កូរ៉េនឹងជួយកម្ពុជា បំពាក់បច្ចេកវិទ្យាឆ្លាតវៃគ្រប់គ្រងទឹកស្អាតនៅភ្នំពេញ

29 ខែកក្កដា 2022
Uncategorized
8 មើល

ក្រុមហ៊ុនដ៏ល្បីល្បាញ GREENTECH INC របស់កូរ៉េ បានបង្ហាញពីជំហរដ៏មុតមាំក្នុងកិច្ចសហការអភិវឌ្ឃការបំពាក់បច្ចេកវិទ្យាឆ្លាតវៃ ដើម្បីគ្រប់គ្រងវិស័យផ្គត់ផ្គង់ទឹកស្អាតជាជំហ៊ានដំបូងនៅរដ្ឋាករទឹកស្វយ័តក្រុងភ្នំពេញក្នុងពេលឆាប់ៗនេះ។

នេះបើយោងតាមជំនួបពិភាក្សា រវាងឯកឧត្តម ចម ប្រសិទ្ធ រដ្ឋមន្រ្តីក្រសួងឧស្សាហកម្ម ជាមួយប្រតិភូក្រុមហ៊ុន GREENTECH INC កូរ៉េ ស្តីពីគម្រោងបំពាក់បច្ចេកវិទ្យាឆ្លាតវៃសម្រាប់វិស័យទឹកស្អាត នៅកម្ពុជា នៅថ្ងៃទី២៨ កក្កដា ២០២២។

លោក Tae-Yong Kwon ប្រធានក្រុមដឹកនាំគម្រោងរបស់ក្រុមហ៊ុនខាងលើ បានបង្ហាញជំហរយ៉ាងមុតមាំក្នុងកិច្ចសហការអភិវឌ្ឃការបំពាក់បច្ចេកវិទ្យាឆ្លាតវៃការគ្រប់គ្រងវិស័យផ្គត់ផ្គង់ទឹកស្អាតជាជំហ៊ានដំបូងនៅរដ្ឋាករទឹកស្វយ័តក្រុងភ្នំពេញ ព្រមទាំងការបណ្តុះបណ្តាលធនធានមនុស្ស និងឈានទៅអភិវឌ្ឍនៅបណ្តាខេត្តនានាបន្តទៀត តាមសំណើរររបស់កម្ពុជា។

ជាការឆ្លើយតប ឯកឧត្តម ចម ប្រសិទ្ធ ក៏បានបង្ហាញការគាំទ្រពេញទំហឹងចំពោះគម្រោងខាងលើ ព្រោះគម្រោងនេះមានសារៈសំខាន់ណាស់សម្រាប់បំពេញបន្ថែមនូវភាពខ្វះចន្លោះ និងជាផ្នែកមួយនៃការ អភិវឌ្ឍន៍វិស័យទឹកស្អាតនៅកម្ពុជា ជាពិសេសជួយដល់រដ្ឋាករទឹកស្វយ័តក្រុងភ្នំពេញ។ ឯកឧត្តម មានជំនឿជឿជាក់ថា គម្រោងនេះនឹងទទួលបានការសម្រេចពីរដ្ឋាភិបាលកូរ៉េឆាប់ៗ ក្នុងជំនួយឥតសំណងក្រោមក្របខណ្ឌ ODA និងការសិក្សាពីសមិទ្ធិលទ្ធភាពបានជោគជ័យ ។

គួរបញ្ជាក់ដែរថា ក្រុមហ៊ុន GREENTECH INC គឺជាក្រុមហ៊ុនដែលមានភាពល្បីល្បាញខ្លាំង និងជាប់ចំណាត់ថ្នាក់លេខ១នៅកូរ៉េ ផ្នែកប្រព័ន្ធគ្រប់គ្រងវិស័យទឹកស្អាត។

យ៉ាងណា តំណាងក្រុមហ៊ុននេះ បានអះអាងថា នៅសប្តាហ៍ក្រោយនេះ វិស្វករចំនួន៧រូបរបស់កូរ៉េ នឹងមកធ្វើសិក្សារបន្ថែមទៀតជាមួយមន្ត្រីជំនាញរបស់កម្ពុជា ដើម្បីជំរុញល្បឿននៃការអនុវត្តគម្រោងនេះឲ្យបានជោគជ័យផងដែរ៕

- Video Advertisement -