English 
ខ្មែរ 
ការរៀបចំអគារការិយាល័យ និងអគារពាណិជ្ជកម្មក្នុងពេលជួបវិបត្តិមេរោគកូវីដ ១៩
តើអ្នកគួររៀបចំអគារការិយាល័យ ឬអគារពាណិជ្ជកម្មរបស់អ្នកបែបណាខ្លះ ក្នុងកំឡុងពេលសម្រាកជំងឺឆ្លងកូវីដ១៩?
ក្នុងស្ថានភាពដែលអគារការិយាល័យ ឬអគារពាណិជ្ជកម្មរបស់អ្នកត្រូវបានទុកទំនេរដោយសារបុគ្គលិក និងក្រុមហ៊ុនអាជីវកម្មផ្សេងទៀតក្នុងអគារតែមួយត្រូវបានឈប់សម្រាកដោយសារជំងឺឆ្លងបណ្តាលមកពីវីរុសកូវីដ១៩ បែបនេះ ការយកចិត្តទុកដាក់ខ្ពស់លើវិធានការគ្រប់គ្រង និងថែទាំអគារ ជាការសំខាន់ណាស់ ជាពិសេសសម្រាប់ម្ចាស់អគារផ្ទាល់តែម្តង។
បើយោងអត្ថបទចេញផ្សាយមួយរបស់ CBRE Cambodia កាលពីថ្ងៃទី៣០ ខែមីនា ឆ្នាំ២០២០ អត្ថបទនោះបានបង្ហាញពីវិធីទប់ស្កាត់ និងការពារជំងឺឆ្លងកូវីដ១៩ តាមវិធានការមួយចំនួន ដែលត្រូវបានគេយកមកអនុវត្តកន្លងក្នុងការគ្រប់គ្រង់លើបុគ្គលិកធ្វើការ និងគ្រឿងបរិក្ខារក្នុងអគារការិយាល័យ ទាំងអំឡុងពេលកំពុងប្រឈមស្ថានភាពជំងឺឆ្លង និងត្រៀមសម្រាប់ក្រោយពេលជំងឺបានផុតរលត់ទៅវិញ។ វិធានការទាំងនោះមានដូចតទៅ៖
ការគ្រប់គ្រងអគារការិយាល័យ ឬអគារពាណិជ្ជកម្ម ក្នុងកំឡុងពេលនៃស្ថានភាពជំងឺឆ្លងកូវីដ១៩
១) គ្រប់គ្រងការចេញចូល៖
វិធីដែលល្អបំផុតក្នុងការរក្សាអគារឱ្យមានសុវត្ថិភាពល្អ គឺត្រូវឱ្យបុគ្គលិកដែលមានរោគសញ្ញាឆ្លងនៅដាច់ដោយឡែក និងអនុញ្ញាតឱ្យពួកគេអាចធ្វើការពីផ្ទះបាន។ បន្ថែមពីនេះ អគារការិយាល័យនីមួយៗគួរតែមានដាក់ការត្រួតពិនិត្យកម្តៅ និងការបាញ់អាកុលលាងដៃរបស់បុគ្គលិកមុនពេលចូលធ្វើការ និងមានការកម្រិតការចេញចូលរបស់អ្នកក្រៅផ្សេងទៀត។ ការកម្រិតចំនួនមនុស្សជិះជណ្តើរយន្ត និងការបែងចែងឱ្យឡើងតាមជណ្តើរធម្មតា អាចកាត់បន្ថយការប្រមូលផ្តុំរបស់ក្រុមបុគ្គលិកបំពេញការងារផងដែរ។
២) ការពារប្រសើរជាងព្យាបាល៖
អ្នកគ្រប់គ្រងអគារ ក៏អាចដាក់ចេញនូវផែនការយថាហេតុ ឬផែនការគ្រោងទុកជាមុន គឺដើម្បីឆ្លើយតបទៅនឹងហានិភ័យដែលអាចកើតឡើងនាពេលខាងមុខ។ ក្នុងផែនការគួររាប់បញ្ចូលសកម្មភាពដូចជា៖ អ្វីដែលត្រូវធ្វើជាមួយបុគ្គលម្នាក់ៗ? តើធ្វើដូចម្តេចដើម្បីញែកពួកគេដាច់ដោយឡែកពីគ្នា? តើធ្វើដូចម្តេចដើម្បីឱ្យពួកគេទៅផ្ទះដោយសុវត្ថិភាព? តើត្រូវចាត់វិធានការអ្វីខ្លះ ពេលមានករណីឆ្លងកើតឡើងជាដើម? តាមរយៈផែនការនេះ អ្នកនឹងអាចកាត់បន្ថយហានិភ័យ និងកាត់បន្ថយការថប់បារម្ភបានច្រើន នៅពេលមានហេតុការណ៍យថាហេតុណាមួយកើតឡើង។ វាគួរត្រូវបានសរសេរឡើងដោយមានការចូលរួមពិភាក្សាជាមួយនឹងម្ចាស់អគារ អ្នកគ្រប់គ្រងធនធានមនុស្ស និងម្ចាស់ភាគហ៊ុនធំៗ។
៣) ប្រកាន់ខ្ជាប់ការរក្សាអនាម័យ៖
មេរោគកូវីដ ១៩ អាចមានជីវិតរស់នៅលើផ្ទៃឥដ្ឋបានរហូតទៅ ៣ថ្ងៃ។ ការបង្កើនការសម្អាតបានត្រឹមត្រូវគ្រប់ផ្នែកទាំងអស់ក្នុងអគារការិយាល័យធ្វើការ អាចជួយកាត់បន្ថយការចម្លងមេរោគកូវីដ១៩ផងដែរ។ ការលាងសម្អាតដៃរបស់បុគ្គលិក ជាកិច្ចដែលត្រូវធ្វើជាប់ជាប្រចាំ ជាពិសេសពេលមុនចូលអគារ ពេលចេញពីបន្ទប់ទឹក និងពេលមុនទទួលទាន ឬមុន និងក្រោយកាន់របស់អ្វីមួយដែលមានការប៉ះពាល់ច្រើននាក់។ បន្ទប់ទឹកទាំងអស់ក្នុងអគារចាំបាច់ត្រូវស្អាតជានិច្ច ហើយប្រព័ន្ធទឹក និងត្រូវធានាថាមានសម្ភារនានាក្នុងបន្ទប់ទឹក ដូចជាម៉ាស៊ីនសម្ងួតដៃ ក្រដាសអនាម័យ សាប៊ូលាងដៃឱ្យបានជាប់ជាប្រចាំ និងបើអាច អាកុលឬស្ព្រាយសម្លាប់មេរោគ សម្រាប់សម្អាតលើចានបង្គន់ ។
៤) បរិយាកាសក្នុងអគារ៖
ប្រព័ន្ធម៉ាស៊ីនត្រជាក់ក្នុងអគារអាចបង្កឱ្យមានការឆ្លងវីរុសតាមសំណើមខ្យល់ ឬតំណក់ទឹកតូចៗដែលភាយចេញពីម៉ាស៊ីនត្រជាក់នោះ។ ហេតុនេះ ការបង្វែរទិសរបស់ខ្យល់ចេញពីម៉ាស៊ីនត្រជាក់ទៅកាន់កន្លែងទំនេរ និងការកាត់បន្ថយការជួបជុំគ្នាច្រើនពេក ក្នុងកន្លែងដែលមានម៉ាស៊ីនត្រជាក់ ក៏ជាមធ្យោបាយមួយក្នុងការកាត់បន្ថយការឆ្លងជំងឺផងដែរ។ (អានបន្ថែម)
៥) ការបិទ ឬកម្រិតផ្នែកខ្លះនៃអគារ៖
ម្ចាស់អគារ ឬអ្នកគ្រប់គ្រង អាចសម្រេចចិត្តបិទ ឬកម្រិតផ្នែកខ្លះនៃអគារទាំងមូលដូចជា កន្លែងហាត់ប្រាណ កន្លែងអង្គុយលេង អាងហែលទឹក កន្លែងកំសាន្ត និងកន្លែងលេងជាដើម។ ប្រសិនបើកន្លែងទាំងអស់នេះនៅតែបើក ការសម្អាត និងការរំងាប់មេរោគ គួរធ្វើជាប្រចាំ ហើយការចូលកន្លែងទាំងនោះ គួរត្រូវបានកម្រិត ដើម្បីឱ្យបុគ្គលិកអាចរក្សាគម្លាតពីគ្នាប្រវែង ៦ជំហ៊ាន។
៦) ទំនើបកម្មបរិក្ខារក្នុងអគារ៖
មានបរិក្ខារជាច្រើន ដែលជាទូទៅ មិនអាចជួសជុលបាន កាលពីពេលមិនទាន់មានវិបត្តិនេះ។ ភាគច្រើនបរិក្ខារទាំងនោះ ច្រើនតែត្រូវរង់ចាំចុងសប្តាហ៍ ពេលទំនេរគ្មានមនុស្សធ្វើការ ទើបអាចជួសជុលបាន។ ពេលឈប់សម្រាកកូវីដ១៩នេះ គឺជាឱកាសល្អសម្រាប់ម្ចាស់អគារ ឬក្រុមហ៊ុនសេវាកម្មបរិក្ខារ អាចធ្វើការងារនេះបាន ហើយគួរផ្តោតសំខាន់មិនត្រឹមតែទៅលើគ្រោងអគារទេ តែទៅលើប្រភេទបរិក្ខារប្រសិទ្ធភាពថាមពល និងប្រព័ន្ធខ្យល់ក្នុងអគារផងដែរ។
សម្រាប់ប្រព័ន្ធខ្យល់ ម្ចាស់អគារ អាចជ្រើសរើសបំពាក់ប្រព័ន្ធហ្វីតវែល ( Fitwel ) ដែលជាប្រព័ន្ធគំរូគ្រប់គ្រងអគារ និងជាផែនទីសម្រាប់ជាជំនួយដល់រចនាប្លង់អគារផងដែរ។ អ្វីដែលពិសេសសម្រាប់ប្រព័ន្ធនេះ គឺបំពាក់បច្ចេកវិទ្យាទំនើបក្នុងការចម្រោះខ្យល់ក្នុងអគារ។
៧) ការគ្រប់គ្រងថាមពល៖
ថាមពល គឺជាផ្នែកសំខាន់នៃអគារ ព្រោះវារួមចំណែកលើចំណាយអស់ប្រហែលពី ៤០ ទៅ ៥០ភាគរយនៃថ្លៃចំណាយទាំងអស់ក្នុងអគាររបស់អ្នក។ សម្រាប់ស្ថានភាពនេះ អ្នកមិនចាំបាច់ត្រូវការប្រព័ន្ធគ្រប់គ្រងអគារទំនើបពេកទេ ប៉ុន្តែអ្នកគ្រាន់តែមើលថែ និងគ្រប់គ្រងគ្រឿងឧបករណ៍ និងបរិក្ខារថាមពលក្នុងអគារឱ្យបានហ្មត់ចត់ជាងមុន ទាំងនៅពេលដំណើរការ និងក្រោយពេលដំណើរការ។ វិធានទាំងនេះ មានដូចជាការធានាថា អំពូលភ្លើង និងម៉ាស៊ីនត្រជាក់ ត្រូវបានបិទ នៅពេលទំនេរពីការងារ ជាពិសេសការធានាគុណភាពខ្យល់ និងប្រសិទ្ធភាពដំណើរការរបស់ម៉ាស៊ីនត្រជាក់។
៨) បន្តទំនាក់ទំនងល្អជាមួយគ្រប់សមាសភាគី៖
ត្រុវតាមដានជាប្រចាំជាមួយសារព័ត៌មានក្នុងស្រុកទាំងអស់ និងស្ថាប័នរដ្ឋាភិបាល ដើម្បីឱ្យអ្នកតាមទាន់ការវិវឌ្ឍសភាពការណ៍ ដែលអាចឱ្យអ្នកសម្របខ្លួនបានលឿន។ រក្សាក្រុមហ៊ុន អតិថិជន អ្នកជួល និងអ្នកកាន់កាប់អគាររបស់អ្នកឱ្យធ្វើបច្ចុប្បន្នភាពជាប្រចាំ និងជាពិសេស ការបញ្ចៀសការផ្សាយព័ត៌មានមិនត្រឹមត្រូវ ដែលនឹងបង្កើតការភ័ន្តច្រឡំទាំងក្នុងការទំនាក់ទំនង និងក្នុងការបំពេញការងារ។
ការគ្រប់គ្រងអគារការិយាល័យ ឬអគារពាណិជ្ជកម្ម ក្រោយពេលស្ថានភាពជំងឺឆ្លងកូវីដ១៩ ផុតរលត់
នៅពេលបើកដំណើរការអគារឱ្យចូលបំពេញការងារឡើងវិញ ច្បាស់ណាស់ បុគ្គលិក អតិថិជន និងអ្នកផ្គត់ផ្គង់អគារ នឹងមានការរំពឹងថ្មីមួយលើរបៀបដំណើរការ អនាម័យ និងបរិយាកាសក្នុងអគារ នៅពេលចូលធ្វើការវិញ។ យោងទៅតាមអត្ថបទចេញផ្សាយខាងលើ ម្ចាស់ ឬអ្នកជួលអគារ ត្រូវផ្តោតសំខាន់លើកត្តាសំខាន់ៗមួយចំនួនដូចជា៖
១) ប្រតិបត្តិការដូចដើម៖
ការត្រួតពិនិត្យ និងការធ្វើតេស្តលើប្រព័ន្ធសំខាន់ៗរបស់អគារ ដើម្បីធានាពីសុវត្ថិភាព និងផាសុកភាពសម្រាប់អ្នករាល់គ្នា ពេលត្រឡប់ចូលមកធ្វើការក្នុងអគារវិញ។
២) ផែនការផ្តល់សេវា៖
ចាប់ផ្តើមឱ្យអ្នកផ្គត់ផ្គង់សេវាក្នុងអគារ ដូចជាអ្នកអនាម័យ អ្នកថែទាំអគារ សេវាកម្មអាហារ ប្រព័ន្ធម៉ាស៊ីនត្រជាក់របស់អគារ (HAVAC) និងសន្តិសុខជាដើម បំពេញការងាររបស់ខ្លួនយ៉ាងពេញលេញ ដើម្បីធានាប្រក្រតីភាព បរិយាកាសល្អ និងទំនុកចិត្តក្នុងការប្រតិបត្តិការការងារឡើងវិញ។
៣) ការគ្រប់គ្រងការផ្លាស់ប្តូរ៖
កត្តាសំខាន់ចុងក្រោយនោះ គឺការគ្រប់គ្រងការផ្លាស់ប្តូរ បែបនវានុវត្តន៍ ដែលត្រូវធ្វើឡើងដោយការធានាថា គ្រប់គ្នាក្នុងអគារ មានព័ត៌មានគ្រប់គ្រាន់អំពីការផ្លាស់ប្តូរណាខ្លះក្នុងអគារ និងក្នុងបរិយាកាសការងារក្រោយវិបត្តិផុតរលត់ទៅ។ ការណ៍នេះ រាប់បញ្ចូលទាំងភាពផ្លាស់ប្តូររូបវន្ត និងផ្លាស់ប្តូររបៀបរបបផ្សេងៗ និងអ្វីដែលត្រូវការពារបន្ត ប្រសិនបើមាន ដើម្បីធានាថាបុគ្គលិកបំពេញការងារក្នុងអគារទាំងអស់ អាចទទួលបាននូវការការពារប្រកបដោយសុខភាពល្អ សុវត្ថិភាព និងភាពកក់ក្តៅជាងមុន៕
