កោះរ៉ុងត្រូវបានបង្កើតទៅជាក្រុងរដ្ឋបាលថ្មីក្នុងទឹកដីខេត្តព្រះសីហនុ

• 20 ខែ​មិថុនា 2019
• ព័ត៌មានអចលនទ្រព្យ
• 8 មើល

រូបភាពដោយ Travolution360

រដ្ឋាភិបាលបានចេញអនុក្រឹត្យកាត់សង្កាត់ចំនួនពីរ គឺសង្កាត់កោះរ៉ុង និងសង្កាត់កោះរ៉ុងសន្លឹម បង្កើតទៅជាក្រុងកោះរ៉ុង។ ការបង្កើតសង្កាត់កោះរ៉ុងនេះ ធ្វើឡើងស្របពេលដែល កោះរ៉ុង និងកោះរ៉ុងសន្លឹម នៃខេត្តព្រះសីហនុជាកន្លែងគួរជាទីមនោរម្យចង់មកលំហែរបស់ភ្ញៀវទេសរចជាតិ និងអន្តរជាតិ។ នេះបើយោងតាមទំព័រហ្វេសប៊ុក របស់រដ្ឋបាលខេត្ត។

ការប្រកាសបង្កើតក្រុងកោះរ៉ុង ត្រូវបានធ្វើឡើង នៅថ្ងៃទី១៩ ខែមិថុនា ក្រោមអធិបតីយភាព ឯកឧត្តម យន្ត មីន អភិបាលខេត្តព្រះសីហនុ។ ការបង្កើតក្រុងថ្មីនេះ នឹងធ្វើឲ្យខេត្តមាត់សមុទ្រមួយនេះ មានក្រុងចំនួនពីរ គឺក្រុងព្រះសីហនុ និងស្រុកព្រៃនប់ ស្រុកកំពង់សិលា និងស្រុងស្ទឺងហាវ។

ថ្លែងក្នុងឱកាសប្រកាសមុខតំណែងថ្នាក់ដឹកនាំក្រុងនេះ ឯកឧត្តម យន្ត មីន បានគូសបញ្ជាក់ថាក្រុងកោះរ៉ុងគឺជាតំបន់ទេសចរណ៍មួយប្រកបដោយសក្តានុពល ដោយកោះរ៉ុងមានឆ្នេរខ្សាច់ស្អាត មានទឹកសមុទ្រថ្លាឈ្វេងគួរឱ្យចង់ហែលលេងកម្សាន្ត និងកោះគ្រប់ដណ្ដប់ទៅដោយព្រៃឈើបៃតងហើយមានបរិយាកាសល្អខ្យល់អាកាសបរិសុទ្ធគួរឱ្យចង់មកលំហែ។

លោកអភិបាលខេត្តព្រះសីហនុ យល់ឃើញថាសក្តានុពលរបស់កោះរ៉ុងបានធ្វើឲ្យពិភពលោកបានស្គាល់កោះរ៉ុងនៃខេត្តព្រះសីហនុថាជាកន្លែងគួរជាទីមនោរម្យចង់មកលំហែ។

លោកអភិបាលខេត្តព្រះសីហនុ ថ្លែងថា៖ «អនាគតក្រុងកោះរ៉ុងនឹងកាន់តែល្អប្រសើរហើយជាទីកន្លែងគួរជាទីទាក់ទាញភ្ញៀវទេសចរមកពីជុំវិញពិភពលោក»។

ដោយមានប្រជាជនសរុបជាង៧០០គ្រួសារកំពុងរស់នៅ ក្រុងកោះរ៉ុងមានចម្ងាយប្រមាណ ៣៦ គីឡូម៉ែត្រពីដែនគោកនៃក្រុងព្រះសីហនុ។បើធ្វើដំណើរតាមទូកពីក្រុងព្រះសីហនុ ឆ្ពោះទៅក្រុងកោះរ៉ុងចំណាយពេលត្រឹមតែ ៣០ ទៅ ៤០ នាទីប៉ុណ្ណោះ។

បច្ចុប្បន្ននេះ បើទោះបីជាហេដ្ឋារចនាសម្ព័ន្ធនៅក្រុងនេះមិនទាន់បានរៀបរយក្តី ប៉ុន្តែអភិបាលខេត្តព្រះសីហនុលោកថានិងជំរុញឲ្យអ្នកដឹកនាំក្រុងរៀបចំហេដ្ឋារចនាសម្ព័ន្ធសព្វបែបយ៉ាងឲ្យបានល្អប្រសើរដើម្បីធានានិរន្តរភាពនិងភាពងាយស្រួលក្នុងការបំពេញការងារផ្សេងៗរបស់ប្រជាពលរដ្ឋ៕

• ចំណេះដឹង និង បទពិសោធន៍
• គម្រោងអភិវឌ្ឍន៍
• អត្ថបទវិភាគ
• ធុរកិច្ច និងទីផ្សារ
• ចំណេះដឹង និង បទពិសោធន៍
• គម្រោងអភិវឌ្ឍន៍
• នគរូបនីយកម្ម និងស្ថាបត្យកម្ម
• បច្ចេកវិទ្យា និងវិស្វកម្ម
• ធុរកិច្ច និងទីផ្សារ
• អត្ថបទវិភាគ