ក្រុមហ៊ុនម៉ាឡេស៊ីលុបចោលគម្រោងបង្កើតសួន Jurassic នៅខេត្តព្រៃវែង

• 4 ខែ​មករា 2019
• ព័ត៌មានអចលនទ្រព្យ
• 8 មើល

រូបភាពដោយ Shenghung Lin

ក្រុមហ៊ុនវិនិយោគដ៏ធំនៅរបស់ប្រទេសម៉ាឡេស៊ី MQ Technology Berhad បានសម្រេចលុបចោលកិច្ចព្រមព្រៀងជាមួយក្រុមហ៊ុន Cambodia Resort and Entertainment (CRE) សម្រាប់គម្រោងបង្កើតសួនកម្សាន្ត Jurassic Theme Park នៅខេត្តព្រៃវែង។

យោងតាមសេចក្តីប្រកាសនៅលើផ្សារហ៊ុនរបស់ប្រទេសម៉ាឡេស៊ី Bursa Malaysia កាលពីថ្ងៃទី ០២ ខែ មករា ឆ្នាំ ២០១៩ ក្រុមហ៊ុនខាងលើបានសម្រេចលុបចោលកិច្ចព្រមព្រៀងក្នុងការអភិវឌ្ឍន៍និងគ្រប់គ្រងសួនកម្សាន្តខាងលើដែលជាគម្រោងមួយក្នុងចំណោមគម្រោងអភិវឌ្ឍន៍តម្លៃជាង៥១លានដុល្លារអាមេរិកស្ថិតនៅជិតព្រំប្រទល់កម្ពុជា-វៀតណាម។

គម្រោងអភិវឌ្ឍន៍តម្លៃជាង៥១លានដុល្លារអាមេរិកនេះរួមមានសណ្ឋាគារ កាស៊ីណូ និង សួនកម្សាន្ត Jurassic Theme Park ដែលត្រូវបានចុះកិច្ចព្រមព្រៀមកាលពីថ្ងៃទី ១៣ ខែ ធ្នូ ឆ្នាំ ២០១៦ ហើយគ្រោងនឹងបញ្ចប់ការសាងសង់ក្នុងរយៈពេល៦ឆ្នាំបន្ទាប់តែត្រូវបានពន្យាពេលអស់៨ដងរួចមកហើយ។

«ក្រុមប្រឹក្សាភិបាលរបស់ MQ Technology Berhad សូមប្រកាសថា អនុស្សារណៈនៃកិច្ចព្រមព្រៀងដែលត្រូវបានពន្យាពេលរហូតដល់ថ្ងៃទី ០២ ខែមករា ឆ្នាំ ២០១៩ ត្រូវបានចាត់ទុកថាបានបញ្ចប់» ក្រុមហ៊ុនបានសរសេរ យ៉ាងដូច្នេះ។

ក្រុមហ៊ុនបានបន្ថែមទៀតថា៖ «អនុស្សារណៈនៃកិច្ចព្រមព្រៀងពាក់ព័ន្ធនឹងការបណ្តាក់ទុនរួមគ្នារវាងក្រុមហ៊ុន Star Acres Sdn Bhd ដែលជាក្រុមហ៊ុនមួយរបស់ក្រុមហ៊ុន (MQ) និងក្រុមហ៊ុន CRE ដើម្បីអភិវឌ្ឍនិងគ្រប់គ្រងសួនកម្សាន្តក្នុងព្រះរាជាណាចក្រកម្ពុជាមិនបានបន្តទៀតនោះទេដោយសារភាគីនានាមិនអាចធ្វើឲ្យការវិនិយោគដំណើរការទៅមុខបាន»។

សូមបញ្ជាក់ថា កិច្ចព្រមព្រៀងដើមនៃគម្រោងបង្កើតសួនកម្សាន្ត Jurassic គឺក្រុមហ៊ុន Star Acres Sdn Bhd កាន់កាប់ភាគហ៊ុនប្រមាណជា ៧០ ភាគរយឫឯភាគហ៊ុនដែលសេសសល់គឺកាន់កាប់ដោយក្រុមហ៊ុន CRE។

• គម្រោងអភិវឌ្ឍន៍
• គម្រោងអភិវឌ្ឍន៍