោងសាងសង់ផ្លូវពីខេត្តបាត់ដំបង មកខេត្តកោះកុង។

បច្ចុប្បន្ន​ ផែនការនៃគម្រោងសាងសង់ផ្លូវតភ្ជាប់ពីខេត្តជង្រុកស្រូវ ទៅខេត្តដៃឈូងសមុទ្រនេះ​ បានចេញជារូបរាង​ហើយ នៅចាំតែថវិកាជំនួយដើម្បីចាប់ផ្តើមការងារសាងសង់តែប៉ុណ្ណោះ។ “គម្រោង​នេះ​ មានហើយ និងបានដាក់ចូលទៅដើម្បីស្នើថវិកាពីប្រទេសចិន ហើយ​ក្រុមហ៊ុនចិនក៏បានសិក្សាគម្រោងនេះដែរ ផ្លូវនេះក៏បានសិក្សាហើយ” នេះ​បើតាមប្រសាសន៍របស់ឯកឧត្តម​រដ្ឋមន្ត្រី ស៊ុន​ ចាន់ថុល។

បើកសម្ពោធឲ្យប្រើប្រាស់នៅខែ ឧសភា​ ឆ្នាំ​២០០៨ ក្រោមអធិបតីភាពសម្តេច ហ៊ុន សែន ផ្លូវជាតិលេខ ៤៨ ស្ថិតត្រង់ចំនុចផ្លូវបំបែកស្រែអំបិល តភ្ជាប់ខេត្តកោះកុង ជាមួយខេត្តព្រះសីហនុ និងរាជធានីភ្នំពេញ។

តាមរយៈគម្រោង​ពង្រីកផ្លូវជាតិលេខ​៤៨ ក្នុងខេត្តកោះកុង និង​គម្រោងសាងសង់ផ្លូវ​ល្បឿនលឿន​ភ្នំពេញ-ព្រះសីហនុ​ ​ឯកឧត្តមរដ្ឋមន្រ្តីបានគូស​បញ្ជាក់ថា​ គម្រោង​អភិវឌ្ឍន៍ទាំងនេះ​ជាសៃឈាមក្នុងការតភ្ជាប់ប៉ូលសេដ្ឋកិច្ចភ្នំពេញទៅព្រះសីហនុ និងពីខេត្តកោះកុង ទៅខេត្តព្រះសីហនុនេះ​ផងដែរ។