ក្រសួងមហាផ្ទៃ ស្នើឱ្យអាជ្ញាធរពាក់ព័ន្ធ ដោះស្រាយបញ្ហាដីធ្លីដោយមានតម្លាភាព និងស្អាតស្អំ

• 22 ខែ​វិច្ឆិកា 2021
• ព័ត៌មានអចលនទ្រព្យ
• 10 មើល

ក្រសួងមហាផ្ទៃ បានស្នើឱ្យអាជ្ញាធរពាក់ព័ន្ធ ត្រូវដោះស្រាយបញ្ហាដីធ្លីគ្រប់រូបភាព ដោយមានតម្លាភាព និងស្អាតស្អំ ពិសសេលំនៅឋាន និងសិទ្ធិរបស់ជនជាតិដើមភាគតិច ទិសដៅដើម្បីជំរុញការអភិវឌ្ឍប្រកបដោយនិរន្តរភាពនៅកម្ពុជា។

ក្រសួងដាក់សំណើដូច្នេះ ក្នុងសន្និសីទថ្នាក់ជាតិលើកទី ១៤ ស្តីពីអភិបាលកិច្ចដីធ្លី និងធនធានធម្មជាតិនេះ កាលពីថ្ងៃទី១៧ ខែវិច្ឆិកា ឆ្នាំ២០២១ ដែលមានសហការដោយអង្គការដៃគូចំនួន ៥៣ អង្គការ ។

ឯកឧត្តម ងី ច័ន្រ្ទផល រដ្ឋលេខាធិការក្រសួងមហាផ្ទៃ ឱ្យស្នើថាអាជ្ញាធរពាក់ព័ន្ធត្រូវពង្រឹងការអនុវត្តច្បាប់បទដ្ឋានគតិយុត្តឱ្យបានត្រឹមត្រូវ ហើយរាល់ការដោះស្រាយបញ្ហាដីធ្លីត្រូវគិតគូរពីជីវភាពប្រជាពលរដ្ឋជាចម្បង។

ជាមួយគ្នានោះ លោកបណ្ឌិត តឹក វណ្ណារ៉ា នាយកប្រតិបត្តិ វេទិកានៃអង្គការមិនមែនរដ្ឋាភិបាលស្តីពីកម្ពុជា (NGOF) ក៏បានឱ្យដឹងថា វេទិកានេះនឹងរួមចំណែកជួយរកដំណោះស្រាយ ចំពោះបញ្ហាដីធ្លីដែលកើតមាននាពេលបច្ចុប្បន្ន ពិសេសក្នុងសហគមន៍ជនជាតិដើមភាគតិច។

គួរបញ្ជាក់ថា សម្ដេចនាយករដ្ឋមន្រ្តី ហ៊ុន សែន ធ្លាប់ដាក់បញ្ជាថា ក្រសួងត្រូវខិតខំធ្វើយ៉ាងណា ដោះស្រាយបញ្ហាដីធ្លីឱ្យអស់ទាំងករណីថ្មី និងចាស់ ដោយប្រើនីតិវិធីក្រៅប្រព័ន្ធតុលាការ។ (អានបន្ថែម)

សម្ដេចបន្ដថា៖ «បើទៅរួច បញ្ហាដីធ្លីគួរដោះស្រាយក្រៅប្រព័ន្ធតុលាការឱ្យបានចប់សព្វគ្រប់ ព្រោះបើឡើងតុលាការគឺត្រូវមានអ្នកចាញ់ និងអ្នកឈ្នះ តែបើដោះក្រៅប្រព័ន្ធតុលាការគឺអាចទទួលបានលទ្ធផលឈ្នះឈ្នះទាំងសងខាង ប៉ុន្តែមន្រ្តីយើងត្រូវដោះស្រាយដោយមានសុចរិតភាព»។

• ច្បាប់ និងបញ្ញាត្តិ
• គោលនយោបាយ និងការអភិវឌ្ឍដីធ្លី
• ច្បាប់ និងបញ្ញាត្តិ