ក្រសួងផ្តើមសិក្សាលទ្ធភាពសាងសង់លំនៅដ្ឋានតម្លៃសមរម្យសម្រាប់កម្មករ

• 30 ខែ​មេសា 2019
• ព័ត៌មានអចលនទ្រព្យ
• 8 មើល

ក្រសួងការងារ និងបណ្តុះបណ្តាលវិជ្ជាជីវៈ ចាប់ផ្តើមពិភាក្សាជាមួយវិស័យឯកជន លើលទ្ធភាពសាងសង់លំនៅដ្ឋានតម្លៃសមរម្យសម្រាប់កម្មកររោងចក្រកាត់ដេរសំលៀកបំពាក់តាមរយៈការបង់រំលស់ ដែលប្រាក់បង់រំលស់ស្មើនឹង ឬប្រហាក់ប្រហែលនឹងតម្លៃបង់ឈ្នួលផ្ទះ ឬបន្ទប់ជួល។

ឯកឧត្តម អ៊ីត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ក្រសួងបានចាប់ផ្តើមពិភាក្សាជាមួយវិស័យឯកជនដើម្បីអភិវឌ្ឍសាងសង់លំនៅដ្ឋានតម្លៃសមរម្យសម្រាប់កម្មករ។

ឯកឧត្តម អ៊ិត សំហេង មានប្រសាសន៍ថា៖ «ខ្ញុំបានពិភាក្សាជាមួយដៃគូ ដើម្បីអភិវឌ្ឍលំនៅដ្ឋាន តម្លៃថោក សម្រាប់បង់រំលស់ ដែលស្មើនឹងប្រាក់ដែលបងប្អូនជួលផ្ទះ។ អ្នកវិនិយោគមួយចំនួនមានគំនិតថា សាងសង់លំនៅដ្ឋាន ឬបន្ទប់ លក់ទៅឲ្យបងប្អូនកម្មករ ក្នុងតម្លៃថោក។ បើគាត់នៅគ្នាបួននាក់ក្នុងបន្ទប់ គាត់បង់ប្រហែល៥០ដុល្លារ ជាជាងជួលគេ ចឹងអភិវឌ្ឍន៍ទៅ ហើយលក់ឲ្យពួកគាត់ក្នុងតម្លៃស្មើនឹងគាត់បង់ថ្លៃជួលបន្ទប់»។

ថ្លែងនៅក្នុងពិធីអបអរទិវារពលកម្មអន្តរជាតិ កាលពីថ្ងៃ២៤ ខែមេសាកន្លងទៅ ឯកឧត្តមរដ្ឋមន្រ្តីបញ្ជាក់ថា ប្រាក់បង់រំលស់នេះ នឹងធ្វើឲ្យកម្មកររោងចក្រក្លាយជាម្ចាស់កម្មសិទ្ធិផ្ទះ។

ទោះជាយ៉ាងណា ឯកឧត្តមរដ្ឋមន្រ្តីបញ្ជាក់ថា គម្រោងសាងសង់លំនៅដ្ឋានសម្រាប់បងប្អូនកម្មករ នេះ នឹងចំណាយពេលច្រើន ដើម្បីរកដៃគូពីវិស័យឯកជនដើម្បីវិនិយោគ។

យ៉ាងណាក៏ដោយ រដ្ឋមន្រ្តីក្រសួងការងារមិនបានបញ្ជាក់ពីចំនួននៃតម្រូវការលំនៅដ្ឋានតម្លៃសមរម្យសម្រាបកម្មកររោងកាត់ដេរនោះទេ។
បើយោងតាមតួលេខផ្លូវការរបស់ក្រសួងការងារ កម្ពុជាមានកម្មករដែលបម្រើការនៅក្នុងរោងចក្រកាត់ដេរ សំលៀកបំពាក់ ប្រមាណជាង៧០ម៉ឺននាក់៕

• ច្បាប់ និងបញ្ញាត្តិ
• គម្រោងអភិវឌ្ឍន៍
• ច្បាប់ និងបញ្ញាត្តិ
• គម្រោងអភិវឌ្ឍន៍