កម្ពុជាផ្សព្វផ្សាយច្បាប់វិនិយោគថ្មីដល់ធុរជនចិន ៣០០នាក់ ទិសដៅទាក់ទាញការវិនិយោគបន្ថែម

• 30 ខែ​វិច្ឆិកា 2021
• ព័ត៌មានអចលនទ្រព្យ
• 9 មើល

ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី ២៩ វិច្ឆិកានេះ បានរៀបចំសិក្ខាសាលាផ្សព្វផ្សាយច្បាប់ស្តីពីវិនិយោគថ្មីដល់វិនិយោគិន និងធុរជនចិន សរុបជាង ៣០០នាក់ តាមប្រព័ន្ធអនឡាញ ទិសដៅដើម្បីទាក់ទាញការវិនិយោគបន្ថែម។

នាឱកាសនេះ ក្រុមប្រឹក្សាអភិវឌ្ឍន៍កម្ពុជា ក៏បានបង្ហាញថា គិតត្រឹម ខែតុលា ឆ្នាំ២០២១ ចិនបានបណ្តាក់ទុននៅកម្ពុជាសរុបជាង ២៧ ប៊ីលានដុល្លារអាមេរិក ដោយតួលេខនេះរំពឹងថានឹងកើនជាបន្ដបន្ទាប់ ខណៈទំនាក់ទំនងទ្វេភាគីកម្ពុជា-ចិន បានឈានដល់កម្រិតល្អបំផុត ស្របនឹងច្បាប់វិនិយោគថ្មីដែលសម្រួលដល់ការវិនិយោគកាន់តែខ្លាំង។

ឯកឧត្តម វ៉ាង វិនធៀន ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំកម្ពុជា លើកឡើងថា ទំនាក់ទំនងល្អរវាងចិន និងកម្ពុជា បានឈានដល់កម្រិតល្អបំផុតជាប្រវត្តិសាស្ត្រ ហើយកម្ពុជាបានក្លាយជាទិសដៅវិនិយោគដ៏សំខាន់របស់ប្រទេសចិន។

គួរបញ្ជាក់ថា ក្រុមប្រឹក្សាអភិវឌ្ឍន៍កម្ពុជា និងគណៈកម្មាធិការជាតិអភិវឌ្ឍន៍ និងកំណែទម្រង់របស់ប្រទេសចិន តែងតែចុះហត្ថលេខាលើអនុស្សារណៈនៃការយោគយល់គ្នាជាបន្តបន្ទាប់ ដើម្បីជំរុញការវិនិយោគ។

កាលពីថ្ងៃទី ១២ ខែ វិច្ឆិកា កន្លងទៅនេះ ភាគីទាំង ២ ក៏ទើបតែបានចុះហត្ថលេខាលើអនុស្សារណៈ នៃការយោគយល់គ្នាស្តីពីការ ធ្វើឱ្យប្រសើរឡើងនូវកិច្ចសហប្រតិបត្តិការសមត្ថភាពផលិត និងការវិនិយោគផងដែរ។

យោងតាមក្រុមប្រឹក្សាអភិវឌ្ឍន៍កម្ពុជា ក្នុងអំឡុងឆ្នាំ ១៩៩២-២០២០ ចិនបានផ្តល់ហិរញ្ញប្បទានមកកម្ពុជា សរុបប្រមាណ ៤ ៦៥៥ លានដុល្លារអាមេរិក។

• ច្បាប់ និងបញ្ញាត្តិ
• ការវិនិយោគ និងមូលធន
• ច្បាប់ និងបញ្ញាត្តិ
• ការវិនិយោគ និងមូលធន