ឯ.ឧ. គង់ វិបុល៖ ការប្រមូលពន្ធបន្តកើនឡើងជាពិសេសវិស័យសំណង់និងអចលនទ្រព្យ

• 21 ខែ​កក្កដា 2018
• ព័ត៌មានអចលនទ្រព្យ
• 17 មើល

ការប្រមូលចំណូលពន្ធក្នុងរយៈពេល៦ ខែ ដំបូងបានសម្រេចរហូតដល់ ៦១,២៨ ភាគរយនៃផែនការប្រចាំឆ្នាំដោយក្នុងនោះការប្រមូលពន្ធទៅលើវិស័យអចលនទ្រព្យនឹងសំណង់មានការកើនឡើងយ៉ាងគួរអោយកត់សម្គាល់។ នេះបើយោងតាមឯកឧត្តម គង់ វិបុល ដែលជាប្រតិភូរាជរដ្ឋាភិបាលទទួលបន្ទុកអគ្គនាយក នៃអគ្គនាយក ដ្ឋានពន្ធដារ។

ក្នុងកិច្ចសម្ភាសន៍ជាមួយអ្នកសារព័ត៌មានទាក់ទងទៅនឹងវឌ្ឍនភាពនៃការប្រមូលចំណូលពន្ធដារក្នុងឆមាសទី១ នៃឆ្នាំ២០១៨ ឯកឧត្តម គង់ វិបុល បានអោយដឹងថា ក្នុងចំណោមចំណូលពន្ធសរុបដែលមានចំនួនទឹកប្រាក់ប្រមាណជាង ៤,៧ ទ្រីលានរៀល ការប្រមូលពន្ធទៅលើការផ្ទេរសិទ្ធិកាន់កាប់អចលនទ្រព្យពោលគឺពន្ធប្រថាប់ត្រាមានការកើនឡើងរហូតទៅដល់ ៣១ ភាគរយបើធៀបទៅនឹងរយៈពេលដូចគ្នាកាលពីឆ្នាំមុន។

ឯកឧត្តម បានបន្ថែមថា៖«ជាក់ស្តែងណាស់ ដោយសារវិនិយោគិនមានជំនឿទុកចិត្តទៅលើស្ថេរភាពនយោបាយ ក៏ដូចជាស្ថេរភាពមាក្រូសេដ្ឋកិច្ចរបស់ប្រទេសកម្ពុជាដែលជាកត្តាជំរុញអោយមានការវិនិយោគទៅលើវិស័យសំណង់និងអចលនទ្រព្យកាន់តែច្រើន»។

កត្តាទាំងអស់នេះហើយ ដែលបានបង្កើនទំនុកចិត្តជូនប្រជាពលរដ្ឋក៏ដូចជាវិនិយោគិនដើម្បី
ធ្វើអាវជីវកម្មជាមួយដីធ្លីក៏ដូចជាលំនៅដ្ឋានបើទោះបីនេះជារដូវកាលបោះឆ្នោះក៏ដោយ។

ជាមួយគ្នានេះដែរ កាលពីថ្ងៃទី ១៧ ខែ កក្កដា កន្លងមកនេះ អគ្គនាយកដ្ឋានគយនិងរដ្ឋាករកម្ពុជាបានអោយដឹងថាចំណូលគយនិងរដ្ឋាករសរុបប្រចាំឆមាសទី១ ឆ្នាំ២០១៨ កើនឡើងប្រមាណ ២៧,៨ ភាគរយ ដែលក្នុងនោះចំណូលពីគ្រឿងសំណង់កើនឡើងរហូតដល់ទៅ ២៦,៦ ភាគរយ បើធៀបទៅនឹងរយៈពេលដូចគ្នា។

សូមបញ្ជាក់ផងដែរថា កិច្ចសម្ភាសន៍ខាងលើនេះដែរ បានធ្វើឡើងកាលពីថ្ងៃទី ២០ ខែ កក្កដា ឆ្នាំ២០១៨ នៅអគ្គនាយក ដ្ឋានពន្ធដារដោយផ្ទាល់។

• អត្ថបទវិភាគ
• អត្ថបទវិភាគ