ការចុះផ្ដល់សេវាពន្ធដារលើការចុះបញ្ជីអចលនទ្រព្យនឹងចាប់ផ្តើមនៅថ្ងៃទី 12 ខែកុម្ភៈ

• 7 ខែ​មករា 2018
• ព័ត៌មានអចលនទ្រព្យ
• 9 មើល

អគ្គនាយកដ្ឋានពន្ធដារបានប្រកាសឱ្យម្ចាស់អចលនៈទ្រព្យទាំងអស់ក្នុងរាជធានីភ្នំពេញត្រៀមរៀបចំឯកសារសម្រាប់ការចុះបញ្ជីពន្ធនិងការធ្វើបច្ចុប្បន្នភាពព័ត៌មានអចលនទ្រព្យដែលនឹងចាប់ផ្តើមនៅថ្ងៃទី 12 ខែកុម្ភៈ។

យោងតាមលិខិតផ្លូវការដែលចេញផ្សាយដោយអគ្គនាយកដ្ឋានពន្ធដារ មន្ត្រីពន្ធដារនឹងចុះទៅតាមសង្កាត់ខណ្ឌនានាដើម្បីប្រមូលទិន្នន័យ ស្រង់ស្ថិតិ ថតរូបទីតាំង និងសាកសួរព័ត៌មានជាមួយម្ចាស់អចលនទ្រព្យហើយមន្រ្តីនឹងពិនិត្យមើលថាតើអចលនទ្រព្យត្រូវបានចុះឈ្មោះឬនៅ។ ទិន្នន័យទាំងអស់នឹងរក្សាទុកក្នុងប្រព័ន្ធគ្រប់គ្រងទិន្នន័យរបស់អគ្គនាយកដ្ឋានពន្ធដារក្នុងគោលបំណងដើម្បីពង្រឹងសេវាកម្មពន្ធដារអោយល្អប្រសើរជាងមុន

លើស​ពី​នេះ​ទៀតមន្រ្តីពន្ធដារនឹងផ្តល់ព័ត៌មានទាក់ទងនឹងបទបញ្ជាពន្ធដារអចលនទ្រព្យដល់ម្ចាស់កម្មសិទ្ធិទាំងអស់និងជួយសម្រួលដល់ពួកគេក្នុងការចុះបញ្ជីអចលនទ្រព្យរបស់ពួកគេ ក្នុងករណីដែលពួកគេមិនទាន់ចុះបញ្ជី។

ចំពោះអ្នកដែលបានចុះបញ្ជីអចលនទ្រព្យរបស់ខ្លួនជាមួយអគ្គនាយកដ្ឋានពន្ធដារ ពួកគេត្រូវត្រៀមបង្កាន់ដៃបង់ពន្ធ និង/ឬ ប័ណ្ណសម្គាល់ការបង់ពន្ធអចលនទ្រព្យ។ សម្រាប់អ្នកដែលមិនទាន់បានចុះបញ្ជីពួកគេត្រូវតែត្រៀមអត្តសញ្ញាណប័ណ្ណ ឬសំបុត្រកំណើត ឬលិខិតឆ្លងដែន(សម្រាប់ជនបរទេស) សៀវភៅគ្រួសារ ឬសៀវភៅស្នាក់នៅ។

សម្រាប់អ្នកដែលមិនធ្លាប់បង់ពន្ធលើអចលនទ្រព្យពីមុន មន្ត្រីនឹងធ្វើការវិភាគថាតើម្ចាស់អចលនទ្រព្យមានបំណងគេចវេសការបង់ពន្ធឬមិនបានទទួលព័ត៌មានទាក់ទងនឹងការបង់ពន្ធ ហើយមន្រ្តីនឹងពិចារណាថាតើត្រូវមានការផាកពិន័យឬអត់។

យោងតាមលិខិត សេវាចុះបញ្ជីអចលនទ្រព្យនេះមិនមានរយៈពេលកំណត់ច្បាស់លាស់ទេ ដោយឡែកមន្រ្តីនឹងធ្វើយុទ្ធនាការនេះរហូតដល់អចលនទ្រព្យទាំងអស់នៅភ្នំពេញត្រូវបានចុះបញ្ជីរួចរាល់។

• ច្បាប់ និងបញ្ញាត្តិ
• ច្បាប់ និងបញ្ញាត្តិ